Horiso 34 - Sơ̆p Hlabơar Nơ̆r 'Bok Kei-Dei

Kră Yang hơmet dôm tơmam kăl yua păng dŏng pơklaih ăn

¹ Inh gô ư-ang akâu Kră Yang ling-lang. Tơdrong ư-ang kơ Sư oei 'bơ̆t hơkŭng inh

² Bơhngol inh gô pơư pơang lăm Kră Yang, Lu bơngai gô kơtơ̆ng păng chơt hiôk tơpă.

³ Ơ kơkuh bơnê bĕ kơ Kră Yang hơdai inh. Bĕ lu bơ̆n pơư pơang anăn Kră Yang.

⁴ Inh krao apinh boih Kră Yang, Sư tơl boih nơ̆r inh. Sư pơklaih inh đơ̆ng tơdrong hli hlơt.

⁵ Lu bơngai lăng tơ Kră Yang na Kră Yang pơchrang hơdah kơ lu sư. Muh măt lu sư ưh kơ mơlâu.

⁶ Lu bơngai pơmat âu ôr krao Kră Yang, Kră Yang mơ̆ng nơ̆r lu sư. Dŏng pơklaih lu sư đơ̆ng dôm tơdrong pơmat-tat.

⁷ Linh jang Kră Yang war tăp dăr kơ lu đe bu mă hli yom kơ Sư. Păng dŏng pơklaih lu sư.

⁸ Pơlong lăng bĕ Kră Yang na 'bôh Sư 'lơ̆ng tơpăt dang yơ! Pŭn dêh kơ bu băt kơ'nơp lăm Sư!

⁹ Ơ lu bơngai 'lơ̆ng rơgoh lăm Kră Yang, hli yom bĕ kơ Sư! Yua kơ bơngai bu mă hli yom kơ Sư ưh kơ đei kơ'bah kiơ.

¹⁰ Kon dăm-brang mơlôh khăi kơ tơmam sa păng pơngot. Mă-lei bơngai bu mă krao chă Kră Yang ưh kơ đei khăi kơ tơmam 'lơ̆ng ôh.

¹¹ Ơ lu kon năm mơ̆ng Inh bĕ, Inh gô bơtho kơ lu iĕm băt hli yom kơ Kră Yang.

¹² Bu 'maih wă đei tơdrong arih, Păng wă arih sota gô 'bôh tơdrong pŭn hiôk?

¹³ Bơwei bĕ hơpiĕt wă huay kơ pơma nơ̆r kơnê̆ păng hơkŭng huay kơ pơma nơ̆r plêl.

¹⁴ Weh kơ tơdrong kơnê̆ păng pơm bĕ tơdrong 'lơ̆ng. Chơchă bĕ tơdrong hiôk-hian păng druh kiơ̆ tơdrong ei.

¹⁵ Măt Kră Yang lăng tơ lu bơngai tơpăt. Đon Sư mơ̆ng nơ̆r lu đe noh krao apinh.

¹⁶ Muh măt Kră Yang hil kơ lu bơngai kơnê̆. Wă tơhiong lê̆ dôm tơdrong đe 'blŏk kơ lu sư tơ lăm teh đak.

¹⁷ Lu bơngai 'lơ̆ng tơpăt Krao apinh, Kră Yang mơ̆ng hloi. Păng pơklaih lu sư đơ̆ng tơdrong pơmat-tat.

¹⁸ Kră Yang oei jê̆ lu bơngai đei chhŭr nuih, Păng dŏng pơklaih lu bơhngol mă sơ'ngon kơ tơdrong yoch

¹⁹ Lu bơngai 'lơ̆ng tơpăt đei lơ tơdrong pơmat-tat truh. Mă-lei Kră Yang dŏng pơklaih đĭ tơdrong noh.

²⁰ Sư wei đĭ dôm kơting sư, Ưh kơ đei minh pôm ayơ mă tơgơ̆.

²¹ Tơdrong kơnê̆ gô pơlôch lu bơngai kơnê̆, lu areh kơ bơngai 'lơ̆ng gô pŭ iŏk tơdrong phak.

²² Kră Yang huai iŏk bơhngol lu đĭch đam sư. Bu mă gơneh gơnơm lăm Sư, huay pă pŭ tơdrong phak boih.