Horiso 3 - Sơ̆p Hlabơar Nơ̆r 'Bok Kei-Dei

Tơdrong krao khan pơgê

¹ Ơ Kră Yang! Lu ayăt kơ inh lơ dêh pă băt dôm yơ! Lu bơngai iung blah inh lơ dêh tơpă!

² Lơ bơngai khan kơ bơhngol inh: “Kră Yang 'Bok Kei-Dei ưh kơ đei pơklaih sư ôh!” Sêla

³ Mă-lei, Ơ Kră Yang! Ih boih khêl pĕng tăp kơ inh; Ih jing tơdrong mă inh ư-ang, păng Ih ăn kơ inh gơh ngơk kơ̆l.

⁴ Inh krao ôr Kră Yang! Đơ̆ng kông rơgoh Sư tơl nơ̆r inh. Sêla

⁵ Inh 'bĭch đơ̆ng noh tep hiôk; Inh hơđơ̆r, yua kơ Kră Yang râu tơiung inh.

⁶ Inh ưh kơ hli ôh kơ lơ rơbâu bơngai, Wang tăp dăr puăn pah.

⁷ Ơ Kră Yang, iung bĕ; Ơ Kră Yang 'Bok Kei-Dei, pơklaih inh bĕ! Yua kơ Kră Yang tap boih tơ'bŏk lu ayăt kơ inh, Păng gơ̆ lê̆ boih hơnĕnh lu bơngai kơnê̆.

⁸ Tơdrong dŏng pơklaih đơ̆ng Kră Yang, Apinh Ih ăn tơdrong pŭn hiôk tih kơ kon pơlei pơla Ih. Sêla