Horiso 29 - Sơ̆p Hlabơar Nơ̆r 'Bok Kei-Dei

Nơ̆r Kră Yang krưp tơpă

¹ Ơ lu kon Kră Yang 'Bok Kei-Dei, bơnê bĕ kơ Kră Yang 'lơ̆ng rŏ păng mơsêh mơyang

² Kơkuh bĕ kơ Kră Yang mơsêh mơyang Anăn Sư trŏ kơ pơư pơang, iŏk bĕ tơdrong 'lơ̆ng rơgoha na kơkuh kơ Kră Yang.

³ Nơ̆r Kră Yang ư-ang jơ̆p tơ kơpal đak. Kră Yang Kră Yang 'Bok Kei-Dei nơ̆r Sư pơma re jur thoi grơ̆m glaih.

⁴ Nơ̆r Kră Yang kơtang tơpă. Nơ̆r Kră Yang đei mơsêh krưp.

⁵ Nơ̆r Kră Yang pơm pơchah tơgơ̆ kơ 'long dơnơ̆ng pơchah. Tơpă, Kră Yang pơm tơgơ̆ kơ 'long dơnơ̆ng Liban.

⁶ Sư pơm kơ char Liban pơplŏng thoi kon rơmo, păng Sirionb pơplŏng thoi kon rơmo dăm.

⁷ Nơ̆r Kră Yang lĕch pla ŭnh.

⁸ Nơ̆r Kră Yang pơm kơ tơmăn glă pơpơ̆. Kră Yang gơgŭ char 'blach Kalđê pơpơ̆.

⁹ Nơ̆r Kră Yang pơm ăn kơ juei akăn tuh kon Păng lŏng lê̆ lu roh bri 'biơu-'biao. Lăm Hnam Sư đĭ-đăng ôr khan: “Ư-ang tơpă!”

¹⁰ Kră Yang oei tơ kơpal đak lơ̆p, Kră Yang pơm pơtao ling-lang ưh kơ layơ tôch

¹¹ Kră Yang gô ăn tơdrong kơtang kơ kon pơlei pơla Sư. Kră Yang gô ăn pŭn hiôk, rơnŭk rơnua kơ kon pơlei pơla sư.