Horiso 25 - Sơ̆p Hlabơar Nơ̆r 'Bok Kei-Dei

Krao khan apinh Kră Yang tơgŭm, dui ba păng huay pă jô̆ yoch

¹ Ơ Kră Yang, inh pơjao bơhngol inh kơ Ih.

² Ơ Kră Yang 'Bok Kei-Dei inh! Jơhngơ̆m inh lui gơnang kơ Ih; 'nĕ ăn kơ inh mơlâu, 'Nĕ ăn jei lu ayăt kơ inh.

³ Tơpă, dôm lu bơngai gơnang kơ Ih. Ưh kơ đei mơlâu, Ăn bĕ kơ lu bơngai ưh kơ chu lui gô mơlâu.

⁴ Ơ Kră Yang, apinh Ih Tơ'bôh kơ inh trong Ih, Păng bơtho inh băt dôm trong gơlong Ih.

⁵ Apinh chông ba inh lăm trong tơpăt Ih păng bơtho tơ'bôh kơ inh, Yua kơ Ih boih Kră Yang 'Bok Kei-Dei dŏng pơklaih inh. Rim năr inh chang gô Ih.

⁶ Ơ Kră Yang, apinh Ih 'blŏk kơ jơhngơ̆m mơnat păng tơdrong 'mêm Ih; Yua kơ 'bar tơdrong noh đei boih đơ̆ng sơ̆.

⁷ Apinh Ih lê̆ pă 'blŏk kơ tơdrong yoch, Inh pơm oei hơmuh hơmŏng, dah tơdrong kơnê̆ mă inh pơm boih; 'Blŏk kơ inh kiơ̆ thoi Ih mơnat, yua kơ tơdrong 'lơ̆ng Ih. Ơ Kră Yang.

⁸ Kră Yang 'lơ̆ng rŏ păng tơpăt. Yua kơ thoi noh Sư gô bơtho tơ'bôh trong kơ lu bơngai yoch.

⁹ Sư gô ba lu iơ̆m dim, lăm trong tơpăt, Bơtho tơ'bôh trong Sư kơ lu bơngai chu yom.

¹⁰ Lu trong Kră Yang 'mêm mơnat păng tơpăt ngăl Ăn kơ bu mă bơwei nơ̆r Sư pơkă păng tơdrong Sư pơgơ̆p.

¹¹ Yua kơ anăn Ih, Ơ Kră Yang, Mơnat ăn tơdrong yoch kơnê̆ inh, mă khan yoch noh tih dêh.

¹² Bơngai bu hli yom kơ Kră Yang? Sư gô bơtho pơhrăm bơngai noh lăm trong sư wă rơih.

¹³ Bơhngol sư gô oei tơ anih hiôk-hian. Păng lu kon sâu sư gô đei teh jang sa

¹⁴ Kră Yang pơdah ăn tơdrong hlơpa hăm lu Bơngai đe mă hli yom kơ Sư. Tơ'bôh ăn kơ bơngai noh băt tơdrong Sư pơgơ̆p.

¹⁵ Măt inh gô pơglăn tơ Kră Yang ling-lang Yua kơ Sư gô pleh jơ̆ng inh đơ̆ng hơnhuăl.

¹⁶ Apinh Kră Yang lăng inh păng mơnat kơ inh, Yua kơ inh hơdrô̆ păng pơmat-tat dêh

¹⁷ Tơdrong hli hlơt inh rai dêh, apinh Ih pơklaih inh đơ̆ng tơdrong hơnat hơnot.

¹⁸ Lăng ba inh 'bơ̆t năr hơnat hơnot păng lăm năr pơmat-tat, Păng mơnat ăn đĭ tơdrong yoch inh.

¹⁹ Lăng bĕ tơ lu ayăt kơ inh, yua kơ lu sư lơ dêh; Lu sư areh kơ inh dêh tơpă.

²⁰ Apinh Kră Yang wei bơhngol inh; păng dŏng pơklaih inh. 'Nĕ ăn kơ inh mơlâu, Yua kơ inh kơ'nơp lăm Ih

²¹ Ăn tơdrong 'lơ̆ng rơgoh păng tơdrong tơpăt wei-lăng inh, Yua kơ inh chang gô Ih.

²² Ơ Kră Yang 'Bok Kei-Dei! Apinh Ih dŏng pơklaih bơngai Isơrael. Đơ̆ng đĭ-đăng tơdrong gleh sư.