Horiso 24 - Sơ̆p Hlabơar Nơ̆r 'Bok Kei-Dei

Pơtao ư-ang mơ̆t tơ pơlei Siôn

¹ Teh păng dôm tơmam kơpal teh, Teh đak păng lu bơngai oei tơ lăm noh. Tă kơ tơmam Kră Yang ngăl.

² Yua kơ Sư pơjing teh kơpal đak krong dơsĭ, Păng dan sư kơjăp kơpal đak tih.

³ Bu gơh tŏk tơ kông Kră Yang? Bu gơh kĕ dơ̆ng lăm anih rơgoh Sư?

⁴ Noh lu bơngai đei ti rơgoh păng jơhngơ̆m rơgoh, Ưh kơ wă ăn bơhngol sư tơdrong yoch glăi, Kŭm ưh kơ pơkă hơlĕnh.

⁵ Bơngai noh gô đei pŭn hiôk đơ̆ng Kră Yang, Păng tơdrong tơpăt đơ̆ng Kră Yang 'Bok Kei-Dei, Tơ'ngla dŏng pơklaih Sư.

⁶ Noh boih adrĕch adrung lu bơngai chơchă Kră Yang, Wă khan lu bơngai chơchă muh măt Kră Yang 'Bok Kei-Dei Jakôp.a Sêla

⁷ Ơ lu 'măng jang hiŏng kơ̆l ih bĕ! Ơ lu 'măng mă oei oei ling-lang, pơih kơjung bĕ! Na pơtao ư-ang gô mơ̆t,

⁸ Pơtao ư-ang ei bu? Sư boih Kră Yang mă pran kơtang păng mơsêh. Kră Yang nuih pran lăm anih tơblah.

⁹ Ơ lu 'măng jang hơtŏk bĕ! Ơ lu 'măng oei oei ling-lang, Pơih kơjung bĕ, Na pơtao ư-ang gô mơ̆t,

¹⁰ Pơtao ư-ang âu bu? Noh boih Kră Yang Tih Hloh. Sư boih pơtao ư-ang mơsêh mơyang Tih Hloh lăm anih tơblah. Sêla