Horiso 21 - Sơ̆p Hlabơar Nơ̆r 'Bok Kei-Dei

Bơnê kơ Kră Yang yua kơ Sư dŏng pơklaih

¹ Ơ Kră Yang, hăm pran kơtang Ih, pơtao gô chơt hiôk, Đơ̆ng tơdrong Ih dŏng pơklaih, sư gô chhôk hal pă băt dang yơ!

² Kră Yang ăn boih kơ sư, dôm jơhngơ̆m sư 'maih wă, Ưh kơ đei sơngah ôh, dôm 'bơ̆r sư apinh.

³ Yua kơ hăm tơdrong 'lơ̆ng rŏ na năm sơng iŏk sư, Pơyơ̆l ăn tơ kơ̆l sư môk pơtao 'maih rang.

⁴ Sư apinh Ih tơdrong arih, Ih ăn hloi kơ sư Ih ăn kơ sư năr đunh sot ling-lang hlŏng hloi.

⁵ Đơ̆ng tơdrong dŏng pơklaih Ih, sư đei ư-ang tih tơpă: Ih ăn kơ sư tơdrong rang rŏ dêh.

⁶ Ih ăn kơ sư pŭn hiôk ling-lang, Pơm ăn kơ sư chơt hiôk 'bơ̆t anăp Ih.a

⁷ Yua kơ pơtao lui gơnang kơ Kră Yang, Gơnang kơ tơdrong 'mêm mơnat đơ̆ng Kră Yang mă kơpal Hloh, Na sư ưh kơ đei tơdrŏ.

⁸ Ti Ih gô rôp lu ayăt kơ Ih, Ti gah 'ma Ih gô rôp đei lu hil areh kơ Ih

⁹ Lăm năr Ih pơdah akâu. Ihb gô pơm kơ lu sư khơ̆ng thoi pla ŭnh, Kră Yang gô luăn lu sư, lăm năr Kră Yang hil blĕk, Păng ŭnh gô soh chhông đĭ lu sư.

¹⁰ Ih gô pơrăm kon sâu lu sư đơ̆ng teh đak, Păng adrĕch adrung lu sư đơ̆ng kon bơngai.

¹¹ Mă lu sư wă pơm kơnê̆ kơ Ih ră Lu sư pơđâu chă đon ưh kơ jing ôh.

¹² Ih gô pơm ăn kơ lu sư kơdâu tơ rŏng Ih gŭt hră Ih rĕng tơ lu sư,

¹³ Ơ Kră Yang, anăn Ih ư-ang lăm pran kơtang Ih! Lu nhôn gô hơri bơnê kơkuh tơdrong mơsêh Ih.