Horiso 20 - Sơ̆p Hlabơar Nơ̆r 'Bok Kei-Dei

Krao khan kơ Kră Yang ăn kĕ jei đơ̆ng lu bơngai ayăt

¹ Apinh Kră Yang tơl tơwih nơ̆r ih kơplah năr đei anat anot! Ăn kơ anăn Kră Yang 'Bok Kei-Dei Jakôp wei-lăng ih.

² Apinh đơ̆ng anih rơgoh, gơih ăn tơdrong tơgŭm ih Păng đơ̆ng Siôn tơgŭm dŏng ih,

³ Apinh Kră Yang 'blŏk kơ dôm tơmam ih soi. Păng iŏk dôm tơmam soi pơyơ̆r. Sêla

⁴ Apinh Kră Yang ăn kơ ih dôm jơhngơ̆m hơpơi wă, Păng pơkeh dôm tơdrong ih tơchĕng wă pơm!

⁵ Lu nhôn chơt hiôk yua kơ ăn jei pơtao,a Apinh hăm anăn Kră Yang 'Bok Kei-Dei lu nhôn, yơ̆r kơjung hla-kơ lu nhôn. Apinh Kră Yang pơm keh dôm tơdrong pơtao hơpơi.

⁶ Âu inh băt Kră Yang dŏng pơklaihb 'Bok mă đei tuh đak rơmă đơ̆ng Sư. Đơ̆ng kơpal plĕnh rơgoh Sư gô tơl tơwih kơ pơtao, Hăm tơdrong kơtang tơgŭm dŏng pơklaih đơ̆ng ti 'ma Sư.

⁷ Lu đe âu gơnang kơ gre, lu đe nai gơnang kơ aseh Mă-lei lu nhôn gơnang kơ anăn Kră Yang jơ̆ Kră Yang 'Bok Kei-Dei lu nhôn.

⁸ Lu đe noh kơdŭn pơ̆k hraih đang, Gah lu nhôn iung păng dơ̆ng tơpăt hloi.

⁹ Ơ Kră Yang, tơgŭm bĕ 'Bok Pơtao! Apinh tơl tơwih ăn kơ lu nhôn, dah lu nhôn krao apinh.