Horiso 2 - Sơ̆p Hlabơar Nơ̆r 'Bok Kei-Dei

Tơdrong pơgơ̆p đơ̆ng Tơ'ngla mă Kră Yang rơih

¹ Yua kơ kiơ đei tơdrong iung blơ̆ lăm dêh char? Păng lu kon pơlei chă đon tơdrong hiong răm?

² Lu pơtao lăm teh đak iung blah, Lu kră pơgơ̆r pơđâu chă đon wă blah Kră Yang, păng Tơ'ngla mă Kră Yang đei rơih tuh đak rơmă

³ Lu sư khan: “Bĕ bơ̆n hrĕch lê̆ glang, păng pleh hŭt lê̆ ataih đơ̆ng bơ̆n”

⁴ Kră Yang đơ̆ng plĕnh gô hiĕk, Kră Yang gô pơjăm lu sư.

⁵ Dang ei Kră Yang hil mĭl kơ lu sư. Đơ̆ng noh pơrŭng lu sư hăm tơdrong hil kơtang.

⁶ “Mă-lei, Inh pơjing boih Tang-dŏ Tang-dŏ pơtao Inh tơ kơpal kông Siôn rơgoh.”

⁷ Inh gô roi tơblang nơ̆r tơtă mă Kră Yang khan kơ inh: “Ih boih kon inh; Năr âu inh pơjing ih.

⁸ Apinh bĕ Inh, Inh gô ăn kơ ih lu teh đak jing teh ih jang sa. Păng jơ̆p-jang kơ teh jing tơmam ih

⁹ Ih gô Pơgơ̆r lu sư hăm 'long jra mam; Ih gô teh pơchah lê̆ lu sư thoi gŏ teh.”

¹⁰ Thoi noh, ơ lu pơtao, tơchĕng bĕ mă hơgei; Ơ kră Pơgơ̆r lăm teh đak, athei bơtho tơ'bôh bĕ.

¹¹ Athei bơ̆jang kơ Kră Yang hăm tơdrong hli yom, Păng chơt hiôk bĕ truh akâu pơpơ̆.

¹² Chŭm Sư bĕ, hli kơ Sư hil, păng hli kơ iĕm lôch hiong lăm trong tôch; Yua kơ tơdrong sư hil rai tŏk. Pŭn hiôk dêh kơ bu mă kơ'nơp lăm Sư!