Horiso 19 - Sơ̆p Hlabơar Nơ̆r 'Bok Kei-Dei

Tơdrong jang păng nơ̆r Kră Yang 'Bok Kei-Dei tơtă

¹ Lu hơtăl plĕnh ră roi tơdrong ư-ang Kră Yang 'Bok Kei-Dei, Tơ plĕnh ti tơ'bôh tơdrong jang đơ̆ng ti Sư pơm.

² Năr âu pơma bơtho kơ năr dơning, Măng âu tơ'bôh tơbăt kơ măng đơ̆ng rŏng.

³ Ưh kơ đei nơ̆r pơma, ưh kơ đei jơwa re; Kŭm ưh kơ đei bu kơtơ̆ng nơ̆r lu sư.a

⁴ Mă-lei nơ̆r lu sư pơma truh jơ̆p-jang kơ teh đak, Păng nơ̆r lu sư kơtơ̆ng truh tôch teh đak.b Tơ plĕnh Kră Yang pơm hnam bơsŭn ăn kơ măt 'năr boih;

⁵ Măt 'năr noh thoi ŏng di 'nao lĕch đơ̆ng anih pơkong. Chhôk hal kơdâu thoi bơngai nuih pran.

⁶ Măt 'năr lĕch đơ̆ng plĕnh âu, năm dăr truh tơ jơ̆ng plĕnh gah to, Ưh kơ đei kiơ mă gơh weh đơ̆ng yuh tŏ măt 'năr.

⁷ Khôi juăt đơ̆ng Kră Yang jơ̆ 'lơ̆ng tơpăt, pơrih ăn bơhngol inh, c Kră Yang khan sĭt tơpă, pơm ăn kơ bơngai kơtul jing hơgei.

⁸ Tơdrong Kră Yang athei jơ̆ tơpăt, Pơm ăn kơ jơhngơ̆m chơt hiôk. Nơ̆r tơtă Kră Yang jơ̆ rơgoh, pơm ăn kơ măt đe hơdah hơdong.

⁹ Hli yom kơ Kră Yang jơ̆ 'lơ̆ng rơgoh, oei oei truh tơ ning-mônh, Dôm tơdrong Kră Yang pơkă jơ̆ sĭt tơpă, đĭ-đăng trŏ ngăl.

¹⁰ Dôm tơdrong noh gĭt hloh kơ maih, gĭt hloh kơ ling maih; Kŭm 'ngam hloh kơ đak sut đơ̆ng hơkoh sư.

¹¹ Đơ̆ng tơdrong noh bơtho ăn kơ đĭch đam Kră Yang hlôh wao; Bu bơwei, sư đei apah tih tơpă.

¹² Bu băt kơdih đei yoch glăi? Apinh Kră Yang mơnat tơdrong yoch mă inh ưh kơ băt.

¹³ Apinh Kră Yang bơwei lu đĭch đam Ih huay kơ pơrơ̆ng pơm yoch,d 'Nĕ ăn tơdrong yoch noh pơgơ̆r inh; na Ih huay chrih kơ inh, Păng huay kơ pơm tơdrong yoch tih.

¹⁴ Ăn kơ nơ̆r pơma đơ̆ng 'bơ̆r inh, Ơ Kră Yang Ih jơ̆ thoi tơmo pĕng inh, Păng jơ̆ Kră Yang dŏng pơklaih inh, Hăm tơdrong tơchĕng đơ̆ng lăm jơhngơ̆m inh jing 'lơ̆ng pơm kơ Ih lăp đon!