Horiso 18 - Sơ̆p Hlabơar Nơ̆r 'Bok Kei-Dei

Bơnê kơ Kră Yang, yua kơ Sư ăn jei bơ̆n bơih. Pơjuă pơđep (pơtrơp đơ̆ng ti lu ayăt)

¹ Ơ Kră Yang, inh 'mêm kơ Ih boih jơhngơ̆m inh pran.

² Kră Yang thoi tơmo pĕng inh, jing kơđông inh, Kră Yang dŏng pơklaih inh; Kră Yang 'Bok Kei-Dei thoi tơmo pĕng inh, inh gô kơ'nơp tơ lăm Sư; khêl inh, hơke dŏng pơklaih inh păng anih kơjăp inh.

³ Kră Yang trŏ kơ bơ̆n kơkuh bơnê; inh gô krao apinh Sư, Na Sư gô pơklaih inh đơ̆ng lu ayăt.a

⁴ Bră tơdrong lôch pơ̆n tăp dăr kơ inh boih, Đak tihb lơ̆p pơhoch lê̆ inh.

⁵ Lu bră dêh atâu dăng tăp dăr kơ inh, Hơnhuăl tơdrong lôch dăng anăp inh.

⁶ Lăm năr hơnat hơnot inh krao chă Kră Yang. Inh krao apinh Kră Yang 'Bok Kei-Dei inh: Đơ̆ng anih Pơtao Sư, Sư kơtơ̆ng nơ̆r inh, Păng nơ̆r inh krao truh tơ đon Sư.

⁷ Dang ei teh pơpơ̆ păng tơdrŏ, Na lu kông kư̆m tơrĭ păng kư̆m tơdrŏ, yua kơ Sư hil.

⁸ Đei 'nhui lĕch đơ̆ng trôm muh Sư, Pla ŭnh khơ̆ng lĕch đơ̆ng 'bơ̆r Sư, soh sa ngar ngŭr.

⁹ Sư rĭ plĕnh, đơ̆ng noh jur;c Ala kơ jơ̆ng sư đei măng gueo.

¹⁰ Sư hao chêrubim, na păr; Sư păr đông hăm pơnăr jơwa kial.

¹¹ Sư pơm măng mu klơ̆p tăp dăr kơ Sư, Sư iŏk hơmơ̆l găm 'mi hơ'bơ̆l gueo gom tăp kơ Sư.

¹² Đơ̆ng lăm rang mơnhal 'bơ̆t anăp Sư, đei lu hơmơ̆l đông lĕch hloi 'mi prĕl păng ngar ŭnh ngŭr.

¹³ Kră Yang Sư pơm grơ̆m glaih tơ kơpal plĕnh. Kră Yang kơpal hloh ăn kơ đe kơtơ̆ng nơ̆r Sư. Tơ lăm 'mi prĕl hăm ngar ŭnh ngŭr

¹⁴ Sư prah 'brơ̆m pơm kơ lu ayăt kơ inh tơklah tơklang đĭ, Tơlĕch kơmlat pơm kơ lu sư mơnhal hơwơ̆l hơwang.

¹⁵ Ơ Kră Yang, đơ̆ng nơ̆r Ih chrih, Kial lĕch đơ̆ng trôm muh Ih, na kơđĕl đak dơsĭ 'bôh hơnă teh đak kư̆m 'bôh bang.

¹⁶ Đơ̆ng kơpal plĕnh kơjung Sư chro ti rôp inh. Hiŏng hơtŏk inh hlôi đơ̆ng đak jrŭ.

¹⁷ Sư dŏng pơklaih inh đơ̆ng lu ayăt mă pran kơtang. Đơ̆ng lu bơngai areh kơ inh, yua kơ lu sư pran hloh kơ inh.

¹⁸ Lu sư bruh tơ inh, mă-lei Kră Yang dŏng tơgŭm inh, lăm năr inh anat anot.

¹⁹ Sư chông tơlĕch inh tơ anih să rơhơi. Dŏng inh, yua kơ Sư hiôk kơ inh.

²⁰ Kră Yang apah inh boih. Kiơ̆ thoi tơdrong tơpăt inh; sư pơdrâu tơwih kơ inh kiơ̆ thoi đêl ti inh rơgoh.

²¹ Yua kơ inh wei răk kiơ̆ trong Kră Yang, Ưh kơ đei pơm kơnê̆ achăng lê̆ Kră Yang 'Bok Kei-Dei inh.

²² Yua kơ dôm nơ̆r Sư tơtă oei 'bơ̆t anăp inh, Gah tơdrong juăt Sư, inh ưh kơ lê̆ ôh.

²³ Inh oei 'lơ̆ng hơiă 'bơ̆t anăp Sư, Bơwei kơdih akâu huay kơ pơm kơnê̆

²⁴ Thoi noh, Kră Yang tơwih pơdrâu kơ inh kiơ̆ thoi tơdrong tơpăt inh, Apah inh kiơ̆ thoi tơdrong rơgoh đơ̆ng ti inh 'bơ̆t anăp Sư.

²⁵ Hăm lu đei đon lui, Ih gô tơ'bôh Ih boih Kră Yang sĭt. Hăm lu bơngai tơpăt, Ih boih Tơ'ngla tơpăt;

²⁶ Hăm lu bơngai 'lơ̆ng rơgoh, Ih boih Tơ'ngla 'lơ̆ng rơgoh; Gah lu bơngai ưh kơ chu, Ih gô phak tơpă.

²⁷ Yua kơ Ih dŏng tơgŭm lu bơngai iŏk đon ala; Mă-lei Ih gô tơjur lu bơngai pơang.

²⁸ Kră Yang tơ̆k ŭnh kơđeng inh khơ̆ng: Kră Yang 'Bok Kei-Dei inh, Pơchrang ăn lăm anih măng mu inh.

²⁹ Đơ̆ng Ih tơgŭm inh gô kĕ đơ̆ng lu tơpôl linh ayăt. Gơnang kơ Kră Yang 'Bok Kei-Dei inh, đei pơplŏng hlôi kơ dur.

³⁰ Gah Kră Yang 'Bok Kei-Dei rim trong Sư 'lơ̆ng tơpăt ngăl; Nơ̆r Kră Yang hlôi hơmet rơgoh boih. Sư boih khêl kơ đe bu wă kơ'nơp tơ Sư.

³¹ 'Nguaih kơ Kră Yang, Bu dơ̆ng Kră Yang 'Bok Kei-Dei? 'Nguaih kơ Kră Yang 'Bok Kei-Dei, bu dơ̆ng thoi Tơmo tih?

³² Kră Yang 'Bok Kei-Dei tơ̆n ăn kơ inh hăm tơdrong pran kơtang, Păng pơm kơ trong inh dơnă.

³³ Sư pơm kơ jơ̆ng inh hơbĕch thoi jơ̆ng juei akăn, Păng hơtŏk dan inh tơ anih kơjung.

³⁴ Sư pơhrăm ti inh tơblah, Na kơkŏng inh kĕ gŭt hră kong

³⁵ Kră Yang ăn kơ inh khêl tơdrong dŏng pơklaih;d Ti gah 'ma Ih tơiung inh, Đơ̆ng tơdrong Ih dŏng na inh jing tih mơng.

³⁶ Kră Yang pơih trong să tơ rim yak inh, Jơ̆nge inh huay kơ tơpling.

³⁷ Inh druh rôp lu ayăt kơ inh, tam hloi; Inh ưh kơ wih brŏk ôh tơ rŏng, Dĭng inh pơrăm lu sư 'mơ̆i.

³⁸ Inh 'bet lu sư mah klĕch dĭng lu sư mah pă kĕ iung dơ̆ng, Lu sư pơ̆k hloi tơ ala jơ̆ng inh.

³⁹ Yua kơ Ih tơ̆n ăn kơ inh hăm tơdrong kơtang wă kơ tơblah, Ăn kơ bơngai ayăt kơ inh chu drap 'bơ̆t ala jơ̆ng inh.

⁴⁰ Kră Yang ăn kơ lu ayăt kơ inh tơwih kơ inh rŏng; Păng lu bơngai hil areh kơ inh, Inh pơrăm đĭ.

⁴¹ Lu sư ôr krao, mă-lei ưh kơ đei bu dŏng; Lu sư krao chă Kră Yang, mă-lei Sư ưh kơ tơl tơwih.

⁴² Inh teh pơrăm lu sư hĕch hoch thoi 'mui teh kial pơbăr pơđông. Inh tuh lê̆f lu sư thoi rơnŭk rok trong.

⁴³ Ih pơklaih inh đơ̆ng tơdrong kon pơlei blah pơjah hăm inh; Ih pơjing inh pơm kơ̆l kơ đĭ-đăng teh đak. Minh adrĕch adrung inh mă ưh kơ băt kơ inh gô bơ̆jang kơ inh.

⁴⁴ Lăp Lu sư kơtơ̆ng gah inh; lu sư chu yom kơ inh; Lu bơngai tơmoi kư̆m gô chu kiơ̆ inh.

⁴⁵ Lu bơngai tơmoi rơdu jơhngơ̆m, lu sư hli tơrơ lĕch đơ̆ng anih kơjăp lu sư ôn.

⁴⁶ Kră Yang oei arih ling-lang, thoi tơmo pĕng, trŏ kơ bơ̆n kơkuh tơpă Kră Yang 'Bok Kei-Dei Tơ'ngla pơklaih inh trŏ kơkuh pơyom

⁴⁷ Kră Yang 'Bok Kei-Dei, blah dŏng inh. Ăn kơ kon pơlei lui yom kơ inh.

⁴⁸ Sư dŏng pơklaih inh đơ̆ng lu ayăt; Tơpă Kră Yang hơtŏk inh jing kơjung hloh kơ lu ayăt kơ inh, Sư pơklaih inh đơ̆ng lu bơngai pơm kơnê̆.

⁴⁹ Thoi noh, Ơ Kră Yang, inh gô ư-ang kơ Ih lăm kon pơlei pơla, Păng hơri bơnê kơ Ih.

⁵⁰ Kră Yang ăn kơ pơtao Sư jei jơneig tih tơpă, Sư ăn tơdrong mơnat kơ bơngai mă Sư tuh đak rơmă, kơ Đawit, Păng kơ lu kon, sâu sư ling-lang hloi.