Horiso 17 - Sơ̆p Hlabơar Nơ̆r 'Bok Kei-Dei

Apinh Kră Yang dŏng tơgŭm đơ̆ng lu bơngai pơjuă pơđep

¹ Ơ Kră Yang! Apinh Ih mơ̆ng tơdrong tơpăt, Mơ̆ng pơnhen nơ̆r inh krao chă; Apinh pơgling đon Ih mơ̆ng nơ̆r inh krao khan. Đơ̆ng 'bơ̆r ưh kơ hơlĕnh.

² Ăn tơdrong inh pơm trŏ lĕch đơ̆ng anăp Ih; Apinh măt Ih lăng tơdrong tơpăt inh.

³ Kră Yang lăng boih jơhngơ̆m inh, năm lăng inh kiơ̆ kơmăng;a Đei pơlong inh, mă-lei ưh kơ đei 'bôh kiơ; Inh đei pơkă 'bơ̆r inh ưh kơ pơm yoch.b

⁴ Gah tơdrong jang kon bơngai pơm, đơ̆ng nơ̆r 'bơ̆r Ih khan, na inh gơh klaih huay kơ kiơ̆ lu trong bơngai kơnê̆.

⁵ Inh yak năm kơjăp lăm trong Ih, Jơ̆ng inh ưh kơ tơpling.

⁶ Ơ Kră Yang 'Bok Kei-Dei, inh Krao apinh Ih, Yua kơ Ih gô tơl tơwih nơ̆r inh krao khan. Apinh Ih pơgling đon mơ̆ng inh krao khan.

⁷ Ơ Kră Yang Apinh Ih pơdah tơdrong 'mêm hlĭch chrơp Ih, kơ bu mă năm ôn akâu sư tơ ti 'ma Ih. Đơ̆ng lu bơngai mă ayăt kơ lu sư.

⁸ Apinh Ih bơwei inh thoi bơwei kon-ngai lăm măt Ih, Apinh krôp inh ala pơnăr Ih Kră Yang.

⁹ Wă kơ inh klaih đơ̆ng lu bơngai wă pơrăm inh, Păng klaih đơ̆ng lu ayăt kơnê̆ oei wang tăp kơ inh.

¹⁰ Lu sư chĭt lê̆ jơhngơ̆m mơnat sư;c 'Bơ̆r lu sư pơma pơang.

¹¹ Lu sư wang tăp kơ nhôn rim yak boih, Măt lu sư oei lăng kơchăm tơ inh wă tơlơ̆ pơ̆k tơ teh.

¹² Lu sư thoi dăm-brang pơngot. Hơrum 'maih hek sa thoi kon dăm-brang oei răp lăm anih hlơp.

¹³ Ơ Kră Yang, iung bĕ răp tơpơ̆k tơhuŏng lê̆ lu sư; Iŏk đao gưm han Ih dŏng pơklaih bơhngol inh klaih đơ̆ng lu bơngai kơnê̆.

¹⁴ Ơ Kră Yang, yua ti Ih dŏng pơklaih inh đơ̆ng lu kon bơngai. Lu bơngai arih lăm teh đak đĕch. Lu bơngai mă Ih pơm ăn kơ klak lu sư 'bĕnh hăm mŭk gĭt Ih;d Lu sư hiôk yua kơ kon lu sư, kư̆m đei 'măn lê̆ tơmam rơkah kơ kon sâu se sư.

¹⁵ Bĭ inh âu, lăm tơdrong tơpăt inh gô 'bôh muh măt Ih; Mưh hơđơ̆r, inh gô lăp đon lăng rup hơbŏ Ih.e