Horiso 149 - Sơ̆p Hlabơar Nơ̆r 'Bok Kei-Dei

Hơri ư-ang kơ Kră Yang

¹ Halêluya! Hơri bĕ kơ Kră Yang minh 'bai hơri 'nao! Hơri bĕ kơ Sư lăm khŭl bơngai 'lơ̆ng rơgoh Sư akŭm.

² Ăn kơ lu bơngai Isơrael chơt hiôk lăm Tơ'ngla mă pơjing lu sư; Hơpơi ăn kơ lu kon sâu Siôn chơt hiôk lăm Pơtao sư.

³ Ăn kơ lu sư suang kơkuh bơnê bĕ kơ Anăn Sư. Iŏk hơgơ̆r iĕ păng brŏ hơri bơnê bĕ kơ Sư.

⁴ Yua kơ Kră Yang hiôk lăp đon kơ kon pơlei pơla Sư; Sư iŏk tơdrong dŏng pơklaih pơhrôp ăn kơ lu bơngai iŏk đon ala.

⁵ Ăn kơ đĭ lu bơngai 'lơ̆ng rơgoh chơt hiôk lăm tơdrong ư-ang Sư. Hơri chơt hiôk hloi tơ kơpal giơng lu sư!

⁶ Ăn nơ̆r hơri ư-ang kơ Kră Yang 'Bok Kei-Dei oei lăm 'bơ̆r lu sư. Chĕp đao 'bar pah măt lăm ti lu sư.

⁷ Wă kơ blah tơwih lu teh đak, wă phak pơmat lu kon pơlei.

⁸ Wă kơ chô̆ lu pơtao lu sư păng glang mam. Păng bơngai yŏng lu sư păng giĕn mam.

⁹ Wă sek phak lu sư kiơ̆ thoi đei chih boih. 'Nâu tơdrong ư-ang kơ lu bơngai 'lơ̆ng rơgoh Sư. Halêluya.