Horiso 148 - Sơ̆p Hlabơar Nơ̆r 'Bok Kei-Dei

Đĭ-đăng plĕnh teh hơri ư-ang kơ Kră Yang

¹ Halêluya! Đơ̆ng jơ̆p-jang kơpal plĕnh hơri ư-ang bĕ kơ Kră Yang! Hơri ư-ang bĕ kơ Sư lăm anih kơpal hloh!

² Ơ đĭ-đăng linh jang 'lơ̆ng hơri ư-ang bĕ kơ Sư. Ơ lu linh jang hơri ư-ang bĕ kơ Sư.

³ Ơ măt năr, măt khei hơri ư-ang bĕ kơ Sư. Ơ lu tăl sơnglŏng rang hơdah, bơnê ư-ang bĕ kơ Sư;

⁴ Ơ lu plĕnh kơpal hloh, ơ lu đak tơ kơpal plĕnh; hơri ư-ang bĕ kơ Sư!

⁵ Ăn kơ đĭ-đăng hơri ư-ang bĕ kơ anăn Kră Yang; yua kơ Sư athei, na đĭ-đăng jing đei.

⁶ Sư pơjing ăn kơjăp kơ lu tơmam noh kơjăp dĭng truh tơ ning-mônh ling-lang hloi; Sư ăn tơtă, ưh kơ đei tơhiong ôh.

⁷ Hơri ư-ang bĕ kơ Kră Yang đơ̆ng kơpal teh. Ơ lu kon sem brem lăm dơsĭ păng pŭng-lŭng jrŭ.

⁸ Ơ ŭnh păng 'mi prĕl, prĕl păng hơmơ̆l. Kial hơbŭt chu kiơ̆ Sư athei.

⁹ Ơ lu kông păng đĭ kơ groi, lu 'long plei păng lu 'long hơngo.

¹⁰ Kon sem bri păng lu kon sem dơrong. Kon hơdrông păng lu kon sem păr.

¹¹ Lu pơtao lăm teh đak păng đĭ-đăng adrĕch hơdrŭng kon bơngai. Lu kon pơtao păng đĭ-đăng lu Kră pơgơ̆r lăm teh đak.

¹² Lu tơdăm păng lu hơdruh hle, lu kră păng lu hơ'lơ̆p.

¹³ Ăn kơ lu sư hơri ư-ang kơ anăn Kră Yang. Yua kơ lăp minh anăn Sư đĕch mă trŏ kơ pơyom. Tơdrong ư-ang Sư kơjung hloh kơ đĭ-đăng teh đak păng plĕnh.

¹⁴ Sư đei hơtŏk boih jơhngơ̆m pran lu kon pơlei Sư thoi hơke sem bri Noh jơ̆ tơdrong hơri ư-ang đơ̆ng lu bơngai 'lơ̆ng rơgoh Sư, noh lu bơngai Isơrael. Kon pơlei pơla mă oei jê̆ Sư. Halêluya!