Horiso 147 - Sơ̆p Hlabơar Nơ̆r 'Bok Kei-Dei

Bơnê ư-ang kơ Kră Yang mơsêh mơyang

¹ Bơnê ư-ang bĕ kơ Kră Yang! Trŏ 'lơ̆ng tơpă. Hiôk hơri bơnê kơ Kră Yang 'Bok Kei-Dei lu bơ̆n; Hiôk dêh tơpă trŏ hơri bơnê kơ Sư.

² Kră Yang man pơdơ̆ng pơlei Jêrusalem; Sư krao akŭm lu bơngai Isơrael đơ̆ng tơklah tơklang.

³ Ming pơklaih lu bơngai đei jĭ jơhngơ̆m. Păng pơ̆n rơka lu sư.

⁴ Sư jô̆ đĭ lu sơnglŏng. Anăn ăn đĭ rim lu sơnglŏng.

⁵ Kră Yang lu bơ̆n tih tơpă, đei tơdrong mơsêh mơyang. Tơdrong gơh hơgei Sư pă băt dang yơ.

⁶ Kră Yang dŏng tơgŭm lu bơngai pơmat-tat. Teh tơhuŏng lu bơngai pơm kơnê̆ tơ teh.

⁷ Hơri bơnê bĕ kơ Kră Yang. Reh brŏ Dung bơnê kơ Kră Yang 'Bok Kei-Dei lu bơ̆n.

⁸ Sư gom plĕnh hăm hơmơ̆l. Ăn đak 'mi kơ teh. Ăn 'nhĕt 'nhot chăt kơpal groi.

⁹ Asong ăn tơmam sa kơ kon sem brem păng kơ kon ak mưh sư hmoi.

¹⁰ Sư ưh kơ lăp đon kơ jơhngơ̆m pran aseh, kư̆m ưh kơ hiôk kơ jơ̆ng pran kon bơngai.

¹¹ Mă-lei Kră Yang lăp đon kơ bu mă hli yom kơ Sư, păng lu bơngai mă chang hơmĕng kơ tơdrong Sư 'mêm.

¹² Ơ Jêrusalem, hơri bơnê bĕ kơ Kră Yang! Ơ Siôn, hơri ư-ang bĕ kơ Kră Yang 'Bok Kei-Dei ih!

¹³ Yua kơ Sư đei pơm kơjăp boih kơ chơkăl 'măng jang ih. Ăn tơdrong pŭn hiôk kơ kon sâu mă oei hơdai ih.a

¹⁴ Sư tơjruh tơdrong hiôk-hian kơ hơdral dêh char ih; Tuh ăn kơ ih đei 'bĕnh blai kơ 'ba mi mă 'lơ̆ng hloh.

¹⁵ Sư tơtă nơ̆r Sư tơ lăm teh. Nơ̆r Sư truh hloi kuăng tơpă.

¹⁶ Sư ăn 'mi prĕl thoi sŏk triu rei 'mui tŭk kok thoi tơnuh.

¹⁷ Sư tơjruh 'mi prĕl tơngiĕt thoi hơga. Bu kĕ oei tơ lăm prĕl tơngiĕt Sư ei.

¹⁸ Sư athei prĕl hach na hach hloi. Ăn kơ kial tơthu na đak ro hloi.

¹⁹ Sư roi tơbăt nơ̆r Sư kơ adrĕch Jakôp, Khôi juăt păng nơ̆r tơtă Sư kơ adrĕch Isơrael.

²⁰ Sư ưh kơ đei pơm thoi noh ôh kơ adrĕch adrung nai; Lu sư ưh kơ băt hlôh ôh nơ̆r tơtă đơ̆ng Kră Yang. Halêluya!