Horiso 145 - Sơ̆p Hlabơar Nơ̆r 'Bok Kei-Dei

Hơri bơnê ư-ang kơ Kră Yang

¹ Ơ Kră Yang 'Bok Kei-Dei inh, pơtao inh. Inh gô pôk ư-ang kơ Ih. Păng hơri bơnê kơ anăn Ih ling-lang hlŏng hloi.

² Rim năr inh gô hơri bơnê kơ Ih. Hơri ư-ang kơ anăn Ih ling-lang hlŏng hloi.

³ Kră Yang tih mơng, trŏ kơ bơnê ư-ang tơpă; Tơdrong tih Sư kon bơngai ưh kơ đei gơh pơtŏ pơting.

⁴ Adrĕch chăl âu gô roi ư-ang kơ tơdrong jang Ih kơ jơhnơr đơ̆ng rŏng păng roi tơbăt tơdrong mơsêh Ih.

⁵ Lu sư gô roi gah tơdrong 'lơ̆ng rŏ ư-ang Ih Gah inh gô tơchĕng kơ tơdrong jang hlĭch chrơp Ih.

⁶ Đe gô ră roi tơdrong mơsêh pran kơ tơdrong jang krưp Ih; Gah inh gô roi tơbăt tơdrong tih krưp Ih pơm.

⁷ Đe gô pơm giĕng 'blŏk hơdơ̆r kơ tơdrong 'lơ̆ng Ih. Păng hơri ư-ang kơ tơdrong tơpăt Ih.

⁸ Kră Yang băt mơnat păng đei jơhngơ̆m 'mêm. Hiơ̆ kơ blĕk păng 'bĕnh kơ tơdrong 'mêm mơnat.

⁹ Kră Yang, pơm 'lơ̆ng kơ đĭ-đăng kon bơngai. Tơdrong Sư 'mêm mơnat rim kơ tơmam đêl Sư pơjing;

¹⁰ Ơ Kră Yang, lu tơmam đêl Ih pơjing gô bơnê ư-ang kơ Ih; Dôm lu bơngai rơgoh gô hơri bơnê kơ Ih.

¹¹ Lu sư gô roi tơdrong ư-ang dêh char Ih. Ră roi tơdrong mơsêh Ih.

¹² Wă kơ kon bơngai băt. Tơdrong jang mơsêh Ih. Păng tơdrong 'lơ̆ng rŏ krưp mơsêh dêh char Ih.

¹³ Dêh char Ih oei oei ling-lang tơdrong Ih pơgơ̆r dĭng truh tơ ning-mônh khŏm khŏm. Kră Yang pơsĭt dôm nơ̆r Sư pơkă. Ih 'mêm kơ đĭ dôm tơmam đêl Ih pơjing.

¹⁴ Kră Yang, dŏng tơiung lu bơngai pơ̆k huŏng. Păng pơdơ̆ng tơpăt lu bơngai gu kơdŭ.

¹⁵ Đĭ-đăng măt kon bơngai oei chang Ih. Ih ăn kơ lu sư tơmam sa kiơ̆ trŏ 'bơ̆t sư kăl yua.

¹⁶ Kră Yang bơlang ti, ăn kơ lu kon sem arih klaih rơhing kiơ̆ thoi lu sư wă.

¹⁷ Kră Yang boih 'lơ̆ng tơpăt lăm rim trong Sư. Băt 'mêm kơ rim tơdrong jang Sư.

¹⁸ Kră Yang oei jê̆ lu bơngai krao chă Sư. Wă khan oei jê̆ lu đe bu mă krao chă Sư đĭ jơhngơ̆m tơpă.

¹⁹ Sư ăn tôm mah kơ lu đe bu hli yom kơ Sư. Kŭm mơ̆ng nơ̆r lu sư krao apinh păng dŏng pơklaih lu sư.

²⁰ Kră Yang wei-lăng lu bơngai mă 'mêm kơ Sư, Mă-lei gô pơlôch pơrăm lu bơngai pơm kơnê̆.

²¹ 'Bơ̆r inh gô hơri bơnê ư-ang kơ Kră Yang; Ăn kơ đĭ lu adrĕch sĕch akar kơkuh kơ anăn 'lơ̆ng rơgoh Sư, dĭng truh tơ ning-mônh hlŏng hloi.