Horiso 144 - Sơ̆p Hlabơar Nơ̆r 'Bok Kei-Dei

Apinh Kră Yang dŏng

¹ Kơkuh bơnê bĕ kơ Kră Yang jơ̆ Tơmo Tih inh! Sư pơjuăt ti inh wă kơ tơblah, pơhrăm hơnglâu ti inh gơh tơblah.

² Sư Tơ'ngla 'mêm kơ inh păng kơđông kơjăp inh. Kră Yang jơ̆ hơbong sơlŭng kơjăp păng dŏng pơklaih inh. Thoi khêl pĕng inh păng anih inh kơ'nơp. Sư pơm kơ kon pơlei chu yom tơ ala jơ̆ng inh.

³ Ơ Kră Yang, kon bơngai âu kiơ, mă Ih hiơ̆k kơ sư? Kon bơngai mah liơ na Ih mah tơchĕng 'blŏk kơ sư?

⁴ Kon bơngai thoi hơyuh dui jơhngơ̆m. Chăl kon bơngai thoi yơ̆p đông.

⁵ Ơ Kră Yang, apinh Ih tơjur lu plĕnh păng jur hloi bĕ! Hơtŭt kơ kông, na kông lĕch 'nhui.

⁶ Apinh tơlĕch bĕ kơmlat pơm ăn kơ lu ayăt tơklah tơklang. Prah bĕ 'brơ̆m hră Ih na puh lu sư.

⁷ Apinh chro ti Ih, đơ̆ng kơpal. Dŏng pơklaih inh, hơtŏk inh đơ̆ng lăm đak jrŭ. Pơklaih đơ̆ng ti lu bơngai tơmoi;

⁸ Bơngai đei 'bơ̆r pơma hơlĕnh. Đei ti 'ma pơkă bơkuĕch.

⁹ Ơ Kră Yang 'Bok Kei-Dei, inh gô hơri kơ Ih minh 'bai hơri 'nao. Reh brŏ dung mơjĭt dăng tơlei.

¹⁰ Ih ăn tơdrong jei kơ lu pơtao; Pơklaih Đawit đĭch đam Ih đơ̆ng tak đao gưm.

¹¹ Apinh Ih pơklaih inh đơ̆ng ti lu bơngai tơmoi; Lu bơngai đei 'bơ̆r pơma hơlĕnh. Đei ti 'ma pơkă bơkuĕch.

¹² Ăn kơ lu kon drŏ-nglo lu nhôn thoi tơm 'long hơdrih kơjung, ăn kơ lu kon drŏ-kăn lu nhôn thoi jrăng mum hnam thoi đe chhơ̆ kơ hnam pơtao.

¹³ Ăn kơ pơk lu nhôn 'bĕnh kơ phe 'ba. Đei tôm tơmam mong 'măn. Ăn kơ triu lu nhôn chek lar lơ rơbâu hơngan tơ lăm bri săr nhôn.

¹⁴ Ăn kơ rơmo lu nhôn chek lar rai lơ. 'Nĕ kơ ăn 'lih păng huay kơ lôch hiong. Dah đei nơ̆r ôr pơmat tơ rok trong pơlei tih lu nhôn.

¹⁵ Pŭn dêh kơ kon pơlei pơla ayơ đei thoi noh! Pŭn dêh kơ kon pơlei pơla ayơ mă đei Kră Yang jing Kră Yang 'Bok Kei-Dei lu sư!