Horiso 143 - Sơ̆p Hlabơar Nơ̆r 'Bok Kei-Dei

Krao khan apinh Kră Yang dŏng pơklaih

¹ Ơ Kră Yang, apinh Ih mơ̆ng nơ̆r inh krao khan, pơgling đon Ih mơ̆ng dôm nơ̆r inh krao apinh Ih mơnat. Lăm tơdrong 'lơ̆ng tơpăt, yua kơ Ih tơpăt sĭt, apinh Ih tơl tơwih nơ̆r inh hơpơi.

² Apinh 'nĕ kơ sek tơlang kơ đĭch đam Ih; Yua kơ 'bơ̆t anăp Ih, ưh kơ đei bơngai bu arih tơpăt.

³ Lu ayăt druh bơhngol inh, pơjuă bơhlơ̆r tơdrong arih inh tơ teh; Sư ăn kơ inh oei tơ lăm măng mu. Thoi bơngai lôch đĭ đunh boih.

⁴ Thoi noh bơhngol inh rơdu tơpă, jơhngơ̆m inh rŭng răng dêh.

⁵ Inh 'blŏk kơ năr adrol sơ̆, hơdơ̆r kơ dôm tơdrong jang Ih. Păng tơchĕng kơ tơdrong jang đơ̆ng ti Ih đei pơm.

⁶ Inh yơ̆r ti inh gah Ih; Jơhngơ̆m inh rơhing kơ Ih thoi teh hrĕng kro. Sêla

⁷ Ơ Kră Yang! Apinh Ih jah tĕnh tĕnh tơl tơwih nơ̆r inh. Bơhngol inh rơdu rơmơ̆n dêh. Apinh Ih 'nĕ kơ ôn muh măt Ih kơ inh. Hli kơ inh thoi bơngai jur tơ sơlŭng jrŭ.

⁸ Pơgê hrôih, apinh Ih ăn kơ inh kơtơ̆ng nơ̆r Ih 'mêm mơnat. Yua kơ inh gơnang kơ Ih. Apinh Ih bơtho ăn kơ inh trong wă yak kiơ̆. Yua kơ inh hơtŏk bơhngol inh tơ Ih.

⁹ Ơ Kră Yang, apinh Ih dŏng pơklaih inh đơ̆ng lu ayăt; Inh tơkan kơ'nơp tơ Ih.

¹⁰ Apinh Ih bơtho inh pơm kiơ̆ Ih wă. Yua kơ Ih boih Kră Yang 'Bok Kei-Dei inh, ăn Yang Bơhngol 'Lơ̆ng Ih ba inh mơ̆t tơ teh đak dơhnă.

¹¹ Ơ Kră Yang, yua kơ anăn Ih. Ăn kơ inh arih Lăm tơdrong tơpăt Ih, dui iŏk inh klaih đơ̆ng tơdrong pơmat-tat.

¹² Yua kơ tơdrong 'mêm mơnat Ih. Apinh Ih pơlôch pơrăm đĭ bĕ lu ayăt kơ inh, Păng pơrăm lê̆ lu bơngai pơjuă pơđep inh; Yua kơ inh jing đĭch đam Ih.