Horiso 138 - Sơ̆p Hlabơar Nơ̆r 'Bok Kei-Dei

Hơri bơnê kơ Kră Yang

¹ Inh hơri bơnê kơ Ih hăm đĭ jơhngơ̆m. Hơri bơnê kơ Ih 'bơ̆t anăp lu yang.

² Inh gô drap kơkuh 'bơ̆t anih rơgoh Ih. Bơnê kơ anăn Ih yua kơ tơdrong 'mêm păng tơdrong sĭt tơpăt Ih. Yua kơ Ih đei pơm ăn kơ anăn păng nơ̆r Ih đei pơyom tih hloh kơ đĭ-đăng,

³ Lăm năr inh krao apinh, Ih tơl tơwih, Ăn kơ jơhngơ̆m inh rai nuih pran kơtang.

⁴ Ơ Kră Yang, ăn đĭ kơ lu pơtao lăm teh đak kơkuh bơnê kơ Ih. Mưh lu sư kơtơ̆ng nơ̆r đơ̆ng 'bơ̆r Ih.

⁵ Lu sư gô hơri bơnê kơ trong Kră Yang. Yua kơ tơdrong ư-ang 'lơ̆ng rŏ Kră Yang tih-tin tơpă.

⁶ Mă khan, Kră Yang tih-tin. Kŭm oei lăng ba lu bơngai răm-'băm. Gah lu bơngai pơang, Sư băt lê̆ đơ̆ng adrol boih.

⁷ Mă inh oei lăm pơmat-tat, Ih wei tơdrong arih inh, Ih yơ̆r ti tơblah plơ̆ kơ tơdrong mă lu ayăt hil kơ inh, ti 'ma Ih dŏng pơklaih inh.

⁸ Kră Yang gô pơm keh dôm tơdrong Sư pơkă kơ inh. Ơ Kră Yang, tơdrong 'mêm Ih oei oei ling-lang; Apinh Ih 'nĕ kơ lê̆ dôm tơdrong jang đơ̆ng ti Ih.