Horiso 136 - Sơ̆p Hlabơar Nơ̆r 'Bok Kei-Dei

Tơdrong hơri bơnê

¹ Bơnê bĕ kơ Kră Yang, yua kơ Sư 'lơ̆ng; Tơdrong 'mêm Sư oei oei ling-lang.

² Bơnê bĕ kơ Kră Yang 'Bok Kei-Dei, yang tih hloh kơ lu yang nai. Tơdrong 'mêm Sư oei oei ling-lang.

³ Bơnê bĕ kơ Kră Yang, Sư yŏng hloh kơ lu yŏng. Tơdrong 'mêm Sư oei oei ling-lang.

⁴ Lăp minh 'nu Sư đĕch mă pơm mơsêh hlĭch dêh. Tơdrong 'mêm Sư oei oei ling-lang.

⁵ Sư yua boih tơdrong hơgei mơsêh Sư pơjing plĕnh; Tơdrong 'mêm Sư oei oei ling-lang.

⁶ Sư bơlang boih teh tơ kơpal đak Tơdrong 'mêm Sư oei oei ling-lang.

⁷ Pơjing lu măt chrang hơdah tih, Tơdrong 'mêm Sư oei oei ling-lang.

⁸ Măt 'năr wă pơgơ̆r kơ'năr, Tơdrong 'mêm Sư oei oei ling-lang.

⁹ Măt khei păng lu sơnglŏng wă pơgơ̆r kơmăng. Tơdrong 'mêm Sư oei oei ling-lang.

¹⁰ Sư pơlôch lê̆ boih lu kon kơdră bơngai Êyiptơ, Tơdrong 'mêm Sư oei oei ling-lang,

¹¹ Sư ba Isơrael lĕch hlôi đơ̆ng lu sư. Tơdrong 'mêm Sư oei oei ling-lang.

¹² Sư yơ̆r kơkŏng păng tơpang ti mơsêh mơyang Sư. Tơdrong 'mêm Sư oei oei ling-lang.

¹³ Sư klah đak Dơsĭ 'Brê jing 'bar. Tơdrong 'mêm Sư oei oei ling-lang.

¹⁴ Ăn kơ lu bơngai Isơrael yak tŏk rok đak dơsĭ noh. Tơdrong 'mêm Sư oei oei ling-lang.

¹⁵ Teh tơhuŏng Pharaôn păng lu linh sư tơ lăm đak Dơsĭ 'Brê. Tơdrong 'mêm Sư oei oei ling-lang;

¹⁶ Sư chông kon pơlei Sư rok char 'blach. Tơdrong 'mêm Sư oei oei ling-lang.

¹⁷ Sư blah pơrăm đĭ lu pơtao tih mơng. Tơdrong 'mêm Sư oei oei ling-lang.

¹⁸ Pơlôch pơrăm lu pơtao đe ư-ang. Tơdrong 'mêm Sư oei oei ling-lang;

¹⁹ Sihôn, pơtao bơngai Amôrit. Tơdrong 'mêm Sư oei oei ling-lang;

²⁰ Păng Ok, pơtao char Basan Tơdrong 'mêm Sư oei oei ling-lang;

²¹ Sư jao ăn teh đe noh kơ lu kon pơlei sư jang sa. Tơdrong 'mêm sư oei oei ling-lang.

²² Wă khan ăn teh jang sa kơ Isơrael, đĭch đam Sư. Tơdrong 'mêm Sư oei oei ling-lang.

²³ Sư 'blŏk hơdơ̆r kơ lu nhôn răm-'băm. Tơdrong 'mêm Sư oei oei ling-lang.

²⁴ Dŏng pơklaih lu nhôn đơ̆ng lu ayăt kơ bơ̆n. Tơdrong 'mêm Sư oei oei ling-lang.

²⁵ Sư kư̆m ăn tơmam sa kơ lu adrĕch sĕch akar. Tơdrong 'mêm Sư oei oei ling-lang.

²⁶ Athei bơnê bĕ kơ Kră Yang 'Bok Kei-Dei kơpal plĕnh. Tơdrong 'mêm Sư oei oei ling-lang.