Horiso 135 - Sơ̆p Hlabơar Nơ̆r 'Bok Kei-Dei

Bơnê kơ tơdrong jang hlĭch chrơp Kră Yang

¹ Halêluya! Bơnê kơkuh bĕ kơ anăn Kră Yang, Ơ lu đĭch đam Kră Yang,

² Lu iĕm bơngai mă bơ̆jang lăm hnam Kră Yang. Tơ cham Hnam Kră Yang 'Bok Kei-Dei lu bơ̆n.

³ Bơnê bĕ kơ Kră Yang, Yua kơ Kră Yang 'lơ̆ng; Hơri bơnê bĕ kơ anăn Kră Yang, yua kơ noh chơt hiôk,

⁴ Yua kơ Kră Yang rơih boih Jakôp kơ Sư, păng rơih Isơrael jing tơmam Sư kơdih.

⁵ Inh băt Kră Yang tih tơpă. Kră Yang lu bơ̆n tih hloh kơ đĭ-đăng lu yang.

⁶ Kră Yang pơm đĭ-đăng, tơdrong kiơ Sư lăp đon. Mă tơ plĕnh ti dah tơ teh âu, lăm đak dơsĭ, dah tơ lăm anih jrŭ sŭng.

⁷ Sư ăn kơ hơmơ̆l đông đơ̆ng tôch jih kơ plei teh. Sư ăn kơmlat kiơ̆ kơ 'mi, Ăn kơ kial lĕch đơ̆ng anih mong sư.

⁸ Sư pơlôch lu kon kơdră bơngai Êyiptơ, Đơ̆ng kon kơdră kon bơngai truh tơ kon sem dơrong.

⁹ Ơ bơngai Êyiptơ! Sư ăn boih dôm tơdrong hlĭch chrơp tơ iĕm, wă phak pơtao Pharaôn păng lu jang kơ sư;

¹⁰ Sư kư̆m pơlôch lơ dêh char tih păng pơlôch lu pơtao nuih pran.

¹¹ Thoi Sihôn pơtao bơngai Amôrit, Ok, pơtao lu bơngai Basan. Păng đĭ-đăng pơtao dêh char Kanaan

¹² Sư ăn char lu đe noh jing teh jang sa kơ lu bơngai Isơrael, jơ̆ kon pơlei Sư.

¹³ Ơ Kră Yang, anăn Ih oei oei ling-lang; Tơdrong 'blŏk kơ anăn Ih đơ̆ng jơhnơr âu truh tơ jơhnơr nai.

¹⁴ Yua kơ Kră Yang gô sek tơlang tơpăt kơ kon pơlei pơla Sư. Păng đei jơhngơ̆m mơnat kơ lu đĭch đam Sư.

¹⁵ Lu rup mam pơm yang păng hu maih noh tơdrong jang đơ̆ng tơpang ti kon bơngai pơm.

¹⁶ Rup man noh đei 'bơ̆r mă-lei ưh kơ gơh pơma. Đei măt mă-lei ưh kơ gơh 'bôh.

¹⁷ Đei đon mă-lei ưh kơ kơtơ̆ng păng kư̆m ưh kơ đei kial dui jơhngơ̆m lăm 'bơ̆r.

¹⁸ Lu bơngai mă pơm lu rup noh sư kư̆m nhen thoi rup noh. Đĭ-đăng lu bơngai lui gơnang kơ rup yang noh kư̆m lei-lăi thoi rup man noh.

¹⁹ Ơ adrĕch Isơrael, kơkuh bơnê bĕ kơ Kră Yang! Ơ adrĕch Arôn, kơkuh bơnê bĕ kơ Kră Yang!

²⁰ Ơ adrĕch Lêwi, kơkuh bơnê bĕ kơ Kră Yang. Ơ lu bơngai hli yom kơ Kră Yang, kơkuh bơnê bĕ kơ Kră Yang!

²¹ Kơkuh bơnê bĕ kơ Kră Yang đơ̆ng pơlei Siôn. Kră Yang mă oei tơ Jêrusalem! Halêluya.