Horiso 132 - Sơ̆p Hlabơar Nơ̆r 'Bok Kei-Dei

Krao apinh Kră Yang ăn tơdrong pŭn hiôk tơ anih 'lơ̆ng rơgoh

¹ Ơ Kră Yang! Apinh Ih 'blŏk kơ Đawit, Păng tơdrong gleh pơmat sư pŭ.

² Sư đei pơkăm hăm Kră Yang. Păng pơkă hăm Kră Yang mơsêh mơyang Jakôp:

³ “Inh ưh kơ mơ̆t tơ lăm hnam inh, Kŭm ưh kơ tŏk tơ giơng tep.

⁴ Inh ưh kơ tep măt pơdơh, Kŭm ưh kơ ăn kơ gơnur măt inh pơdơh.

⁵ Dĭng truh tơ inh mă chă đei anih ăn kơ Kră Yang. Minh anih oei ăn kơ Kră Yang mơsêh mơyang Jakôp!”

⁶ Lu nhôn đei kơtơ̆ng roi gah hom tơdrong pơgơ̆p tơ Êphratha. Nhôn 'bôh boih Sư tơ lăm mir Jaar.

⁷ Bĕ bơ̆n năm tơ anih Sư oei. Hăm drap kơkuh 'bơ̆t jơ̆ng Sư.

⁸ Ơ Kră Yang, iung bĕ na mơ̆t pơdơh tơ anih Ih, Ih păng hom pơgơ̆p pran kơtang Ih!

⁹ Ăn kơ 'bok soi Ih hrŭk iŏk tơdrong 'lơ̆ng tơpăt; Lu bơngai 'lơ̆ng rơgoh Ih gô hơri hiôk chơt.

¹⁰ Yua kơ Đawit, đĭch đam Ih, Ih 'nĕ kơ sơngah ôh kơ bơngai mă Ih đei tuh đak rơmă.

¹¹ Kră Yang đei pơkă pơkăm boih hăm Đawit. Sư ưh kơ đei sơngah dơ̆ng: “Inh gô pôk hơtŏk tơ tang-dŏ pơtao Ih. Minh 'nu kon drŏ-nglo lĕch đơ̆ng akâu akar Ih.

¹² Tơdah lu kon ih wei răk nơ̆r Inh pơgơ̆p. Păng nơ̆r tơtă mă Inh gô bơtho kơ lu sư, Lei kon hơ'lơ̆p lu sư kư̆m gô oei tơ kơpal tang-dŏ pơtao ih ling-lang hlŏng hloi.”

¹³ Yua kơ Kră Yang rơih boih Siôn; Sư wă kơ Siôn jing anih Sư oei:

¹⁴ “Âu boih anih Inh mă pơdơh ling-lang hlŏng hloi. Inh gô oei tơ âu, Yua kơ inh wă thoi noh.

¹⁵ Inh gô ăn kơ Siôn đei tơmam sa rơkah rơkai. Ăn kơ lu bơngai dơnuh hin pơlei noh sa phĭ rơkah.

¹⁶ Inh gô pơhrŭk ăn tơdrong dŏng pơklaih kơ lu 'bok soi pơlei noh păng lu bơngai 'lơ̆ng rơgoh sư gô hơri 'nă hal.

¹⁷ Tơ noh inh gô ăn hơke Đawit bluh chăt; Inh đei hơmet lê̆ ŭnh kơđeng kơ bơngai mă inh đei tuh đak rơmă.

¹⁸ Inh gô pơhrŭk ăn tơdrong mơlâu kơ lu bơngai ayăt kơ sư. Gah môk pơtao tơ kơpal kơ̆l Sư gô rang hơdah.”