Horiso 126 - Sơ̆p Hlabơar Nơ̆r 'Bok Kei-Dei

Bơnê kơ Kră Yang chông anhăk lu bơngai brŏk đơ̆ng bơnă đe

¹ Kơplah Kră Yang chông lu bơngai bơnă brŏk tơ Siôn. Lu nhôn thoi bơngai tep apo.

² 'Bơ̆r lu nhôn 'bĕnh kơ nơ̆r hiĕk chơt. Hơpiĕt lu nhôn hơri 'nă hal. Lu đe teh đak khan: “Kră Yang đei tơgŭm lu sư tih tơpă.”

³ Kră Yang đei tơgŭm lu nhôn tih tơpă; lu nhôn chơt hiôk.

⁴ Ơ Kră Yang, apinh Ih chông bơnă lu nhôn brŏk. Thoi thong đak gah gơal đei đak ro dơ̆ng.

⁵ Bu rei adrĕch mă lĕch đak măt, Sư gô kĕch iŏk hăm hơri chơt hiôk.

⁶ Bu yak rah nhơ̆m rah chĕp adrĕch năm rei. Sĭt gô đei brŏk hăm hơri chơt hiôk tôi hơchô̆ 'ba sư.