Horiso 125 - Sơ̆p Hlabơar Nơ̆r 'Bok Kei-DeiKră Yang wei tăp dăr kơ lu kon pơlei Sư Tơdrong hơri lu bơngai tŏk tơ plei 'lơ̆ng rơgoh. 1 Lu bơngai gơnang kơ Kră Yang. Thoi kông Siôn ưh kơ đei pơpơ̆, mă-lei oei oei ling-lang. 2 Lu kông tăp dăr kơ Jêrusalem thoi yơ. Kră Yang wei tăp dăr kơ kon pơlei pơla Sư thoi noh mơ̆n. Đơ̆ng dang ei dĭng truh tơ ning-mônh khŏm khŏm hloi. 3 Yua kơ 'long jra lu bơngai kơnê̆ ưh kơ gơh pơgơ̆r lu bơngai 'lơ̆ng tơpăt, Wă kơ ti lu bơngai tơpăt huay kơ pơm tơ tơdrong kơnê̆. 4 Ơ Kră Yang, apinh Ih ăn tơdrong 'lơ̆ng kơ bơngai pơm 'lơ̆ng păng ăn kơ lu bơngai đei jơhngơ̆m tơpăt. 5 Mă gah lu bơngai hơlơ̆k kiơ̆ lu trong kơnê̆, Kră Yang gô puh lu sư hơdai lu bơngai pơm kơnê̆. Ăn tơdrong hiôk-hian kơ lu bơngai Isơrael! |
©Bahnar Bible Association. All rights reserved.