Horiso 121 - Sơ̆p Hlabơar Nơ̆r 'Bok Kei-Dei

Kră Yang bơwei kon pơlei pơla sư

¹ Inh ngơk măt lăng tơ kơpal kông tơdrong tơgŭm dŏng inh truh đơ̆ng yơ?

² Tơdrong dŏng tơgŭm inh lĕch đơ̆ng Kră Yang. Tơ'ngla mă pơjing plĕnh hăm teh.

³ Sư ưh kơ đei lê̆ jơ̆ng ih tơpling. Sư Tơ'ngla wei-lăng ih ưh kơ layơ tep.

⁴ Kră Yang wei-lăng Isơrael ưh kơ đei layơ 'bĭch păng kư̆m ưh kơ đei layơ tep.

⁵ Kră Yang Tơ'ngla wei-lăng ih. Kră Yang yơ̆p pơyơ̆l kơ ti 'ma ih.

⁶ Măt 'năr ưh kơ đei pơm kơ ih tŏ ôh kơ 'năr, măt khei kư̆m ưh kơ đei pơrăm ih kơmăng.

⁷ Kră Yang wei-lăng ih huay kơ răm, Sư gô bơwei tơdrong arih ih.

⁸ Kră Yang gô wei-lăng kơplah ih lĕch dah ih mơ̆t. Đơ̆ng dang ei dĭng truh tơ ning-mônh ling-lang.