Horiso 12 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei dŏng pơklaih đơ̆ng lu bơngai yoch kơnê̆

¹ Kră Yang; apinh Ih dŏng lu nhôn, Yua kơ lu bơngai 'lơ̆ng tơpăt ưh pă đei boih, Ưh pă đei lu tơpăt lăm kon bơngai.

² Lu sư pơma hơlĕnh pơdăr pơma tơduă lu sư, 'bơ̆r pơma pơ'brơh jơhngơ̆m 'bar trong nơ̆r pơma.

³ Apinh Kră Yang pơtôch đĭ lu bơngai pơma che bơle, Păng lu hơpiĕt mă pơma pơang;

⁴ Lu bơngai noh khan: “Yua kơ đơ̆ng hơpiĕt gô jei bơ̆n; 'Bơ̆r lu bơ̆n kơdih: Bu pơm yŏng bơ̆n?”

⁵ Yua kơ đe pơjuă lu bơngai răm-'băm păng lu dơnuh hin ôr krao, Kră Yang khan: “Dang ei Inh gô iung, Inh gô ăn kơ lu sư oei hiôk-hian kiơ̆ thoi lu sư krao apinh.”

⁶ Dôm nơ̆r Kră Yang jơ̆ nơ̆r rơgoh, Thoi jên hu rơgoh đe rơ̆ lăm ŭnh rơ̆ tơpơh wơ̆t.

⁷ Ơ Kră Yang, Ih boih wei-lăng lu bơngai răm-'băm. Wei-lăng lu sư đơ̆ng chăl dang ei dĭng truh tơ ning-mônh hloi.b

⁸ Na lu bơngai kơnê̆ gô năm tơ jơ̆p puăn pah dêh. Dah tơdrong kơnê̆ gô pơyom hloh kơ lăm kon bơngai.