Horiso 119 - Sơ̆p Hlabơar Nơ̆r 'Bok Kei-Dei

Bơngai bu bơwei kiơ̆ khôi juăt tơdrong juăt Kră Yang gô pŭn hiôk

¹ Pŭn dêh kơ lu đe bu mă pơm 'lơ̆ng đe huay kơ chrih lăm trong sư yak. Arih kiơ̆ khôi juăt Kră Yang.

² Pŭn dêh kơ bu wei răk dôm nơ̆r Sư tơtă. Păng đĭ jơhngơ̆m krao chă Sư.

³ Lu sư ưh kơ pơm glăi, Mă-lei arih kiơ̆ trong Kră Yang

⁴ Ih đei bơtho pơkă boih tơdrong juăt Ih Wă kơ lu nhôn rok kiơ̆.

⁵ Ô! Rŏ kơ trong inh gơh kơjăp; Wă kơ inh kĕ kiơ̆ khôi juăt Ih!

⁶ Inh ưh kơ đei mơlâu ôh. Kơplah inh lăng tơ lu nơ̆r Ih tơtă,

⁷ Inh iŏk jơhngơ̆m tơpăt hơri ư-ang kơ Ih. Kơplah inh hŏk iŏk tơdrong Ih sek tơpăt;

⁸ Inh gô wei răk khôi juăt Ih; Apinh ih 'nĕ achăng lê̆ inh.

⁹ Bơngai oei hơmuh hơmŏng pơm liơ wă kơ trong sư 'lơ̆ng rơgoh? Athei arih pơm kiơ̆ nơ̆r Kră Yang.

¹⁰ Inh chă Ih hăm đĭ jơhngơ̆m. 'Nĕ ăn kơ inh weh đơ̆ng nơ̆r Ih tơtă.

¹¹ Inh răk boih nơ̆r Ih lăm jơhngơ̆m inh Wă kơ inh huay kơ pơm yoch hăm Ih

¹² Ơ Kră Yang, inh hơri ư-ang kơ Ih; Apinh bơtho inh tơdrong juăt Ih.

¹³ 'Bơ̆r inh gô ră roi, dôm lu nơ̆r đơ̆ng 'bơ̆r Ih tơtă.

¹⁴ Inh hiôk chơt kiơ̆ nơ̆r Ih đei tơtă. Thoi chhôk 'nă kơ mơdrŏng tih.

¹⁵ Inh oei tơchĕng ling-lang kơ tơdrong juăt ih. Lăng kơchăm lăng tơ trong Ih.

¹⁶ Inh lăp dêh kơ tơdrong juăt Ih, ưh kơ hiơt kơ nơ̆r Ih

¹⁷ Pơm 'Lơ̆ng kơ inh đĭch đam Ih, wă kơ inh gơh arih; Inh gô wei răk nơ̆r Ih.

¹⁸ Pơih măt inh, wă kơ inh gơh 'bôh dôm tơdrong hlĭch chrơp lăm khôi juăt Ih.

¹⁹ Inh jơ̆ minh 'nu bơngai tơmoi oei kơpal teh. Apinh 'nĕ ôn kơ inh dôm nơ̆r Ih tơtă.

²⁰ Bơhngol inh hơkĕ hrŏ chang hơpơi ling-lang wă kơ băt dôm tơdrong juăt Ih.

²¹ Ih chrih hil kơ lu bơngai pơang, jơ̆ lu bơngai trŏ kơ hiap pơtê̆. Lu bơngai mă weh ataih đơ̆ng Ih tơtă.

²² Apinh iŏk lê̆ đơ̆ng tơdrong inh mơlâu. Păng tơdrong đe areh. Na inh răk dôm nơ̆r Ih tơtă.

²³ Yŏng pơgơ̆r oei pơđâu chă wă pơm kơ inh; Mă-lei đĭch đam Ih gô tơchĕng kơ khôi juăt Ih.

²⁴ Dôm nơ̆r Ih tơpăt, jơ̆ nơ̆r mă inh lăp đon, Lu nơ̆r noh boih tơ'bôh tơbăt ăn kơ inh.

²⁵ Bơhngol inh klep lăm 'mui teh. Tơiung pơrih inh dơ̆ng. Kiơ̆ kơ nơ̆r Ih.

²⁶ Inh đei roi boih trong inh kơ Ih. Na Ih đei tơl tơwih kơ inh; apinh Ih bơtho inh dôm tơdrong juăt Ih.

²⁷ Ăn kơ inh gơh hlôh băt tơdrong Ih bơtho tơtă. Na inh gô tơchĕng ling-lang dôm tơdrong jang hlĭch chrơp Ih.

²⁸ Inh lĕch đak măt nhơ̆m hmoi, yua kơ sơ'ngon. Apinh Ih ăn kơ inh đei jơhngơ̆m pran kiơ̆ kơ nơ̆r Ih.

²⁹ Apinh wei inh weh ataih đơ̆ng trong glăi. Apinh Ih mơnat bơtho ăn kơ inh băt kơ khôi juăt Ih.

³⁰ Inh đei rơih iŏk boih trong tơ anăp; 'Măn nơ̆r Ih tơtă 'bơ̆t anăp inh.

³¹ Ơ Kră Yang ơi! Inh rôp kơjăp nơ̆r Ih tơbăt; Apinh Ih 'nĕ ăn kơ inh mơlâu.

³² Inh gô kơdâu kiơ̆ trong Ih tơtă. Dah Ih pơih jơhngơ̆m inh să,

³³ Ơ Kră Yang, apinh bơtho tơ'bôh kơ inh kiơ̆ trong Ih tơtă. Na inh gô wei răk dĭng truh tơ năr tôch.

³⁴ Apinh Ih ăn kơ inh gơh hơgei, Na inh gô wei răk tơdrong juăt Ih. Păng chu yom hăm đĭ jơhngơ̆m.

³⁵ Apinh Ih ăn kơ inh yak kiơ̆ nơ̆r Ih tơtă; Yua kơ inh chơt hiôk lăm trong noh.

³⁶ Apinh ăn kơ jơhngơ̆m inh tơchĕng kơ tơdrong juăt Ih. 'Nĕ ăn kơ inh tơchĕng kơ tơdrong lơi kơdih akâu.

³⁷ Apinh Ih pơdăr măt inh wă kơ huay lăng lu tơdrong ưh kơ yua. Ăn kơ inh gơh arih kiơ̆ lăm lu trong Ih.

³⁸ Apinh Ih pơkeh nơ̆r pơkăm hăm lu đĭch đam Ih. Lu bơngai mă hli yom kơ Ih.

³⁹ Apinh Ih iŏk lê̆ tơdrong đe pơm kơ inh mơlâu mă inh hli tơtơ̆, yua kơ nơ̆r tơtă đơ̆ng Ih 'lơ̆ng tơpăt.

⁴⁰ Âu, inh hơpơi wă dôm lu nơ̆r Ih bơtho tơtă. Apinh ăn kơ inh gơh arih kiơ̆ lăm trong tơdrong tơpăt Ih.

⁴¹ Ơ Kră Yang, ăn kơ tơdrong 'mêm Ih truh tơ inh. Tơdrong Ih dŏng pơklaih kiơ̆ kơ nơ̆r Ih đei pơkăm.

⁴² Lei inh gơh tơl tơwih kơ lu bơngai pơjăm inh. Yua kơ inh gơnang kơ nơ̆r Ih.

⁴³ Apinh Ih 'nĕ kơ iŏk lê̆ dôm nơ̆r tơpăt đơ̆ng 'bơ̆r inh, Yua kơ inh gơnang hơmĕng kơ nơ̆r tơtă Ih.

⁴⁴ Inh gô wei răk tơdrong juăt Ih dĭng truh tơ ning-mônh ling-lang hlŏng hloi.

⁴⁵ Inh gô yak nơnăm rơngei, yua kơ inh kiơ̆ chơchă tơdrong Ih bơtho tơtă.

⁴⁶ Inh gô ră roi tơdrong Ih tơtă 'bơ̆t anăp lu pơtao. Ưh kơ đei mơlâu.

⁴⁷ Inh chơt hiôk kơ nơ̆r Ih tơtă tơdrong mă inh 'mêm.

⁴⁸ Inh gô yơ̆r ti gah nơ̆r tơtă Ih, mă inh 'mêm păng tơchĕng kơ lu tơdrong juăt Ih.

⁴⁹ Apinh Ih 'blŏk kơ nơ̆r Ih đei pơkă hăm lu đĭch đam Ih. Đơ̆ng tơdrong 'nâu Ih ăn kơ inh đei hơmĕng.

⁵⁰ Nơ̆r Ih pơkă wă wei tơdrong arih inh. 'Nâu boih tơdrong mă pơlung inh lăm năr pơmat-tat.

⁵¹ Lu bơngai pơang, blei hiap inh lơ dêh. Mă-lei inh ưh kơ achăng lê̆ khôi juăt Ih.

⁵² Ơ Kră Yang, inh 'blŏk kơ nơ̆r Ih tơtă đơ̆ng sơ̆. Nơ̆r noh pơlung inh.

⁵³ Inh blĕk tơtŏ 'bĕnh kơ jơhngơ̆m inh. 'Bôh lu bơngai pơm kơnê̆ achăng lê̆ khôi juăt Ih,

⁵⁴ Lu tơdrong juăt Ih jing 'bai hơri inh. Kơplah inh oei lăm hnam tơmoi.

⁵⁵ Ơ Kră Yang, kơmăng inh 'blŏk kơ anăn Ih; Kŭm wei răk khôi juăt Ih.

⁵⁶ Inh đei tơdrong âu. Inh đei wei răk dôm nơ̆r Ih bơtho tơtă.

⁵⁷ Kră Yang jing mŭk tơmam inh boih. Inh đei pơkă wă wei răk nơ̆r Ih bơtho tơtă.

⁵⁸ Đĭ jơhngơ̆m inh krao apinh Kră Yang mơnat, Apinh Ih mơnat ăn kơ inh kiơ̆ thoi nơ̆r Ih pơkă.

⁵⁹ Inh tơchĕng kơ trong inh, inh gơwĕch jơ̆ng inh gah tơdrong juăt Ih.

⁶⁰ Inh hăt hot hloi ưh kơ gô ôh. Wă wei răk dôm nơ̆r Ih tơtă.

⁶¹ Mă tơlei lu bơngai pơm kơnê̆ dăng tăp kơ inh, Mă-lei inh ưh kơ hiơt kơ khôi juăt Ih.

⁶² Inh gô iung tŏk-bŏk măng wă bơnê kơ Ih. Yua kơ tơdrong pơkă tơpăt Ih.

⁶³ Inh jing buăl kơ lu bơngai băt hli yom kơ Ih, Păng lu bơngai mă bơwei dôm tơdrong Ih đei bơtho pơkă.

⁶⁴ Ơ Kră Yang, teh âu 'bĕnh kơ tơdrong 'mêm Ih, Apinh Ih bơtho pơhrăm ăn kơ inh tơdrong juăt Ih.

⁶⁵ Ơ Kră Yang, Ih pơm 'lơ̆ng kơ lu đĭch đam Ih. Kiơ̆ thoi nơ̆r Ih khan.

⁶⁶ Apinh Ih bơtho inh hlôh wao. Wă kơ inh pơm trŏ. Yua kơ inh lui kơ nơ̆r Ih tơtă.

⁶⁷ Adrol kơ đei tơdrong pơmat-tat inh đĭ jrok boih; Mă-lei dang ei inh wei răk nơ̆r Ih.

⁶⁸ Ih 'lơ̆ng juăt kơ pơm 'lơ̆ng; apinh Ih bơtho inh tơdrong juăt Ih.

⁶⁹ Mă lu bơngai pơang đei boih nơ̆r pơma kơnê̆ hơlĕnh kơ inh. Inh gô wei răk dôm nơ̆r Ih bơtho tơtă hăm đĭ jơhngơ̆m.

⁷⁰ Jơhngơ̆m lu sư hơ'bơ̆l thoi rơmă đĭ pă mơn. Mă-lei inh hiôk lăm khôi juăt Ih.

⁷¹ Inh đei tơdrong pơmat, trŏ 'lơ̆ng tơpă. Wă kơ inh hŏk iŏk kiơ̆ khôi juăt Ih.

⁷² Khôi juăt đơ̆ng 'bơ̆r Ih pơma jing 'lơ̆ng kơ inh. Hloh kơ đei rơbâu tơpei hu maih.

⁷³ Tơpang ti Ih pơjing păng man inh; Ăn kơ inh 'ngok hlôh wao, wă kơ inh hŏk kiơ̆ nơ̆r tơtă Ih.

⁷⁴ Lu bơngai hli yom kơ Kră Yang 'bôh inh lu sư gô chơt hiôk. Yua kơ inh hơmĕng kơ nơ̆r Ih.

⁷⁵ Ơ Kră Yang, inh băt tơdrong Ih sek tơlang tơpăt. Noh đơ̆ng tơdrong Ih tơpăt. Na Ih pơm kơ inh pơmat-tat.

⁷⁶ Ăn tơdrong 'mêm Ih pơlung inh. 'Blep thoi nơ̆r Ih đei pơkă kơ lu đĭch đam Ih.

⁷⁷ Apinh tơdrong 'mêm mơnat Ih truh tơ inh, wă kơ inh gơh arih, Yua kơ inh hiôk lăm khôi juăt Ih.

⁷⁸ Thŭ lu pơang mơlâu, Yua kơ lu sư yua tơdrong hơlĕnh pơdăr wă pơrăm inh; Mă-lei inh gô tơchĕng lu nơ̆r Ih bơtho khan.

⁷⁹ Apinh Ih ăn kơ lu bơngai hli yom kơ Ih brŏk hơlơ̆k tơ inh, wă kơ lu sư băt kơ tơdrong juăt Ih.

⁸⁰ Apinh Ih ăn kơ jơhngơ̆m inh gơh 'lơ̆ng tơpăt lăm Khôi juăt Ih; wă kơ inh huay kơ mơlâu.

⁸¹ Bơhngol inh rơdu rơmơ̆n chang gô tơdrong dŏng pơklaih đơ̆ng Ih. Mă-lei Inh hơmĕng kơ nơ̆r Ih.

⁸² Măt inh rơmơ̆n chang gô nơ̆r Ih pơkă; Inh khan: “Dang yơ Ih pơlung inh?”

⁸³ Yua kơ inh jing thoi get akar 'nhek 'nhoi. Mă-lei inh ưh kơ hiơt kơ khôi juăt Ih.

⁸⁴ Đĭch đam Ih oei gô dĭng dang yơ dơ̆ng. Layơ Ih wă sek tơlang kơ bơngai pơm kơnê̆ kơ inh?

⁸⁵ Lu bơngai pơang sir boih sơlŭng wă pơrăm inh? Noh lu bơngai ưh kơ pơm kiơ̆ khôi juăt Ih.

⁸⁶ Dôm nơ̆r Ih tơtă trŏ sĭt tơpă apinh Ih tơgŭm inh. Bơngai lăm teh đak yua tơdrong hơlĕnh wă pơrăm inh,

⁸⁷ Mă lu sư wă pơlôch inh đơ̆ng kơpal teh; Mă-lei inh ưh kơ đei lê̆ dôm nơ̆r Ih bơtho pơkă.

⁸⁸ Apinh Ih ăn kơ inh gơh arih Kiơ̆ kơ tơdrong 'mêm Ih, Na inh gô wei răk nơ̆r Ih bơtho khan.

⁸⁹ Ơ Kră Yang, nơ̆r Ih oei kơjăp ling-lang tơ kơpal plĕnh;

⁹⁰ Tơdrong sĭt 'lơ̆ng tơpăt Ih oei đei đơ̆ng jơhnơr âu truh tơ jơhnơr nai. Ih pơjing boih teh, teh oei kơjăp.

⁹¹ Kiơ̆ kơ nơ̆r tơtă Ih, dôm tơdrong oei kơjăp truh năr âu; Yua kơ đĭ-đăng đĭch đam Ih ngăl.

⁹² Tơdah khôi juăt Ih ưh kơ pơm kơ inh hiôk. Lei inh lôch hiong boih, lăm năr inh pơmat-tat.

⁹³ Inh ưh kơ đei layơ hiơt kơ nơ̆r Ih bơtho tơtă. Yua kơ đơ̆ng lu tơdrong noh na Ih ăn kơ inh đei arih.

⁹⁴ Inh gah Ih boih, apinh Ih dŏng pơklaih inh; inh chă dôm nơ̆r Ih bơtho tơtă.

⁹⁵ Lu bơngai kơnê̆ nŏng kơ chă wă pơlôch inh, Mă-lei inh adrin kiơ̆ kơ nơ̆r Ih bơtho khan.

⁹⁶ Inh 'bôh boih dôm tơdrong tơmam mă 'lơ̆ng tôch ngăl. Mă-lei tơdrong juăt Ih ưh kơ tôch.

⁹⁷ Inh 'mêm kơ khôi juăt Ih dêh! Prăt năr inh tơchĕng kơ khôi juăt noh.

⁹⁸ Dôm nơ̆r Ih tơtă, pơm kơ inh hơgei hloh kơ lu ayăt kơ inh. Yua kơ dôm nơ̆r noh oei hơdai inh ling-lang.

⁹⁹ Inh đei đon hơgei hloh kơ lu bơngai bơtho inh. Yua kơ inh tơchĕng lu tơdrong đêl Ih bơtho khan.

¹⁰⁰ Inh hlôh wao hloh kơ lu kră. Yua kơ inh wei răk dôm nơ̆r Ih tơtă.

¹⁰¹ Inh gơ̆t jơ̆ng inh kuă ăn năm trong glăi. Wă kơ inh wei răk nơ̆r Ih.

¹⁰² Inh ưh kơ đei achăng lê̆ nơ̆r tơtă Ih. Yua kơ Ih kơdih đei bơtho tơ'bôh kơ inh.

¹⁰³ Nơ̆r Kră Yang pơm kơ hơlŏng inh 'ngam dêh. 'Ngam hloh kơ đak sut lăm 'bơ̆r inh.

¹⁰⁴ Đơ̆ng nơ̆r Ih bơtho khan na inh hlôh wao, thoi noh na inh areh kơ trong hơlĕnh.

¹⁰⁵ Nơ̆r Ih jing ŭnh kơđeng kơ jơ̆ng inh. Nhơk pơchrang ăn kơ trong inh.

¹⁰⁶ Inh đei pơkăm păng wei răk nơ̆r pơkăm. Inh gô kiơ̆ nơ̆r Ih tơtă tơpăt,

¹⁰⁷ Ơ Kră Yang! Inh pơmat-tat dêh; Apinh Ih pơrih inh dơ̆ng kiơ̆ thoi nơ̆r Ih.

¹⁰⁸ Ơ Kră Yang! Apinh Ih iŏk tơdrong bơnê pơyơ̆r kơ Ih đơ̆ng 'bơ̆r inh. Păng bơtho inh tơdrong juăt Ih.

¹⁰⁹ Tơdrong arih inh ngăl đei hli hơmơt, Mă-lei inh ưh kơ hiơt kơ khôi juăt Ih.

¹¹⁰ Lu bơngai pơm kơnê̆ hơ'năk hơđong wă pơrăm inh; Mă-lei inh ưh kơ achăng lê̆ nơ̆r Ih bơtho khan.

¹¹¹ Nơ̆r Ih bơtho khan jing mŭk tơmam inh ling-lang. Yua kơ noh jơhngơ̆m inh chơt hiôk,

¹¹² Jơhngơ̆m inh rơih boih pơm kiơ̆ khôi juăt Ih. Ling-lang dĭng truh tơ tôch.

¹¹³ Inh areh kơ lu bơngai đei jơhngơ̆m 'bar pah. Mă-lei 'mêm kơ khôi juăt Ih.

¹¹⁴ Ih boih anih inh kơ'nơp păng khêl pĕng inh; Inh hơmĕng kơ nơ̆r Ih.

¹¹⁵ Ơ lu bơngai pơm kơnê̆, weh bĕ đơ̆ng inh. Wă kơ inh wei răk nơ̆r Kră Yang 'Bok Kei-Dei inh tơtă.

¹¹⁶ Apinh Ih tơgŭm tơiung inh kiơ̆ thoi Ih pơkă wă kơ inh gơh arih; 'Nĕ ăn kơ inh mơlâu kơ tơdrong inh chang hơmĕng,

¹¹⁷ Apinh Ih dŏng tơgŭm inh, na inh hơđơ̆ng. Wă kơ inh pơm kiơ̆ kơ khôi juăt Ih ling-lang.

¹¹⁸ Ih sơngah đĭ kơ lu bơngai weh đơ̆ng khôi juăt Ih; Tơdrong lu sư hơlĕnh jing tơdrong ưh kơ đei.

¹¹⁹ Ih lăng lu bơngai kơnê̆ lăm teh đak thoi hla đuih; Yua kơ noh na inh 'mêm kơ nơ̆r Ih bơtho khan.

¹²⁰ Akâu inh pơpơ̆ yua kơ hli kơ Ih. Kŭm hli kơ tơdrong Ih sek tơlang.

¹²¹ Inh pơm boih tơdrong tơpăt păng tơdrong trŏ, 'Nĕ jao inh kơ lu bơngai pơjuă pơđep inh.

¹²² Apinh Ih wei-lăng lu đĭch đam Ih wă kơ đei pŭn hiôk; 'Nĕ ăn kơ lu bơngai pơang pơjuă pơđep inh.

¹²³ Măt inh hrŏ yua kơ chang gô Ih dŏng pơklaih. Păng nơ̆r Ih pơkă tơpăt.

¹²⁴ Apinh Ih pơm hăm lu đĭch đam kiơ̆ kơ tơdrong 'mêm Ih, Păng bơtho inh lu khôi juăt Ih.

¹²⁵ Inh đĭch đam Ih, Apinh Ih ăn kơ inh tơdrong hlôh wao. Wă kơ inh gơh băt hlôh kơ nơ̆r Ih bơtho khan.

¹²⁶ Truh boih kơ jơ Kră Yang wă pơm. Yua kơ đei bơngai pơm pơhloh kơ tơdrong juăt Ih

¹²⁷ Yua kơ inh 'mêm kơ nơ̆r Ih tơtă. Hloh kơ maih, kư̆m hloh loi kơ maih rơgoh.

¹²⁸ Yua kơ thoi noh, inh lăng đĭ-đăng nơ̆r Ih bơtho tơtă trŏ ngăl. Inh areh kơ trong tơdrong hơlĕnh.

¹²⁹ Nơ̆r Ih bơtho khan jing hlĭch chrơp tơpă. Thoi noh inh wei răk lu sư.

¹³⁰ Tơdrong bơtho tơblang nơ̆r Ih pơchrang ăn hơdah. Sư ăn tơdrong hlôh wao kơ lu bơngai tơpăt.

¹³¹ Inh ha 'bơ̆r rơhing. Yua kơ inh chang hơpơi dêh lu nơ̆r Ih tơtă.

¹³² Apinh Ih hue lăng păng mơnat kơ inh, Kŭm thoi Ih ngăl juăt 'mêm kơ lu bơngai bu mă 'mêm kơ anăn Ih.

¹³³ Apinh Ih ăn kơ rim yak inh kơjăp lăm nơ̆r Ih. 'Nĕ ăn tơdrong kơnê̆ kiơ̆ pơgơ̆r inh.

¹³⁴ Apinh Ih huai iŏk inh đơ̆ng bơngai pơjuă pơđep, wă kơ inh wei răk kiơ̆ nơ̆r Ih bơtho tơtă.

¹³⁵ Apinh Ih pơchrang bĕ muh măt Ih kơ lu đĭch đam Ih, Păng bơtho inh tơdrong juăt Ih.

¹³⁶ Đak măt inh lĕch ro nhen thoi đak glung. Yua kơ đe kuă kơ wei răk khôi juăt Ih.

¹³⁷ Ơ Kră Yang, Ih 'lơ̆ng tơpăt, Tơdrong Ih sek tơlang tơpăt.

¹³⁸ Ih tơtă boih tơdrong ih bơtho 'lơ̆ng tơpăt, Trŏ kơ lui gơnang tơpă.

¹³⁹ Tơdrong inh tơnăp soh chhông lăm jơhngơ̆m inh. Yua kơ lu bơngai ayăt kơ inh hiơt boih kơ nơ̆r Ih.

¹⁴⁰ Nơ̆r Ih pơma 'lơ̆ng rơgoh tơpă. Na lu đĭch đam Ih 'mêm kơ nơ̆r noh,

¹⁴¹ Mă inh bơngai iĕ, đe pơjăm pơjuă, Mă-lei ưh kơ đei layơ hiơt kơ nơ̆r Ih bơtho tơtă.

¹⁴² Tơdrong tơpăt Ih jơ̆ tơdrong tơpăt ling-lang hlŏng hloi. Khôi juăt Ih sĭt tơpă.

¹⁴³ Tơdrong pơmat-tat păng tơdrong ơh sơ'ngon truh tơ inh. Mă-lei inh oei hiôk kơ nơ̆r Ih tơtă.

¹⁴⁴ Nơ̆r Ih bơtho khan jơ̆ tơpăt ling-lang hlŏng hloi. Ăn kơ inh hlôh wao, wă kơ inh gơh arih.

¹⁴⁵ Ơ Kră Yang inh krao chă Ih hăm đĭ jơhngơ̆m, Apinh Ih tơl tơwih kơ inh. Inh gô wei răk khôi juăt Ih.

¹⁴⁶ Inh krao apinh Ih. Dŏng pơklaih inh bĕ; Na inh gô wei răk nơ̆r Ih bơtho tơtă.

¹⁴⁷ Inh iung đơ̆ng hrôih drôih krao apinh, Inh chang hơmĕng kơ nơ̆r Ih.

¹⁴⁸ Măt inh kral prăt măng ưh kơ tep, wă kơ tơchĕng kơ nơ̆r Ih pơkă.

¹⁴⁹ Ơ Kră Yang, kiơ̆ kơ tơdrong 'mêm Ih, apinh Ih mơ̆ng nơ̆r inh apinh, Apinh wei tơdrong arih inh kiơ̆ kơ tơdrong juăt Ih.

¹⁵⁰ Lu bơngai chă pơm tơdrong kơnê̆ truh jê̆ boih. Mă-lei lu sư ataih đơ̆ng khôi juăt Ih.

¹⁵¹ Ơ Kră Yang Ih oei jê̆; păng dôm lu nơ̆r Ih tơtă sĭt tơpă.

¹⁵² Kư̆ kiơ̆ kơ nơ̆r Ih bơtho, inh băt boih đơ̆ng sơ̆: Ih pơjing nơ̆r tơtă noh oei oei ling-lang.

¹⁵³ Apinh Ih lăng bĕ tơdrong inh pŭ pơmat păng dŏng pơklaih inh; Na inh ưh kơ hiơt ôh khôi juăt ih.

¹⁵⁴ Apinh Ih dŏng inh păng huai iŏk inh, Apinh wei tơdrong arih inh kiơ̆ kơ nơ̆r Ih pơkă.

¹⁵⁵ Tơdrong dŏng pơklaih ataih dơ̆ng lu bơngai pơm kơnê̆. Yua kơ lu sư ưh kơ đei chơchă lu tơdrong juăt Ih.

¹⁵⁶ Ơ Kră Yang, tơdrong 'mêm mơnat Ih tih tơpă. Apinh wei tơdrong arih inh kiơ̆ khôi juăt Ih.

¹⁵⁷ Lu bơngai ayăt areh păng pơjuă pơđep inh lơ tơpă; Mă-lei inh ưh kơ đei achăng lê̆ nơ̆r Ih bơtho tơtă.

¹⁵⁸ Inh 'bôh lu bơngai hơlĕnh pơdăr, lăng krưp areh dêh kơ lu sư; Yua kơ lu sư ưh kơ wei răk nơ̆r Ih.

¹⁵⁹ Apinh Ih lăng inh 'mêm kơ nơ̆r Ih bơtho khan dang yơ! Ơ Kră Yang, apinh wei tơdrong arih inh kiơ̆ thoi tơdrong 'mêm Ih.

¹⁶⁰ Đĭ dôm nơ̆r Ih pơma jơ̆ sĭt tơpă. Dôm nơ̆r tơtă 'lơ̆ng tơpăt Ih oei oei ling-lang,

¹⁶¹ Lu yŏng pơgơ̆r rôp pơmat inh tơdrong ưh kơ đei. Mă-lei inh hli yom kơ nơ̆r Ih.

¹⁶² Inh hiôk chơt kơ nơ̆r Ih pơkă thoi lu đe blah iŏk đei tơmam lơ.

¹⁶³ Inh areh păng krưp dêh, kơ tơdrong hơlĕnh pơdăr. Mă-lei inh 'mêm kơ khôi juăt Ih.

¹⁶⁴ Rim năr inh kơkuh bơnê kơ Ih tơpơh wơ̆t. Kơ nơ̆r tơtă 'lơ̆ng tơpăt Ih.

¹⁶⁵ Bu mă 'mêm kơ khôi juăt Ih đei tơdrong hiôk-hian tih. Ưh kơ đei kiơ mă gơh pơm kơ lu sư pơ̆k huŏng.

¹⁶⁶ Ơ Kră Yang, inh chang hơmĕng kơ tơdrong dŏng pơklaih đơ̆ng Ih, Păng pơm kiơ̆ kơ nơ̆r Ih tơtă.

¹⁶⁷ Inh wei răk boih nơ̆r Ih bơtho tơtă. Inh 'mêm kơ nơ̆r tơtă noh dêh tơpă.

¹⁶⁸ Inh wei răk nơ̆r Ih bơtho khan păng nơ̆r Ih tơtă. Yua kơ trong inh tă kơ 'bơ̆t anăp Ih ngăl.

¹⁶⁹ Ơ Kră Yang, ăn kơ nơ̆r inh ôr krao truh tơ Ih. Ăn kơ inh hlôh wao, kiơ̆ kơ nơ̆r Ih.

¹⁷⁰ Ăn nơ̆r inh krao ôr truh tơ Ih. Apinh dŏng pơklaih inh kiơ̆ kơ nơ̆r Ih pơkă.

¹⁷¹ Ăn kơ 'bơ̆r inh lĕch dôm nơ̆r bơnê kơ Ih. Yua kơ Ih bơtho boih inh dôm tơdrong juăt Ih.

¹⁷² Ăn kơ hơpiĕt inh hơri kơ nơ̆r Ih. Yua kơ đĭ nơ̆r Ih tơtă tơpăt ngăl.

¹⁷³ Ăn kơ ti Ih dŏng tơgŭm inh hloi; Yua kơ inh rơih iŏk nơ̆r Ih bơtho tơtă.

¹⁷⁴ Ơ Kră Yang, inh hơpơi chang tơdrong dŏng pơklaih đơ̆ng Ih. Khôi juăt Ih mă inh hiôk tơpă.

¹⁷⁵ Ăn kơ bơhngol inh arih. Wă kơ hơri bơnê kơ Ih. Ăn kơ tơdrong juăt Ih tơgŭm inh.

¹⁷⁶ Inh wơ̆l jrok thoi triu hiong; apinh chơchă inh đĭch đam Ih. Yua kơ inh ưh kơ hiơt nơ̆r Ih tơtă.