Horiso 118 - Sơ̆p Hlabơar Nơ̆r 'Bok Kei-Dei

Nơ̆r Krao khan bơnê kơ Kră Yang yua kơ kĕ jei

¹ Bơnê bĕ kơ Kră Yang, Yua kơ Sư 'lơ̆ng; Tơdrong 'mêm Sư oei oei ling-lang.

² Ăn kơ Isơrael khan bĕ: “Tơdrong 'mêm Sư oei oei ling-lang!”

³ Ăn kơ hnam Arôn khan bĕ: “Tơdrong 'mêm Sư oei oei ling-lang!”

⁴ Ăn kơ lu bơngai hli yom kơ Kră Yang khan bĕ: “Tơdrong 'mêm Sư oei oei ling-lang!”

⁵ Lăm năr pơmat-tat inh krao apinh Kră Yang; Kră Yang tơl tơwih nơ̆r inh Ăn kơ inh rơngei.a

⁶ Kră Yang oei hơdai inh, inh ưh kơ đei hli kiơ; Kon bơngai gơh pơm kiơ kơ inh?

⁷ Kră Yang oei hơdai inh; dŏng tơgŭm inh. Inh 'bôh lu bơngai areh kơ inh jei inh.

⁸ Gơnang kơ Kră Yang đĕch hloh kơ gơnang kơ kon bơngai.

⁹ Gơnang kơ Kră Yang đĕch hloh kơ gơnang kơ lu pơtao mơng.

¹⁰ Lu dêh char wang tăp kơ inh; Lăm anăn Kră Yang inh pơrămb đĭ lu sư.

¹¹ Lu sư wang tăp dăr kơ inh puăn pah. Hăm anăn Kră Yang inh pơrăm đĭ lu sư.

¹² Lu sư wang inh lơ thoi sut; lu sư gô lôch păt thoi ŭnh sa bơmreh. Hăm anăn Kră Yang pơrăm đĭ lu sư.

¹³ Đei bơngai tơlơ̆ inh kơtang wă kơ inh pơ̆k; Mă-lei Kră Yang tơgŭm inh,

¹⁴ Kră Yang boih ăn kơ jơhngơ̆m inh pran păng nơ̆r inh hơri; Sư Tơ'ngla dŏng pơklaih inh.

¹⁵ Đei lăm kơđông lu bơngai 'lơ̆ng tơpăt, đei nơ̆r hơri chơt hiôk kĕ jei jơnei tih; “Ti 'ma Kră Yang pơm kĕ jei jơnei tih.

¹⁶ Ti 'ma Kră Yang yơ̆r kơjung, Ti 'ma Kră Yang pơm kĕ jei jơnei tih.”

¹⁷ Inh pă đei lôch boih, mă-lei gơh arih. Păng gô ră roi dôm tơdrong jang Kră Yang đei pơm boih.

¹⁸ Kră Yang phak bơtho inh dêh tơpă. Mă-lei huay ăn kơ inh truh kơ lôch.

¹⁹ Pơih ăn bĕ kơ inh 'măng jang tơdrong tơpăt, Inh gô mơ̆t bơnê ư-ang kơ Kră Yang.

²⁰ Âu jơ̆ 'măng jang Kră Yang; Lu bơngai tơpăt gô mơ̆t tơ noh.

²¹ Inh bơnê kơ Ih, yua kơ Ih tơl tơwih nơ̆r inh apinh. Ih boih Tơ'ngla dŏng pơklaih inh.

²² Tơmo mă thơ̆ mam hnam hŭt lê̆, jing tơmo man 'bơ̆t mum hnam

²³ 'Nâu tơdrong jang Kră Yang đei pơm, Minh tơdrong hlĭch chrơp 'bơ̆t anăp lu bơ̆n.

²⁴ Âu boih năr Kră Yang đei pơm pơjing, Bĕ bơ̆n chơt hiôk 'nă hal lăm năr noh.

²⁵ Ơ Kră Yang! Dŏng pơklaih lu nhôn bĕ, ơ Kră Yang! Apinh Ih ăn kơ lu nhôn kĕ jei.

²⁶ Pŭn hiôk dêh kơ bu, mă năm hăm anăn Kră Yang. Đơ̆ng hnam Kră Yang. Nhôn bơnê ư-ang kơ Ih.

²⁷ Kră Yang jơ̆ 'Bok Kei-Dei, Sư boih pơchrang ăn kơ lu nhôn hơdah. Chô̆ bĕ tơmam soi pơyơ̆r hăm tơlei bră tơ lu chơnglơ̆ng hơke chơnang soi.

²⁸ Ih boih Kră Yang 'Bok Kei-Dei inh, inh gô bơnê kơ Ih; Ih boih Kră Yang 'Bok Kei-Dei inh, inh gô yom kơkuh kơ Ih.

²⁹ Bơnê ư-ang kơ Kră Yang bĕ, yua kơ Sư 'lơ̆ng rŏ; Tơdrong 'mêm Sư oei oei ling-lang.