Horiso 114 - Sơ̆p Hlabơar Nơ̆r 'Bok Kei-Dei

Tơdrong Kră Yang 'Bok Kei-Dei pơklaih lu bơngai Isơrael đơ̆ng char Êyiptơ

¹ Kơplah Isơrael lĕch đơ̆ng char Êyiptơ, hnam Jakôp đơ̆ng khŭl pơma nơ̆r hlĭch.

² Juđa jing hnam 'lơ̆ng rơgoh Sư. Păng Isơrael jing khŭl Sư pơgơ̆r.

³ Đak dơsĭ 'bôh thoi noh, na kơdâu ôn; Đak Krong Jôrđăn ro hơlơ̆k tơ rŏng,

⁴ Kông tih pơplŏng thoi triu tơno, Kông groi pơplŏng thoi lu triu kon.

⁵ Ơ đak dơsĭ yua kơ kiơ ih kơdâu ôn? Ơ đak Krong Jôrđăn, yua kơ kiơ mah ro hơlơ̆k tơ rŏng?

⁶ Ơ kông tih, yua kơ kiơ ih, mah pơplŏng thoi triu tơno? Ơ kông groi yua kơ kiơ ih mah pơplŏng thoi triu kon?

⁷ Ơ teh pơpơ̆ tơdrŏ bĕ, 'bơ̆t anăp Kră Yang. 'Bơ̆t anăp Kră Yang 'Bok Kei-Dei Jakôp.

⁸ Sư boih ăn tơmo kŭk jing đak dơnâu. Tơplih tơmo hơrăk jing tu đak.