Horiso 111 - Sơ̆p Hlabơar Nơ̆r 'Bok Kei-Dei

Tơdrong bơnê kơ Kră Yang yua kơ tơdrong 'lơ̆ng Sư. 'Blŏk kơ nơ̆r pơgơ̆p Sư ling-lang

¹ Halêluya! Inh hơri bơnê kơ Kră Yang hăm đĭ jơhngơ̆m. Lăm năr lu bơngai 'lơ̆ng tơpăt akŭm tih.

² Dôm tơdrong jang Kră Yang tih tơpă; Đĭ-đăng bơngai lăp kơ tơdrong jang noh; tă tơchĕng wă kơ băt.

³ Tơdrong jang Kră Yang đe ư-ang păng krưp rŏ. Tơdrong 'lơ̆ng tơpăt Sư oei oei ling-lang.

⁴ Sư tơ'blŏk tơdrong jang hlĭch chrơp Sư đei pơm boih. Kră Yang 'mêm păng mơnat.

⁵ Sư ăn tơmam sŏng sa kơ lu đe bu mă hli yom kơ Sư. Păng 'blŏk ling-lang kơ dôm nơ̆r Sư pơgơ̆p.

⁶ Sư đei tơ'bôh boih kơ kon pơlei Sư, tơdrong jang mơsêh pran kơtang Sư. Jao ăn kơ lu sư teh jang sa tơ dêh char đe.

⁷ Tơdrong jang đơ̆ng ti Sư sĭt tơpă păng tơpăt; Lu nơ̆r Sư bơtho pơkă trŏ gơnang tơpă.

⁸ Kơjăp ling-lang, wă pơm kiơ̆ lăm tơdrong sĭt tơpă păng tơpăt.

⁹ Sư ăn tơdrong dŏng pơklaih kơ kon pơlei pơla Sư. Nơ̆r pơgơ̆p Sư oei oei ling-lang, Anăn Sư 'lơ̆ng rơgoh păng trŏ kơ hli yom.

¹⁰ Tơdrong hli yom kơ Kră Yang jing tơm tơdrong hơgei, Bơngai bu mă wei răk nơ̆r Sư bơtho pơkă gô đei đon hlôh wao. Tơdrong hơri bơnê ư-ang kơ Sư oei oei ling-lang.