Horiso 110 - Sơ̆p Hlabơar Nơ̆r 'Bok Kei-Dei

Kră Yang ăn kơ pơtao gơh pơgơ̆r

¹ Kră Yang khan kơ yŏng inh thoi âu: “Oei gah 'ma kơ Inh bĕ! Dĭng truh tơ Inh dan lu ayăt kơ ih tơ ala kơnơl jơ̆ng ih.”

² Kră Yang đơ̆ng Siôn gô wơh 'long jra pơtao tơdrong kơtang Sư. Ăn kơ ih pơgơ̆r bĕ lu ayăt kơ Ih.

³ Lu kon pơlei pơgơ̆r lu sư kơdih năm. Năm năr Ih năm tơblah, pơdah tơdrong mơsêh Ih, Nhen thoi đak ngom pơgê hrôih. Lu bơngai hơmuh hơmŏng pơguăng ao rơgoh năm tơ Ih.

⁴ Kră Yang đei pơkă pơkăm kơdih; Sư ưh kơ đei tơplih đon: “Ih jing 'bok soi ling-lang, kiơ̆ thoi Mêlkisêdek.”

⁵ Kră Yang oei gah 'ma kơ ih gô pơrăm đĭ lu pơtao lăm năr Sư hil.

⁶ Sư sek tơlang kơ đĭ-đăng dêh char, pơm kơ jơ̆p-jang anih đei hơtâu bơngai lôch. Kŭm gô juă bơhlơ̆r lu yŏng mơng jơ̆p lăm teh.

⁷ Sư gô nhă đak hơbong ro rok trong, yua kơ thoi noh sư gơh ngơk kơ̆l.