Horiso 109 - Sơ̆p Hlabơar Nơ̆r 'Bok Kei-Dei

Apinh Kră Yang pơm tơwih kơ lu ayăt

¹ Ơ Kră Yang 'Bok Kei-Dei Tơ'ngla inh bơnê, apinh lê̆ kơ ngăn ôh,

² Yua kơ 'bơ̆r lu bơngai pơm kơnê̆ păng 'bơ̆r hơlĕnh pơdăr. Đei pơma kơnê̆ kơ inh. Hơpiĕt lu sư pơma hơlĕnh kơ inh

³ Lu sư pơma hăm nơ̆r hil areh wang tăp kơ inh. Blah inh hăm tơdrong ưh kơ đei.

⁴ Mă inh 'mêm kơ lu sư, lu sư oei ayăt kơ inh. Mă inh oei krao khan kơ lu sư.

⁵ Lu sư pơm tơdrong kơnê̆ tơplih kơ tơdrong 'lơ̆ng inh. Lu sư hil areh tơplih kơ inh 'mêm.

⁶ Ăn bĕ bơngai kơnê̆ pơm kơ lu sư, Ăn bơngai jâu dơ̆ng gah 'ma kơ lu sư.

⁷ Tơdah sek tơlang kơ lu sư jô̆ bĕ lu sư yoch. Păng jô̆ tơdrong lu sư krao khan kư̆m yoch.

⁸ Ăn kơ măng năr lu sư arih rai tŏ sĕt. Ăn kơ bơngai nai tơgar iŏk anih tơdrong jang sư.

⁹ Ăn kơ lu kon sư jing mơti. Păng ăn kơ akăn sư jing adro.

¹⁰ Ăn kơ lu kon sư jing răm-'băm păng jing ăn-mai. Puh lu sư chă sa ataih đơ̆ng anih hnam đe pơrăm boih.

¹¹ Ăn kơ tơ'ngla mă lu sư hre, năm hơrui iŏk đĭ mŭk tơmam sư? Lu bơngai tơmoi năm tơgar phĕ iŏk plei tơmam đêl lu sư jang sa.

¹² Thŭ pă đei bu mơnat kơ lu sư, ưh pă đei bu mơnat kơ kon mơti sư.

¹³ Thŭ ăn kơ lu adrĕch adrung sư răm đĭ, Anăn lu sư thŭ sŭt lê̆ tơ chăl đơ̆ng rŏng.

¹⁴ Ăn kơ tơdrong kơnê̆ lu 'bok sư oei tơ'blŏk 'bơ̆t anăp Kră Yang; Păng tơdrong yoch mĕ sư oei ưh kơ sut lê̆.

¹⁵ Ăn kơ dôm tơdrong kơnê̆ noh oei đei ling-lang 'bơ̆t anăp Kră Yang; Na Sư sut lê̆ tơdrong 'blŏk kơ lu sư đơ̆ng lăm teh âu.

¹⁶ Yua kơ lu sư pă đei 'blŏk mơnat kơ đe. Na rôp pơmat lu bơngai dơnuh răm. Lu bơngai pơmat-tat đei jơhngơ̆m ơh kư̆m wă pơlôch mơ̆n.

¹⁷ Sư 'maih blei hiap, Thŭ blei hiap plơ̆ tơ lu sư; kư̆m ưh kơ 'maih wă sơkat đei pŭn hiôk; Thŭ tơdrong pŭn hiôk ataih đơ̆ng lu sư.

¹⁸ Sư pơhrŭk boih kơ sư kơdih hăm tơdrong blei hiap thoi hơbĕn ao sư tơdrong hiap pơtê̆ mơ̆t tơ lăm akâu sư thoi đak, mơ̆t lăm kơting sư thoi rơmă.

¹⁹ Thŭ tơdrong hiap pơtê̆ thoi ao sư hrŭk. Thoi tơlei tơ̆n, tơ̆n tơ kơiĕng ling-lang.

²⁰ Rŏ kơ Kră Yang pơm 'mong thoi noh kơ lu bơngai mă pơm kơnê̆ kơ inh. Păng lu bơngai mă pơma kơnê̆ kơ bơhngol inh.

²¹ Mă-lei, Ih boih ơ Kră Yang, Tơ'ngla pơgơ̆r hăm anăn Ih, apinh Ih dŏng inh. Yua kơ tơdrong 'mêm Ih tih tơpă; Apinh Ih dŏng pơklaih inh.

²² Yua kơ inh pơmat-tat păng dơnuh hin, Na jơhngơ̆m inh jing jĭ jăn

²³ Inh đông thoi yơ̆p ngôi kiơ̆ kơsơ̆. Đe puh inh thoi lep.

²⁴ Kŭl-tăng inh đĭ rơdu yua kơ ơ̆t kơ sŏng sa. Akâu jăn inh đĭ hơkĕ hơkong.

²⁵ Inh jing bơngai lu sư pơjăm. Mưh 'bôh inh lu sư tơtreh kơ̆l.

²⁶ Ơ Kră Yang 'Bok Kei-Dei inh! Apinh Ih tơgŭm inh bĕ. Pơklaih inh kiơ̆ kơ tơdrong 'mêm Ih.

²⁷ Ăn kơ lu sư băt đơ̆ng ti Ih boih pơklaih inh. Ih boih ơ Kră Yang, đei pơm tơdrong noh;

²⁸ Lê̆ lu sư blei hiap, mă-lei Ih ăn pŭn hiôk. Layơ lu sư iung blah lu sư gô mơlâu, Mă-lei gah lu đĭch đam Ih gô chơt hiôk.

²⁹ Lu ayăt kơ inh gô hrŭk iŏk tơdrong mơlâu. Tơdrong mơlâu gô gom lu sư thoi ao tai,

³⁰ 'Bơ̆r inh gô bơnê kơ Kră Yang hăm đĭ jơhngơ̆m, Hơri ư-ang kơ Sư lăm tŏk-bŏk bơngai lơ;

³¹ Yua kơ Sư dơ̆ng gah 'ma kơ lu bơngai dơnuh hin, Wă dŏng pơklaih tơdrong arih lu sư đơ̆ng đe jâu sư.