Horiso 106 - Sơ̆p Hlabơar Nơ̆r 'Bok Kei-Dei

Tơdrong 'lơ̆ng Kră Yang ăn kơ kon pơlei pơla Sư.

¹ Halêluya! Kơkuh bơnê bĕ kơ Kră Yang, yua kơ Sư 'lơ̆ng. Tơdrong 'mêm Sư oei oei ling-lang,

² Bu gơh roi dôm tơdrong jang mơsêh mơyang Kră Yang, bu kĕ roi dôm nơ̆r hơri bơnê kơ Sư?

³ Pŭn dêh kơ bu wei răk tơdrong tơpăt hơnơ̆ng pơm tơdrong 'lơ̆ng tơpăt ling-lang!

⁴ Ơ Kră Yang, apinh 'blŏk kơ inh, mưh Ih mơnat ăn kơ kon pơlei Ih. Năm tơgŭm inh, mưh Ih dŏng pơklaih lu sư?

⁵ Wă kơ inh 'bôh tơdrong pŭn hiôk lu bơngai mă Ih đei rơih. Wă kơ wang chơt hiôk thoi lăm teh đak Ih, Păng hơri bơnê hơdai hăm kon pơlei Ih.

⁶ Lu nhôn păng 'bok lu nhôn pơm yoch boih; Lu nhôn đei yoch glăi pơm kơnê̆ tơpă.

⁷ Tơ dêh char Êyiptơ 'bok lu nhôn ưh kơ 'bôh tơdrong hlĭch chrơp Ih kư̆m ưh kơ 'blŏk tơdrong Ih 'mêm mơnat dêh Mă-lei rai pơm plơ̆ tơ đak dơsĭ, noh đak dơsĭ 'brê.

⁸ Mă-lei, Kră Yang oei tơgŭm lu sư, yua kơ anăn Sư. Wă kơ tơ'bôh tơdrong mơsêh pran Sư.

⁹ Sư chrih kơ đak dơsĭ 'brê, na đak hrơ̆ hloi. Sư chông ba Isơrael rok đak dơsĭ jrŭ, thoi yak rok char 'blach.

¹⁰ Sư dŏng pơklaih lu sư đơ̆ng ti lu bơngai pơm kơnê̆. Huai iŏk lu sư đơ̆ng ti lu bơngai ayăt.

¹¹ Đak lơ̆p lê̆ lu bơngai ayăt lu sư, Ưh pă đei minh 'nu oei arih.

¹² Na lu sư lui kơ nơ̆r Kră Yang. Păng hơri bơnê kơ Sư.

¹³ Mă-lei lu sư 'bônh kơ hiơt kơ tơdrong Sư đei pơm boih. Ưh pă đei gô nơ̆r Kră Yang pơđâu.

¹⁴ Lăm char 'blach jơhngơ̆m lu sư ham rơhing dêh. Păng pơlong lăng Kră Yang 'Bok Kei-Dei tơ lăm bri brah.

¹⁵ Kră Yang ăn kơ lu sư tơdrong lu sư apinh; Mă-lei ăn tơdrong jĭ răm truh kơ tơdrong arih lu sư,

¹⁶ Lu sư hil areh kơ Môis. 'Bơ̆t anih lu sư pơdơh. Păng Arôn, bơngai mă 'lơ̆ng rơgoh Kră Yang.

¹⁷ Teh hơđang na luăn Đathan păng 'bŭ klơ̆p lê̆ khŭl Abiram.

¹⁸ Đei ŭnh sa khŭl lu sư, pla ŭnh sa đĭ lu bơngai pơm kơnê̆.

¹⁹ Lu sư man rup kon rơmo mơlôh tơ Hôrêp, Na drap Kơkuh kơ rup mam noh;

²⁰ Lu sư tơplih Kră Yang Ư-Ang lu sư jing thoi rup rơmo sa 'nhĕt.

²¹ Lu sư hiơt kơ Kră Yang 'Bok Kei-Dei Tơ'ngla dŏng pơklaih lu sư. Păng đei pơm lơ tơdrong tih tơ Êyiptơ,

²² Đei pơm lơ tơdrong hlĭch chrơp tơ dêh Cham păng lu tơdrong trŏ kơ hli tơ đak dơsĭ 'brê.

²³ Thoi noh; Sư khan: Sư wă pơlôch pơđĭ lu sư. Dah ưh kơ Môis, bơngai Sư rơih, dơ̆ng 'bơ̆t anăp Kră Yang 'Bok Kei-Dei.a Wă apinh Kră Yang 'Bok Kei-Dei lê̆ pă hil, huay kơ pơlôch đĭ lu sư.

²⁴ Lu sư lăng hơi đĕch dêh char 'lơ̆ng rŏ. Ưh kơ lui kơ nơ̆r Kră Yang pơkă.

²⁵ Na đei pơma jŏk lăm bơsŭn lu sư. Ưh kơ wă mơ̆ng kiơ̆ nơ̆r Kră Yang.

²⁶ Na Kră Yang yơ̆r ti pơkăm khan: “Sư gô pơrăm lu sư pơ̆k lôch tơ lăm char 'blach,

²⁷ Pơm kơ adrĕch adrung lu sư kơdâu tơklah băl tơ jơ̆p-jang kơ teh đak, Păng pơm ăn kơ lu sư tơklah tơklang jơ̆p kơ dêh char.”

²⁸ 'Bok lu nhôn kơkuh kơ yang Baal tơ Pêôr, Sa tơmam soi pơm yang kơ bơngai lôch;

²⁹ Lu sư tơblĕk Kră Yang hăm tơdrong jang lu sư pơm kơnê̆. Păng jĭ lôch hơbuh truh tơ lăm lu sư,

³⁰ Mă-lei đei Phinêhas iung apinh. Na lôch hơbuh đei pơdơh.

³¹ Lăm đĭ jơhnơr jô̆ sư bơngai 'lơ̆ng tơpăt, dĭng truh tơ ning-mônh hloi.

³² 'Bok lu nhôn pơm kơ Kră Yang blĕk tơ đak Mêriba. Yua kơ đơ̆ng lu sư, na Môis đei tơdrong pơmat-tat.

³³ Yua kơ lu sư pơm kơ kơ̆l 'ngok sư, na Môis pơma kư̆ kă ưh kơ tơchĕng.

³⁴ Lu sư ưh kơ pơrăm đĭ lu kon pơlei tơring noh kiơ̆ thoi Kră Yang đei athei lu sư.

³⁵ Mă-lei oei hơbĭ hơdai hăm kon pơlei noh. Pơhrăm pơm kiơ̆ tơdrong juăt lu đe noh.

³⁶ Bơ̆jang ăn kơ rup man đe noh. Âu boih pơm hơđong pơrăm lu sư kơdih.

³⁷ Lu sư rôp kon drŏ-nglo kon drŏ-kăn lu sư. Pơm tơmam soi kơ Yang kơnê̆.

³⁸ Tuh pham tơdrong ưh kơ đei. Pham lu kon drŏ-nglo drŏ-kăn sư kơdih. Lu sư pơm tơmam soi ăn kơ rup yang char Kanaan; Na, char noh jing 'mê̆ kơnê̆ yua kơ pham noh.

³⁹ Lu sư jing 'mê̆ yua kơ đơ̆ng tơdrong jang kơdih lu sư. Na lu sư jing pơm đi ngôi kư̆ kă.

⁴⁰ Kră Yang hil mĭl dêh kơ kon pơlei pơla Sư. Lăng krưp dêh kơ kon pơlei.

⁴¹ Na Sư pơjao lê̆ lu sư lăm ti lu bơngai dêh tơmoi, Ăn lu bơngai mă areh kơ lu sư pơgơ̆r lu sư.

⁴² Lu bơngai ayăt pơjuă pơđep lu sư. Lu sư chu kŭp kơ̆l jang kơ đe noh.

⁴³ Đei lơ wơ̆t Kră Yang dŏng pơklaih lu sư. Mă-lei lu sư pơrơ̆ng pơm plơ̆. Păng lu sư jing răm lăm tơdrong yoch kơdih.

⁴⁴ Mă-lei ră, mưh kơtơ̆ng nơ̆r lu sư krao apinh, Sư kư̆m lăng ba lu sư lăm năr pơmat-tat.

⁴⁵ 'Blŏk dơ̆ng kơ lu sư, yua đơ̆ng nơ̆r Sư pơgơ̆p. Yua kơ đơ̆ng tơdrong 'mêm mơnat tih Sư 'mêm mơnat kơ lu sư.

⁴⁶ Sư kư̆m ăn kơ lu sư đei pŭn hiôk 'bơ̆t anăp lu bơngai mă rôp lu sư pơm bơnă.

⁴⁷ Ơ Kră Yang, 'Bok Kei-Dei lu nhôn, apinh Ih dŏng pơklaih lu nhôn. Akŭm pơpôi lu nhôn đơ̆ng jơ̆p kơ dêh char. Wă kơ lu nhôn bơnê ư-ang kơ anăn 'lơ̆ng rơgoh Ih păng gơh oei hiôk hơri kơkuh kơ Ih.

⁴⁸ Kơkuh bơnê kơ Kră Yang 'Bok Kei-Dei Isơrael. Đơ̆ng blŭng-a adrol kơ đĭ-đăng dĭng truh tơ ning-mônh ling-lang! Đĭ kon pơlei pơla gô khan “A-men”! Halêluya!