Horiso 105 - Sơ̆p Hlabơar Nơ̆r 'Bok Kei-Dei

Kră Yang hăm kon pơlei Sư

¹ Bơnê ư-ang bĕ kơ Kră Yang. Krao apinh pao anăn Sư bĕ. Ră roi bĕ kơ lu kon pơlei pơla dôm tơdrong jang Sư pơm boih.

² Hơri bĕ kơ Sư, hơri bơnê bĕ kơ Sư. Ră roi bĕ tơdrong jang hlĭch chrơp sư.

³ Ư-ang bĕ kơ lu iĕm kơdih lăm anăn rơgoh Sư, Ăn kơ jơhngơ̆m lu bơngai chơchă Kră Yang đei hiôk chơt.

⁴ Chă bĕ Kră Yang păng tơdrong pran kơtang Sư chơchă bĕ muh măt Sư ling-lang.

⁵ Athei 'blŏk bĕ dôm tơdrong jang hlĭch chrơp Sư đei pơm boih Tơdrong hlĭch chrơp păng tơdrong sek tơlang đơ̆ng 'bơ̆r sư đei khan.

⁶ Ơ lu adrĕch adrung Abraham, đĭch đam Sư. Ơ lu kon sâu Jakôp, lu bơngai mă Sư rơih.

⁷ Sư boih Kră Yang 'Bok Kei-Dei lu bơ̆n. Tơdrong Sư sek tơlang kơ jơ̆p lăm teh.

⁸ Sư 'blŏk tơdrong pơgơ̆p Sư ling-lang. Sư ưh kơ hiơt tơdrong pơkă pơkăm mă truh rơbâu chăl.

⁹ Tơdrong Sư pơgơ̆p hăm Abraham. Nơ̆r Sư pơkăm hăm Isăk,

¹⁰ Sư pơsĭt boih hăm Jakôp noh jing minh tơdrong juăt. Păng hăm Isơrael jing minh tơdrong pơgơ̆p ling-lang

¹¹ Sư khan: “Inh gô ăn kơ Ih teh char Kanaan, Noh teh lu iĕm jang sa;”

¹² Kơplah noh lu sư lăp tŏ sĕt đĕch, ưh tam đei lơ păng jing bơngai tơmoi lăm char noh.

¹³ Lu sư năm đơ̆ng dêh âu, truh tơ dêh to. Đơ̆ng teh đak âu tơ teh đak nai.

¹⁴ Sư ưh kơ ăn đei bu gơh pơjuă pơđep lu sư. Kră Yang hil kơ lu pơtao yua kơ lu sư.

¹⁵ Sư khan: “'Nĕ kơ hơtŭt 'bơm kơ lu bơngai mă inh đei tuh đak 'bâu phu, 'nĕ pơrăm lu bơngai khan lê̆ adrol Inh.”

¹⁶ Sư ăn tơdrong pơngot rơwĕt lăm dêh char, Păng pơrăm lê̆ đĭ tơmam sŏng sa lu sư,

¹⁷ Sư wơh minh 'nu năm adrol kơ lu sư, Noh jơ̆ Jôsep, đe tĕch boih pơm đĭch.

¹⁸ Lu đe jơlŏng lê̆ jơ̆ng sư, chô̆ hơko sư păng glang mam.

¹⁹ Dĭng truh 'blep kơ năr đêl sư khan, Nơ̆r Kră Yang pơsĭt nơ̆r sư khan trŏ.

²⁰ Pơtao athei đe achăng Jôsep tơ'ngla pơgơ̆r kon pơlei pơklaih sư.

²¹ Pơtao jao kơ sư pơm yŏng wei-lăng hnam pơtao păng lăng đĭ-đăng mŭk măk, lăm char sư

²² Wă kơ sư gơh bơtho athei lu kră pơgơ̆r mơ̆ng kiơ̆ sư. Păng sư bơtho pơhrăm ăn kơ lu kră wă kơ băt gơh hơgei.

²³ Isơrael mơ̆t oei tơ Êyiptơ; Jakôp oei tơ dêh Cham thoi bơngai tơmoi.

²⁴ Kră Yang ăn kơ kon pơlei pơla sư rai hrôh, ăn kơ lu sư pran hloh kơ lu đe mă pơjuă pơđep lu sư.

²⁵ Na Sư tơplih jơhngơ̆m bơngai Êyiptơ, areh kơ kon pơlei pơla Sư. Chă đon wă pơrăm lu đĭch đam Sư.

²⁶ Sư wơh Môis đĭch đam Sư păng Arôn bơngai mă Sư rơih boih.

²⁷ Lu sư pơm tơdrong hlĭch chrơp Kră Yang. Tŏk-bŏk lu đe noh. Pơm kơdranh hlĭch chrơp lăm dêh Cham.

²⁸ Sư wơh măng mu, măng mu jơ̆p-jang kơ dêh ei. Wă kơ lu sư pă đei pơm kơnê̆ kơ nơ̆r Sư dơ̆ng.

²⁹ Sư tơplih đak lu đe noh jing pham, Păng pơlôch đĭ ka lăm đak.

³⁰ Đei kit lơlap 'bĕnh-'bang kơ dêh lu sư. Dĭng truh tơ lăm anih pơtao kư̆m đei.

³¹ Sư pơma na đei hloi roi wŏng truh, Păng mur 'bĕnh-'bang kơ dêh lu sư,

³² Sư ăn 'mi prĕl, tơplih kơ đak 'mi păng ăn kơmlat tơ jơ̆p kơ char noh,

³³ Sư kư̆m pơrăm pơgar hơmu păng plei 'long hơra. Sư gơ̆ lê̆ lu 'long tơ lăm char noh.

³⁴ Sư pơma đei hloi lep tung-nut păng lep 'ba lơlap pă kĕ jô̆.

³⁵ Kăp hek sa đĭ lu 'long 'nhĕt lăm teh char noh, Păng kư̆m sa pơrăm lu hơ'bo 'ba plei sa lăm mir chŭn.

³⁶ Sư pơlôch đĭ lu kon kơdră lăm char noh. Wă khan đĭ kơ lu plei blŭng-a. Đĭ lu pran kơtang.

³⁷ Na Sư chông ba Isơrael lĕch đei chĕp ba hu maih, Ưh kơ đei bu lap rơmơ̆n lăm lu adrĕch lu sư.

³⁸ Bơngai Êyiptơ chhôk hal dêh kơ Isơrael weh năm, Yua kơ lu sư hli krưp dêh kơ bơngai Isơrael.

³⁹ Sư bơyar hơmơ̆l wă kơ pơyơ̆l kơ kon pơlei Sư, Păng kơmăng đei ŭnh pơchrang hơdah.

⁴⁰ Lu sư krao apinh, Kră Yang ăn đei Sem wăt truh, Păng 'bĕng sa đơ̆ng plĕnh ăn kơ lu sư sŏng sa phĭ hrăp.

⁴¹ Sư blah tơmo, na đei hloi đak lĕch, ro tơ char glă thoi đak krong.

⁴² Yua kơ Sư 'blŏk kơ nơ̆r pơgơ̆p rơgoh Sư mă đei pơkă hăm Abraham đĭch đam Sư.

⁴³ Sư chông ba kon pơlei Sư lĕch năm hiôk-hian; lu bơngai Kră Yang rơih. Lu sư lĕch năm hăm nơ̆r hơri chơt hiôk.

⁴⁴ Sư jao ăn teh kơ lu sư đơ̆ng lu dêh char. Lu sư yua iŏk mir chŭn pơgar đơ̆ng lu kon pơlei.

⁴⁵ Wă kơ lu sư bơwei tơdrong Kră Yang tơtă Păng pơm kiơ̆ dôm khôi juăt Sư Halêluya!