Horiso 103 - Sơ̆p Hlabơar Nơ̆r 'Bok Kei-Dei

Tơdrong Kră Yang 'mêm

¹ Ơ bơhngol inh, hơri bơnê bĕ kơ Kră Yang! Đĭ jơhngơ̆m hơri bơnê bĕ kơ anăn 'lơ̆ng rơgoh Sư!

² Ơ bơhngol inh, kơkuh bơnê bĕ kơ Kră Yang. 'Nĕ hiơt dôm tơdrong 'lơ̆ng Sư pơm.

³ Sư mơnat ăn dôm tơdrong yoch đêl ih pơm, Pơklaih dôm tơdrong jĭ jăn ih.

⁴ Sư dŏng pơklaih tơdrong arih ih đơ̆ng sơlŭng jrŭ. Iŏk tơdrong 'mêm păng tơdrong mơnat na pơm môk pơtao pơyơ̆l ăn kơ ih.

⁵ Sư ăn kơ hơlŏng ih hrăp jơnap. Hăm tơmam sa 'lơ̆ng, sơnăm hơmuh hơmŏng ih wih 'nao dơ̆ng thoi Klang.

⁶ Kră Yang pơm tơdrong tơpăt, Păng sek trŏ hơnơ̆ng kơ lu bơngai mă gơ̆p pơjuă pơđep.

⁷ Sư tơ'bôh ăn kơ Môis trong Sư, păng ăn kơ Isơrael băt dôm tơdrong mơsêh mơyang Sư.

⁸ Kră Yang đei tơdrong 'mêm mơnat. Huay 'bônh kơ blĕk păng 'bĕnh kơ tơdrong 'mêm.

⁹ Sư ưh kơ chrih kơ bơ̆n ling-lang ôh; Kŭm huay kơ hil mĭl khŏm khŏm mơ̆n.

¹⁰ Sư huay pơm kơ lu bơ̆n kiơ̆ thoi yoch lu bơ̆n ôh; Kŭm ưh kơ hil 'mong kiơ̆ kơ tơdrong kơnê̆ lu bơ̆n pơm boih.

¹¹ Yua kơ plĕnh kơjung đơ̆ng teh dang yơ. Na tơdrong 'mêm sư dang noh mơ̆n, kơ lu bơngai bu mă hli yom kơ Sư.

¹² Gah hơlĕch ataih đơ̆ng gah bơmơ̆t dang yơ, Na Sư kư̆m hŭt lê̆ dôm yoch glăi lu bơ̆n ataih dang noh mơ̆n.

¹³ Thoi 'bă 'mêm kơ kon hơ'lơ̆p sư dang yơ. Kră Yang 'mêm kơ lu bơngai bu mă hli yom kơ Sư dang noh mơ̆n.

¹⁴ Yua kơ Sư băt bơ̆n jing đơ̆ng yơ, Sư 'blŏk kơ bơ̆n đơ̆ng 'mui teh.

¹⁵ Chăl arih kon bơngai thoi 'nhĕt. Sư arih thoi pơkao tơ lăm mir

¹⁶ Mưh kial tơthu tơ pơkao, sư hiong hloi, anih sư chăt ưh pă 'blŏk kơ sư boih.

¹⁷ Mă-lei tơdrong 'mêm Kră Yang oei oei ling-lang. Ăn kơ lu bơngai hli yom kơ Sư, păng tơdrong 'lơ̆ng tơpăt Sư 'măn kơ lu kon sâu lu sư.

¹⁸ Wă khan ăn kơ lu đe bu mă wei răk tơdrong pơgơ̆p Sư. Păng 'blŏk na pơm kiơ̆ kơ dôm nơ̆r Sư bơtho pơkă.

¹⁹ Kră Yang pơjing boih anih pơtao Sư tơ plĕnh. Dêh char Sư pơgơ̆r kơ đĭ-đăng tôm tơmam.

²⁰ Hơri bơnê kơ Kră Yang: Ơ lu linh jang Kră Yang, lu yang mă đei jơhngơ̆m pran kơtang pơm kiơ̆ nơ̆r tơtă Sư; mơ̆ng kiơ̆ nơ̆r Sư khan.

²¹ Hơri bơnê bĕ kơ Kră Yang! Ơ lu linh Kră Yang, đĭch đam pơm kiơ̆ nơ̆r Sư.

²² Hơri bơnê bĕ kơ Kră Yang! Ơ dôm lu sem tơmam mă Kră Yang pơjing, Lăm jơ̆p anih teh đak Sư, Ơ bơhngol inh, hơri bơnê bĕ kơ Kră Yang!