Horiso 101 - Sơ̆p Hlabơar Nơ̆r 'Bok Kei-Dei

Pơkă wă kiơ̆ trong Kră Yang

¹ Inh gô hơri kơ tơdrong 'mêm mơnat păng tơdrong tơpăt Ih; Ơ Kră Yang, Inh gô hơri bơnê kơ Ih.

² Inh gô kơchăng oei arih sa trŏ 'lơ̆ng. Dang yơ Ih wă truh tơ inh? Inh gô iŏk jơhngơ̆m tơpăt na oei sa lăm hnam inh.

³ Inh ưh kơ ăn minh tơdrong kiơ kơnê̆ 'bơ̆t muh măt inh. Inh areh kơ tơdrong jang lu bơngai achăng lê̆ Ih: Tơdrong noh ưh kơ 'bơm tơ inh.

⁴ Inh gô weh ataih đơ̆ng lu bơngai đei jơhngơ̆m kơnê̆. Inh ưh kơ wă pơm tơdrong kơnê̆ dơ̆ng.

⁵ Inh gô ngăn hreh kơ lu đe mă pơma roi 'bơm lu rông 'bôt. Gah lu bơngai đei măt pơrŏ păng jơhngơ̆m pơang, Inh ưh kơ lăp ôh.

⁶ Măt inh gô hnhoi kiơ̆ lu bơngai tơpăt lăm tơring. Lu sư gô oei hơdai hăm inh; Bu kiơ̆ trong tơpăt, bơngai noh gô bơ̆jang kơ inh.

⁷ Lu mă hơlĕnh pơdăr ưh kơ gơh oei tơ lăm hnam inh. Bơngai pơma hơlĕnh ưh kơ gơh dơ̆ng 'bơ̆t anăp inh.

⁸ Lăm rim pơgê inh gô pơlôch pơđĭ lu bơngai pơm kơnê̆ lăm tơring. Wă pơrăm lê̆ lu bơngai pơm kơnê̆, đơ̆ng pơlei Kră Yang.