Hêbrơ 9 - Sơ̆p Hlabơar Nơ̆r 'Bok Kei-Dei

¹ Tơdrong pơgơ̆p hơdrol sơ̆, đei tơdrong juăt pơkă gah tơdrong kơkuh kơ 'Bok Kei-Dei, đei hnam kơkuh kơ 'Bok Kei-Dei, mă kon bơngai pơm.

² Hnam noh đe pơm păng tua-la-tăng đei 'bar tŏ lăm, rŏ dêh. Lăm mă mônh đe 'măn jơ̆ng kơđeng păng chơnang soi wă 'măn 'bĕng mi đơ̆ng đe pơyơ̆r kơ 'Bok Kei-Dei. Anih noh đe anăn anih giĕng soi.

³ Tơ rŏng, mơ̆t kơ 'măng mă 'bar đei anih lăm. Anih noh đe anăn anih giĕng soi tih.

⁴ Lăm noh đei chơnang soi maih đe tơ̆k ŭnh soh pơgang 'bâu phu. Lăm noh kư̆m đei minh pôm hom tih đe kư̆m hling păng maih mơ̆n. Lơ̆m hom noh đe tah tơmo lat chih tơdrong 'Bok Kei-Dei pơkă kơ kon bơngai, tah kơlăm maih wă mong 'bĕng mana mă huŏng đơ̆ng plĕnh sơ̆, hăm tah 'long jra 'bok Arôn mă chăt pơkao.

⁵ Kơpal hom noh đe man 'bar tŏ rup linh jang 'lơ̆ng, đe anăn bre sư chêrôbin, bre sư bơyar pơnăr tơ kơpal kơ hom noh. Hom noh đe anăn anih 'Bok Kei-Dei pơklaih yoch, 'bar tŏ rup linh jang noh wă pơtih gia kơ 'Bok Kei-Dei oei lơ̆m anih noh. Inh kư̆m wă roi kơ iĕm tôm tơdrong noh, mă inh ưh kơ wăn ôh.

⁶ Đe pơm tôm tơdrong lơ̆m hnam noh keh boih, na lu 'bok soi ling-lang juăt kơ mơ̆t kơkuh soi kơ 'Bok Kei-Dei tơ lơ̆m anih giĕng mă mônh noh.

⁷ Gah lăm mă 'bar lăp minh 'nu 'bok soi tih đĕch gơh mơ̆t kơkuh kơ 'Bok Kei-Dei lơ̆m noh. Mă-lei minh sơnăm minh 'măng đĕch, mă mơ̆t athei yua hăm pham sem dơrong 'mơ̆i na gơh mơ̆t, iŏk pham sem noh soi kơ 'Bok Kei-Dei, wă kơ 'Bok Kei-Dei huay kơ jô̆ yo kơ tơdrong yoch sư kơdih hăm tơdrong yoch lu bôl buăl sư bơngai Isơrael.

⁸ Tơdrong noh Yang Bơhngol 'Lơ̆ng Sư bơtho kơ bơ̆n wă kơ bơ̆n băt, sơ̆ bơ̆n ưh kơ gơh mơ̆t kơkuh 'bơ̆t anăp 'Bok Kei-Dei tơ anih giĕng tih.

⁹ Tơdrong noh Sư tơbăt ăn kơ lu bơ̆n dang ei ưh pă giĕng năm 'bơ̆t anăp 'Bok Kei-Dei boih. Kiơ̆ kơ tơdrong so noh sơ̆, lu 'bok soi, lu sư đei tơmam đe pơyơ̆r wă soi kơ 'Bok Kei-Dei. Mă-lei tơdrong lu sư soi noh ưh kơ pơm kơ lu bơngai mă kơkuh kơ 'Bok Kei-Dei 'lơ̆ng tơpăt hăm 'Bok Kei-Dei ôh.

¹⁰ Lu tơdrong juăt noh sơ̆ khă gah tơdrong sa et tơmam giĕng, tơdrong hum 'nhao. Dôm tơdrong giĕng lu sư pơm giĕng tơ 'ngoaih akâu đĕch. Mă-lei khan wă kơ đe kiơ̆ khŏm khŏm truh tơ 'Bok Kei-Dei tơplih tơdrong so ăn tơdrong 'nao.

Yêsu soi kơ 'Bok Kei-Dei hăm pham Sư kơdih

¹¹ Na dang ei Yêsu Krist truh boih, Sư pơm 'bok soi ăn dôm tơdrong hiôk 'lơ̆ng kơ bơ̆n. Sư jang awih awăn tơ lăm hnam 'Bok Kei-Dei rŏ hloh kơ hnam akŭm lu bơngai noh sơ̆. Hnam Sư ei ưh kơ pơm păng ti kon bơngai ôh păng hnam ei ưh kơ trŏ kơ tơ teh âu ôh, hnam ei tơ plĕnh ti.

¹² Yêsu mơ̆t boih hnam ei, truh tơ anih giĕng tih hloi. Sư mơ̆t soi minh 'măng đĕch tôm hloi kơ tơdrong soi boih yua kơ Sư soi hăm pham Sư kơdih. Ưh kơ sĭ Sư soi hăm pham bơbe pham rơmo ôh. Sư soi thoi noh đĕch, na bu wă gơnang kơ tơdrong Sư soi noh, bơngai noh gô klaih hloi kơ tơdrong yoch.

¹³ Tơdrong yoch pel 'bơm ưh kơ lăp, kiơ̆ kơ tơdrong juăt so sơ̆, athei pơ'lơ̆ng hăm pham bơbe pham rơmo tơno păng iŏk hơyok kon rơmo adruh đêl đe 'buh pơkhoy tuh bơlŭ hăm đak, na sraih lu bơngai mă đei tơdrong yoch noh na klaih, jô̆ jing bơngai rơgoh boih.

¹⁴ Tơ̆ng thoi ei, lei pham Yêsu Krist kăl hloh kơ dôm lu pham sem noh, yua kơ Sư rơgoh ling-lang ưh kơ đei yoch kiơ ôh. Pơthim kơ Sư Yang arih ling-lang tăm. Sư soi kơ 'Bok Kei-Dei hăm pham Sư kơdih, na pham Sư sut lê̆ đĭ dôm tơdrong yoch bơ̆n, pơm kơ jơhngơ̆m đon bơ̆n jing 'lơ̆ng tơpăt hăm 'Bok Kei-Dei wă kơ bơ̆n gơh jang kơ 'Bok Kei-Dei mă arih ling-lang.

¹⁵ Thoi noh bơ̆n băt lăp pôm Yêsu đĕch boih gơh pơm 'long sơlam kơ bơ̆n kiơ̆ tơdrong pơgơ̆p 'nao, wă kơ đĭ-đăng lu bơ̆n bơngai mă 'Bok Kei-Dei krao iŏk, gô đei tơdrong Sư pơkă wă ăn kơ bơ̆n ning-mônh ei. Dôm lu bơngai noh gơh klaih đơ̆ng tơdrong yoch đêl kiơ̆ tơdrong pơgơ̆p so, yua kơ Yêsu lôch huai iŏk sư.

¹⁶ Tơdrong pơgơ̆p 'nao kư̆m thoi tơdrong bơ̆n dô̆ asong mŭk kră, tơ̆ng kră tam mă lôch, ưh kơ gơh dô̆ asong ôh.

¹⁷ Gô sư lôch 'mơ̆i na gơh dô̆ asong kiơ̆ thoi sư pơkă.

¹⁸ Tơdrong pơgơ̆p so kư̆m lei-lăi, đei pham 'mơ̆i na gơh pơjing tơdrong pơgơ̆p noh.

¹⁹ Kơplah Môis pơkă ăn kơ lu bơngai Isơrael tôm kơ tơdrong juăt boih, na sư phĕ iŏk tơ'mơ̆ng pơkao păng iŏk achô̆ sŏk bơbe, tong tơ lăm pham bơbe pham rơmo bơlŭ păng đak 'blăng na chruih kơ tơmo lat chih tơdrong juăt 'Bok Kei-Dei, klaih kơ noh sư tơtreh kơ lu bơngai Isơrael.

²⁰ Păng khan: “Pham âu, pham tơdrong pơgơ̆p mă 'Bok Kei-Dei pơkă wă kơ iĕm rok kiơ̆.”

²¹ Sư chruih pham tơ hnam 'Bok Kei-Dei sơ̆ kư̆m lei-lăi thoi noh. Sư kư̆m chruih tôm kơ tơmam đe wă yua kơkuh kơ 'Bok Kei-Dei lăm noh.

²² Kiơ̆ kơ tơdrong juăt sơ̆, dôm tơdrong rơgoh, tă rơgoh yua kơ pham. Tơ̆ng ưh kơ huach pham, ưh kơ gơh klaih đơ̆ng tơdrong yoch ôh.

Yêsu Krist soi akâu Sư kơ 'Bok Kei-Dei

²³ Dôm tơdrong rơgoh noh sơ̆, rơgoh yua kơ đe soi kơ 'Bok Kei-Dei hăm pham sem. Dôm tơdrong rơgoh noh, wă pơtih gia kơ tơdrong tơ plĕnh ti. Tơdrong tơ plĕnh ti kăl hloh. Na lu bơ̆n bơngai wă tŏk tơ plĕnh ti, wă gơnang kơ pham sem thoi lu bơngai noh sơ̆, ưh kơ gơh klaih đơ̆ng tơdrong yoch ôh. Bơ̆n athei gơnang kơ pham tơ'ngla mă soi kơ 'Bok Kei-Dei hăm pham Sư kơdih noh đĕch klaih.

²⁴ Thoi noh na dang ei Yêsu Krist tŏk tơ plĕnh ti mơ̆t tơ hnam 'Bok Kei-Dei tơ plĕnh ti boih. Sư ưh kơ mơ̆t tơ hnam 'Bok Kei-Dei mă kon bơngai pơm tơ teh âu ôh, hnam 'Bok Kei-Dei mă kon bơngai pơm tơ teh âu noh, wă pơtih gia kơ hnam 'Bok Kei-Dei tơ plĕnh ti. Dang ei Yêsu Krist tŏk oei tơ noh tơpă boih, Sư oei 'bơ̆t anăp 'Bok Kei-Dei tang đĭ-đăng rim 'nu bơngai.

²⁵ Ưh kơ sĭ Sư soi hăm pham sem dơrong ôh, Sư soi hăm pham Sư kơdih hloi. Mă-lei ưh kơ sĭ soi akâu Sư kơ 'Bok Kei-Dei ling-lang thoi 'bok soi tih sơ̆ ôh, mơ̆t soi kơ 'Bok Kei-Dei ling-lang, rim sơnăm minh 'măng, tơ anih giĕng tih hăm pham sem dơrong.

²⁶ Tơ̆ng Sư soi kơ 'Bok Kei-Dei akâu Sư lơ 'măng, lei Sư lôch pơmat rim sơnăm jô̆ đơ̆ng pơjing plĕnh teh sơ̆ khơ̆ dang ei ưh kơ băt hơdôm 'măng. Mă tơpă Sư jur minh 'măng sơ̆ đĕch, yua kơ trŏ năr hơtuch boih. Sư jur soi kơ 'Bok Kei-Dei akâu Sư, wă pơrăm đĭ dôm tơdrong yoch.

²⁷ Kon bơngai bơ̆n lôch minh 'măng đĕch, klaih kơ noh năm tơ tơdrong sek tơlang.

²⁸ Kư̆m thoi noh Yêsu jur lôch minh 'măng noh sơ̆ wă pơrăm tôm tơdrong yoch hloi. Mă pă 'măng Sư jur Sư ưh pă pơrăm tơdrong yoch boih, Sư jur wă iŏk dôm lu bơngai mă oei chang gô Sư dang ei.