Hêbrơ 7 - Sơ̆p Hlabơar Nơ̆r 'Bok Kei-Dei

¹ 'Bok soi Mêlkisêdek sư pơm pơtao Pơlei Salem, sư kư̆m pơm 'bok soi wă soi kơ 'Bok Kei-Dei Kră Yang Tih Hloh. Sư năm sơng iŏk Abraham brŏk đơ̆ng tơblah kơ lu pơtao nai. Na sư krao khan apinh 'Bok Kei-Dei tơgŭm Abraham.

² Abraham iŏk dôm tơmam sư minh lơ̆m mơjĭt asong kơ Mêlkisêdek. Anăn Mêlkisêdek wă khan 'bok pơtao 'lơ̆ng tơpăt. Pơtao đe Salem, Salem wă khan hiôk-hian, sư 'bok pơtao pơgơ̆r tơdrong hiôk-hian.

³ Mêlkisêdek bơ̆n ưh kơ 'bôh đe chih roi lăm hla bơar 'Bok Kei-Dei khan sư đei mĕ 'bă, đei adrĕch adrung, dah đei đe tơpŭ kơ sư, dah roi tơdrong sư lôch ôh. Sư thoi lĕ kơ Yêsu Kon 'Bok Kei-Dei, yua kơ sư pơm 'bok soi pơgơ̆r ling-lang.

⁴ Sư 'bok tih tơpă bĭ iĕm tơchĕng sư thoi yơ? 'Bok kơdră bơ̆n Abraham sơ̆ mah asong sư tơmam đơ̆ng sư blah iŏk tơmam lu ayăt, ăn kơ sư minh lơ̆m mơjĭt.

⁵ Lu kon sâu 'bok Lêwi mă pơm 'bok soi kư̆m gơh iŏk tơmam pơyơ̆r minh lơ̆m mơjĭt đơ̆ng lu kon pơlei pơla 'nhŏng oh lu sư, yua kơ tơdrong juăt 'Bok Kei-Dei pơkă thoi noh păng lu sư kư̆m kon sâu Abraham tăm.

⁶ Mă Mêlkisêdek sư ưh kơ trŏ kơ kon sâu 'bok Lêwi ôh, mă-lei sư kư̆m gơh iŏk tơmam minh lơ̆m mơjĭt đơ̆ng Abraham. Na sư krao khan apinh 'Bok Kei-Dei tơgŭm Abraham bơngai mă 'Bok Kei-Dei pơkă wă tơgŭm.

⁷ Thoi noh na ưh kơ đei bu pơma kiơ kơ Mêlkisêdek gah tơdrong sư krao khan kơ Abraham, yua kơ sư tih hloh kơ Abraham tơpă.

⁸ Lu 'bok soi kon sâu 'bok Lêwi, mă khan sư gơh iŏk sa tơmam kon pơlei pơyơ̆r minh lơ̆m mơjĭt, mă-lei lu kon sâu sư noh sơ̆ lôch đĭ boih. Mă gah Mêlkisêdek, lăm sơ̆p hla bơar 'Bok Kei-Dei khan sư oei arih ưh kơ lôch ôh.

⁹ Lêwi ưh kơ đei ăn kơ Mêlkisêdek tơmam minh lơ̆m mơjĭt ôh, Abraham đĕch ăn. Mă-lei kư̆m dang sư ăn mơ̆n,

¹⁰ yua kơ kơplah Mêlkisêdek năm sơng iŏk Abraham brŏk đơ̆ng tơblah, Lêwi dang lĕ kơ kon pơjing Abraham yua kơ sư kon sâu Abraham.

¹¹ Lu 'bok soi kon sâu 'bok Lêwi hăm 'bok Arôn pơgơ̆r gah tơdrong juăt 'Bok Kei-Dei pơkă kơ lu bơngai Isơrael. Tơ̆ng kon bơngai gơnang kơ lu sư, na gơh jing 'lơ̆ng tơpăt hăm 'Bok Kei-Dei, lei kon bơngai ưh pă kăl boih kơ 'bok soi tih adrĕch Mêlkisêdek jur pơgơ̆r. Dôm lu sư jang mah boih.

¹² Tơ̆ng 'Bok Kei-Dei tơplih pôk 'bok soi 'nao, lei tơdrong juăt Sư pơkă sơ̆ Sư kư̆m athei tơplih.

¹³ Yŏng bơ̆n Yêsu Krist mă 'Bok Kei-Dei pôk pơm 'bok soi dang ei, Sư ưh kơ sĭ adrĕch adrung 'bok Lêwi ôh.

¹⁴ Sư adrĕch adrung Juđa. Adrĕch adrung Juđa, Môis ưh kơ đei roi bu lơ̆m lu sư pơm 'bok soi ôh. Thoi noh tam mă đei bu đơ̆ng adrĕch lu sư pơm 'bok soi.

Đei minh 'nu 'bok soi 'nao Sư adrĕch pơm tih thoi Mêlkisêdek

¹⁵ Dang ei bơ̆n băt nhên boih bơ̆n đei minh 'nu 'bok soi 'nao, Yêsu Krist, Sư adrĕch pơm tih thoi Mêlkisêdek.

¹⁶ Tơdrong Sư pơm 'bok soi tih ưh kơ sĭ Sư pơm kiơ̆ kơ adrĕch Sư pơm 'bok soi kiơ̆ thoi tơdrong juăt pơkă sơ̆ ôh. Sư pơm 'bok soi tih yua kơ Sư mơsêh arih ling-lang ưh kơ layơ tôch na Sư pơm.

¹⁷ Tơdrong noh kiơ̆ kơ 'Bok Kei-Dei khan sơ̆ thoi âu: “Ih pơm 'bok soi ling-lang ưh kơ tôch kiơ̆ kơ Ih adrĕch pơm tih thoi Mêlkisêdek.”

¹⁸ Thoi noh na tơdrong juăt Môis noh sơ̆, 'Bok Kei-Dei tŭk lê̆ boih, yua kơ tơdrong juăt noh ưh kơ pơyua kon bơngai.

¹⁹ Tơ̆ng kon bơngai kiơ̆ tơdrong juăt noh sơ̆, kon bơngai ưh kơ gơh pơm 'lơ̆ng tơpăt hăm 'Bok Kei-Dei ôh. Mă-lei dang ei bơ̆n jing bơngai 'lơ̆ng tơpăt boih, yua kơ 'bok soi 'nao noh, Sư soi akâu Sư kơ 'Bok Kei-Dei. Na dang ei bơ̆n pơ̆n năm jê̆ 'Bok Kei-Dei boih.

²⁰ Tơdrong 'Bok Kei-Dei pôk Yêsu pơm 'bok soi noh, Sư pao anăn Sư kơdih pơkă kơjăp tơpă.

²¹ Tơdrong noh lăm sơ̆p hla bơar 'Bok Kei-Dei đei khan thoi âu: “Inh Kră Yang, Inh pao anăn Inh kơdih pơkă kơjăp tơpă, Inh ưh kơ gơh lê̆ ôh tơdrong pơkă noh.” Tơdrong pơkă noh Sư khan kơ Kon Sư thoi âu: “Ih pơm 'bok soi ling-lang ưh kơ tôch.” Mă kơplah Sư ăn lu bơngai noh pơm 'bok soi sơ̆ 'Bok Kei-Dei ưh kơ đei pao anăn Sư kơdih pơkă kơjăp thoi noh ôh.

²² Thoi noh na bơ̆n băt kơ Yêsu pơgơ̆p bơ̆n kơ 'Bok Kei-Dei dang ei hiôk hloh kơ lu 'bok soi noh pơgơ̆p sơ̆.

²³ Lu 'bok soi noh sơ̆ lu sư lơ, mă lơ yua kơ nŏng kơ pơtăl băl kơlih kơ lôch.

²⁴ Mă gah Yêsu Sư oei pơm ling-lang ưh kơ tôch, yua kơ Sư gơh arih ling-lang.

²⁵ Thoi noh na mă layơ Sư oei pơklaih ling-lang dôm lu bơngai mă gơnang kơ Sư, wă kơ bơ̆n gơh brŏk tơ 'Bok Kei-Dei, kơlih kơ Sư arih ling-lang ưh kơ tôch. Păng Sư oei apinh 'Bok Kei-Dei ling-lang wă tơgŭm bơ̆n.

²⁶ Thoi noh bơ̆n băt kơ Yêsu boih pơm 'bok soi tih gơh tơgŭm bơ̆n tơpă. Sư 'lơ̆ng tơpăt ưh kơ lah pơm yoch, lu bơngai yoch kư̆m ưh kơ gơh pơhlŭ Sư pơm kơnê̆. Sư mơsêh tŏk oei ưh kơ băt hơdôm tăl plĕnh.

²⁷ Lu 'bok soi nai, rim năr lu sư soi kơ 'Bok Kei-Dei. Lu sư soi pơ'lơ̆ng gah tơdrong yoch lu sư kơdih 'mơ̆i, na soi kơ lu kon pơlei pơla. Mă-lei gah Yêsu ưh ôh, Sư soi akâu Sư kơ 'Bok Kei-Dei minh 'măng tơ 'long pơglang tôm boih.

²⁸ Tơdrong juăt sơ̆ 'Bok Kei-Dei pôk kon bơngai pơm 'bok soi tih, pôk tă kơ lu kon bơngai bơ̆n rơdu tơrăn ngăl. Mă-lei đơ̆ng rŏng kơ 'Bok Kei-Dei ăn tơdrong juăt noh, 'Bok Kei-Dei pơkă kơjăp tơpă pôk Kon Sư kơdih pơm 'bok soi hloi, Kon Sư pơm tôm tơdrong 'blep trŏ ling-lang.