Hêbrơ 5 - Sơ̆p Hlabơar Nơ̆r 'Bok Kei-Dei

¹ Rim 'nu lu 'bok soi tih 'Bok Kei-Dei rơih iŏk sư đơ̆ng khŭl kon bơngai wă jang tang lu bôl sư lơ̆m tơdrong soi sơmah kơ 'Bok Kei-Dei, wă kơ 'Bok Kei-Dei huay kơ jô̆ yo kơ tơdrong yoch lu bôl sư.

² Lu sư băt mơnat kơ lu bơngai mă kơhlôh kơwao, lu bơngai yoch, yua kơ lu sư kư̆m hơdai tơrăn lei-lăi thoi lu bôl buăl.

³ Ưh kơ sĭ lu sư pơyơ̆r tơmam soi yua kơ tơdrong yoch lu bôl buăl đĕch ôh, lu sư pơyơ̆r tơmam soi yua kơ tơdrong yoch lu sư kơdih hai.

⁴ Tơdrong pơm 'bok soi tih, tơ̆ng 'Bok Kei-Dei ưh kơ rơih iŏk, kon bơngai ưh kơ đei bu gơh pơm kơdih ôh; đơ̆ng 'Bok Kei-Dei rơih iŏk na kon bơngai gơh pơm. Thoi 'bok Arôn sơ̆ 'Bok Kei-Dei rơih iŏk 'mơ̆i na sư gơh pơm 'bok soi tih.

⁵ Yêsu Krist kư̆m thoi noh, Sư ưh kơ gơh pôk akâu Sư kơdih pơm 'bok soi tih ôh, 'Bok Kei-Dei pôk Sư. 'Bok Kei-Dei khan kơ Sư thoi âu: “Ih boih Kon Inh, năr âu Inh wă ăn kơ Ih pơgơ̆r.”

⁶ Tơ anih nai Sư kư̆m đei khan thoi âu: “Ih pơm 'bok soi ling-lang ưh kơ tôch, kiơ̆ kơ Ih adrĕch pơm tih thoi Mêlkisêdek.”

⁷ Kơplah Yêsu oei tơ teh âu sơ̆, Sư krao pơret 'Bă Sư păng hmoi apơi kơ 'Bă Sư, yua kơ Sư băt kơ 'Bă Sư gơh tơdŏng Sư đơ̆ng tơdrong lôch. Na 'Bok Kei-Dei mơ̆ng Sư, yua kơ Sư chu yom kơ 'Bok Kei-Dei.

⁸ Mă khan Sư Kon 'Bok Kei-Dei, Sư kư̆m hơdai pơmat-tat, na Sư băt kơ adrin chu yom kơ 'Bok Kei-Dei.

⁹ Sư pơm dôm tơdrong tơnen 'blep thoi 'Bok Kei-Dei, na 'Bok Kei-Dei ăn kơ Sư pơm tơm gah tơdrong dŏng pơklaih dôm lu bơngai mă băt chu kơ Kon Sư, đơ̆ng tơdrong phak ăn arih ling-lang,

¹⁰ yua kơ 'Bok Kei-Dei pôk Sư pơm 'bok soi tih kiơ̆ kơ Sư adrĕch tih Mêlkisêdek.

Bơngai lui đunh boih mă tam hlôh tơdrong 'Bok Kei-Dei

¹¹ Gah tơdrong 'bok 'noh inh 'maih roi tơblang kơ iĕm, mă inh gleh 'biơ̆ tơblang kơ iĕm, yua kơ iĕm ưh kơ gan hlôh.

¹² Iĕm lui đunh boih, trŏ kơ iĕm pơm 'bok bơtho, bơtho lu bơngai nai dơ̆ng, mă iĕm âu oei kăl kơ đe bơtho iĕm, dang đe bơtho tơdrong 'Bok Kei-Dei kơ lu bơngai 'nao lui. 'Noh inh băt kơ iĕm oei gĭt kơ đak toh đĕch, ưh tam gơh ăn kơ iĕm sa tơmam arăng ôh.

¹³ Bơngai bu oei gĭt kơ đak toh, bơngai 'noh oei 'lơ̆p tơpă. Sư ưh tam hlôh wao tơdrong 'lơ̆ng, tơdrong kơnê̆ ôh.

¹⁴ Pôm lu bơngai pơm kră đĕch gơh sa tơmam arăng, lu sư pơhrăm đunh boih, lu sư băt kơnăl kơ tơdrong 'lơ̆ng, tơdrong kơnê̆ boih.