Hêbrơ 2 - Sơ̆p Hlabơar Nơ̆r 'Bok Kei-Dei

¹ Kơlih kơ thoi noh na dang ei bơ̆n kơtơ̆ng kơtăi boih dôm tơdrong đe bơtho, bơ̆n athei kơchăng 'biơ̆ hli kơ bơ̆n jrok trong nai dơ̆ng.

² Sơ̆ linh jang tơbăt ăn kơ Môis tơdrong juăt kơjăp dêh, na tôm tơdrong yoch kon bơngai pơm mă tih mă iĕ đei tơdrong phak ngăl. Đe phak kiơ̆ kơ tơdrong yoch sư pơm tih dah iĕ.

³ Mă tơdrong Yêsu Kon 'Bok Kei-Dei kăl hloh kơ noh dơ̆ng. Thoi noh, tơ̆ng bu ưh kơ gơnang kơ Yêsu pơklaih sư, bơngai noh gô đei tơdrong phak tơpă. Tơdrong Kră Yang Yêsu Krist pơklaih bơ̆n, Sư kơdih tơbăt ăn kơ đe sơ̆ na đe tơbăt ăn kơ bơ̆n.

⁴ 'Bok Kei-Dei ăn kơ lu bơngai noh gơh pơm lơ tơdrong mơsêh wă tơbăt kơ bơ̆n tơdrong noh sĭt tơpă. Păng Sư ăn kơ lu bơngai lui, Yang Bơhngol 'Lơ̆ng hơgei gơh pơm lơ tơdrong nai dơ̆ng, mă Sư ăn pơm kiơ̆ thoi Sư lăp đon.

Yêsu pơgơ̆r pơm Pơtao yua kơ Sư chu iŏk tơdrong pơmat

⁵ Mă-lei gah tơdrong pơgơ̆r plĕnh păng teh ning-mônh, Sư ưh kơ ăn kơ lu linh jang pơgơ̆r ôh.

⁶ Đe chih roi tơ lăm sơ̆p hla bơar 'Bok Kei-Dei khan: “Ơ Kră Yang, kon bơngai nhôn dang yơ na Ih mah tơchĕng dêh; kon bơngai nhôn yua kiơ kơ Ih na Ih mah 'mêm 'măi kơ nhôn?

⁷ Ih ăn kơ nhôn kơđeh 'biơ̆ kơ lu linh jang, mă-lei ưh kơ mah kơđeh dêh. Ih kư̆m ăn kơ nhôn dang lĕ kơ pơm 'bok pơtao;

⁸ nhôn gơh pơgơ̆r tôm tơdrong.” Tơ̆ng thoi ei tơpă, ưh kơ đei tơdrong kiơ mă kon bơngai ưh kơ gơh pơgơ̆r. Mă-lei dang ei bơ̆n ưh tam 'bôh kon bơngai pơgơ̆r tôm tơdrong.

⁹ Bơ̆n 'bôh pôm Yêsu đĕch kơplah Sư oei tơ teh âu sơ̆ Sư dang lĕ kơ iĕ 'biơ̆ kơ lu linh jang, mă-lei lăp minh yuh đĕch. Pôm Sư đĕch bơ̆n 'bôh thoi lĕ kơ kon bơngai mă 'Bok Kei-Dei pôk Sư pơgơ̆r pơm Pơtao, yua kơ Sư chu iŏk tơdrong lôch pơmat tang đĭ rim 'nu bơngai, yua kơ 'Bok Kei-Dei 'mêm kơ bơ̆n.

¹⁰ 'Bok Kei-Dei pơjing tôm tơdrong. Tôm tơdrong Sư pơjing, noh Sư wă kơ đe ư-ang kơ Sư. Thoi noh na trŏ kơ Sư ăn kơ Yêsu đei tơdrong pơmat-tat, wă kơ Yêsu iŏk tôm tơdrong thoi kon bơngai bơ̆n wă kơ Sư gơh anhăk ba lơ bơngai klaih đơ̆ng tơdrong yoch. Thoi noh na đĭ-đăng lu kon Sư nai kư̆m hiôk lei-lăi thoi Yêsu.

¹¹ Yêsu pơklaih bơ̆n đơ̆ng tơdrong yoch păng pơyơ̆r bơ̆n kơ 'Bok Kei-Dei yua kơ Sư lăng bơ̆n thoi 'nhŏng oh pôm mĕ 'bă tơpă, 'Bă tơm bơ̆n lăp minh 'nu đĕch, Sư mă oei tơ plĕnh ti. Mă bơngai thoi bơ̆n, Sư kư̆m lăp đon kơ anăn bơ̆n 'nhŏng oh Sư.

¹² Tơdrong noh kư̆m thoi Sư khan kơ 'Bă Sư sơ̆ thoi âu: “Inh gô pơư pơang anăn Ih kơ lu 'nhŏng oh Inh tơ anăp lu sư mă oei akŭm bôl lơ; păng inh hơri bơnê kơ Ih.”

¹³ Sư khan dơ̆ng thoi âu: “Inh gơnang kơ Ih tơpă.” Sư kư̆m khan dơ̆ng thoi âu: “Inh oei hơdai hăm lu kon Inh mă đơ̆ng Ih pơjao.”

¹⁴ Lu kon Sư noh wă khan kon bơngai bơ̆n, na Sư kư̆m jing thoi kon bơngai bơ̆n mơ̆n, wă kơ gơh lôch tang kon bơngai păng pơrăm yŏng pơgơ̆r yang sơmăt mă pơgơ̆r pơlôch kon bơngai.

¹⁵ Sư pơklaih kon bơngai đơ̆ng pơm đĭch yang sơmăt. Sơ̆ kon bơngai đĭch yang sơmăt ling-lang, lu sư hli dêh kơ tơdrong lôch.

¹⁶ Lu linh jang, Yêsu ưh kơ đei tơdŏng ôh, Sư tơdŏng lu bơ̆n mă kon sâu Abraham đĕch.

¹⁷ Sư pơm tôm tơdrong dang kơ 'nhŏng oh tơpă. Sư jang tơdrong 'Bok Kei-Dei pơklaih yoch kon bơngai thoi 'bok soi tih mơnat kơ kon bơngai, na kon bơngai gơnang kơ Sư tơpă.

¹⁸ Yêsu đei tơdrong pơmat, tơdrong pơhlŭ, na Sư mơnat kơ lu bơ̆n dang ei kơplah mă bơ̆n đei tơdrong pơhlŭ.