Hêbrơ 1 - Sơ̆p Hlabơar Nơ̆r 'Bok Kei-Dei

'Bok Kei-Dei wơh Kon Sư kơdih jur pơtruh kơ bơ̆n tơdrong Sư

¹ Chăl arih lu yă 'bok bơ̆n sơ̆, 'Bok Kei-Dei wơh lu 'bok khan lê̆ hơdrol năm pơtruh kơ lu yă 'bok bơ̆n gah tơdrong Sư lơ 'măng phara pha.

² Mă-lei gah chăl arih lu bơ̆n ahrei, Sư wơh Kon Sư kơdih năm pơtruh kơ bơ̆n. Sư kư̆m ăn kơ Kon Sư gơh pơjing plĕnh pơjing teh păng pơgơ̆r tôm tơdrong.

³ 'Bă Sư thoi lĕ kơ măt 'năr, Kon Sư thoi lĕ kơ hơdah. Tơdrong hơbŏ Sư kư̆m thoi lĕ kơ 'Bă Sư, Sư pơgơ̆r đĭ-đăng kơ plĕnh păng teh, yua kơ Sư Yang, Sư mơsêh tơpă. Păng Sư đei jur tơ teh âu ăn akâu Sư kơdih dŏng pơklaih kon bơngai đơ̆ng tơdrong yoch. Đang tơdrong 'noh boih na Sư tŏk oei gah 'ma kơ 'Bă Sư pơgơ̆r tơ kơpal plĕnh ti.

Kon 'Bok Kei-Dei tih hloh kơ lu linh jang

⁴ 'Bă Sư ăn kơ Sư tih hloh kơ lu linh jang, thoi noh mă 'Bă Sư krao kơ Sư Kon. Sư tih hloh kơ lu linh jang tơpă.

⁵ 'Bok Kei-Dei ưh tam layơ khan kơ linh jang, dang Sư khan kơ Kon Sư sơ̆ khan: “Ih boih Kon Inh, năr âu Inh wă ăn kơ Ih pơgơ̆r.” Sư kư̆m khan dơ̆ng thoi âu: “Inh pơm 'Bă Ih, Ih pơm Kon Inh.”

⁶ Thoi noh na kơplah năr mă Sư ăn Kon Sư kơdih jur tơ teh âu sơ̆, Sư krao đĭ-đăng kơ lu linh jang Sư khan: “Ơ đĭ-đăng lu linh jang Inh, kơkuh kơ Sư bĕ.”

⁷ Na Sư khan dơ̆ng gah lu linh jang Sư khan: “Inh ăn kơ lu linh jang mă pơm đam Inh, jang hơbĕch dang kial hơbal dang pla ŭnh.”

⁸ Mă-lei gah Kon Sư kơdih khan thoi âu: “Ih Kră Yang tơoei kơpal tang-dŏ pơgơ̆r ling-lang ưh kơ layơ tôch; Ih pơgơ̆r 'lơ̆ng tơpăt.

⁹ Ih lăp đon kơ tơdrong 'lơ̆ng areh kơ tơdrong kơnê̆. Yua kơ thoi noh na 'Bok Kei-Dei Kră Yang Ih, pôk Ih oei tơ tang-dŏ păng pik kơ Ih đak pơgang 'bâu phu, ăn kơ Ih hiôk hloh, tih hloh kơ lu bôl buăl Ih.”

¹⁰ 'Bok Kei-Dei khan dơ̆ng kơ Sư thoi âu: “Ơ Kră Yang, blŭng-a sơ̆ Ih pơjing plĕnh pơjing teh, Ih pơjing kơdih ưh kơ đei bu nai pơjing.

¹¹ Mă plĕnh teh gô hiong răm, gah Ih oei oei ling-lang. Plĕnh teh đĭ so dŏ so don thoi lĕ kơ hơbĕn ao so.

¹² Mă-lei Ih gơh pơih tŭk thoi đe kuă kơ hrŭk hơbĕn ao so boih. Ih tơplih plĕnh teh 'nao kư̆m lei-lăi thoi đe tơplih hrŭk hơbĕn ao 'nao; Mă sơnăm Ih hơnơ̆ng lei-lăi ưh kơ layơ tôch.”

¹³ 'Bok Kei-Dei tam layơ khan kơ linh jang thoi Sư khan kơ Kon Sư thoi âu: “Ih kư̆ oei gah 'ma kơ Inh pơgơ̆r, Tơ̆p Inh blah rôp lu bơngai mă ayăt kơ Ih thuơ tơ kơnơl jơ̆ng Ih.”

¹⁴ Đĭ-đăng kơ lu linh jang, 'Bok Kei-Dei wơh lu sư jur chă tơgŭm lu kon bơngai mă Sư pơklaih ăn oei hơdai hăm Sư ning-mônh.