Hagai 1 - Sơ̆p Hlabơar Nơ̆r 'Bok Kei-Dei

Tơdrong bơtho mă mônh: Athei pơjing dơ̆ng hnam 'Bok Kei-Dei tơ pơlei Jêrusalem

¹ Sơnăm mă 'bar chăl pơtao Đarius, năr mônh khei tơdrâu, đei nơ̆r Kră Yang yua Hagai 'bok khan lê̆ adrol roi tơbăt ăn kơ Sôrôbabel, kon drŏ-nglo Salathiel kră wei-lăng char Juđa păng ăn Jêhôsua, kon drŏ-nglo Jêhôsađak, 'bok soi tơm thoi âu:

² Kră Yang Tih Hloh đei khan thoi âu: “Kon pơlei đei khan; ‘jơ 'năr tam mă truh wă khan jơ 'năr wă pơjing đơ̆ng hnam Kră Yang.’ ”

³ Thoi ei na đei nơ̆r đơ̆ng Kră Yang khan 'bơ̆t Hagai 'bok khan lê̆ adrol thoi âu.

⁴ “'Nâu hăm trŏ kơplah iĕm oei lăm hnam pĕng păng tơ̆r mă 'lơ̆ng na lê̆ hnam Kră Yang jing juơ rơhiăng.

⁵ Thoi noh dang ei Kră Yang Tih Hloh khan thoi âu: ‘Lăng bĕ trong iĕm năm.

⁶ Lu iĕm rei lơ mă-lei kĕch iŏk tŏ sĕt; sŏng sa ră mă-lei ưh kơ phĭ; nhă ră mă-lei ưh kơ hrăp; hrŭk mă ưh kơ tơtŏ. Păng lu mơ'nah jang chă jên; mong jên sư kơdih noh lăm kơdŭng hlôh.’

⁷ Kră Yang Tih Hloh khan: ‘Lu iĕm lăng lăng bĕ trong lu iĕm yak.

⁸ Tŏk bĕ tơ kơpal kông, chĕp ba tơ̆r brŏk păng pơjing hnam, Inh gô iŏk chhơp jơhngơ̆m păng Inh đei ư-ang,’ Kră Yang khan thoi noh.

⁹ ‘Lu iĕm pơtăm lơ mă-lei đei iŏk tŏ sĕt lu iĕm chĕp ba tơ hnam, na Inh dơhlu tŏk tơ kơpal.’ Kră Yang Tih Hloh khan: ‘Noh yua kơ kiơ? Noh yua kơ đơ̆ng hnam Inh jing juơ rơhiăng na lu iĕm băt kơ pơm hnam iĕm kơdih.

¹⁰ Thoi noh yua kơ lu iĕm na plĕnh kư̆m pă tơjur tŭk păng teh kư̆m pă pơjing plei.

¹¹ Inh đei krao boih phang-ang kơpal teh đak, kơpal lu kông, tơ lu ba mi, tơ lu tơm hơmu tơ tơm ôliwơ păng tơ dêh mă pơjing lu tơmam plei sa tơ lu kon bơngai, tơ lu sem brem păng tơ dôm lu tơdrong jang mă ti ih đei pơm.’ ”

¹² Thoi Sôrôbabel kon drŏ-nglo Salathiel păng Jôsua kon drŏ-nglo Jêhôsađak, 'bok soi tơm păng lu kon pơlei mă oei đei. Mơ̆ng kiơ̆ nơ̆r Kră Yang 'Bok Kei-Dei sư păng nơ̆r Hagai khan lê̆ adrol mă Kră Yang 'Bok Kei-Dei đei wơh, thoi noh đĭ-đăng kon pơlei tă hli yom 'bơ̆t anăp Kră Yang ngăl.

¹³ Hagai bơngai Kră Yang wơh năm na khan tơbăt kơ kon pơlei kiơ̆ thoi nơ̆r Kră Yang bơtho tơbăt thoi âu: “Inh oei hơdai lu iĕm,” Kră Yang khan thoi noh.

¹⁴ Đơ̆ng noh, Kră Yang pơtrŭt jơhngơ̆m Sôrôbabel, kon drŏ-nglo Salathiel, yŏng pơgơ̆r Juđa păng pơtrŭt jơhngơ̆m Jêhôsua kon drŏ-nglo Jêhôsađak 'bok soi tơm păng kư̆m pơtrŭt jơhngơ̆m kon pơlei mă oei oei; lu sư tă kơ năm bơ̆jang tơ anih hnam Kră Yang Tih Hloh noh jơ̆ Kră Yang sư.

¹⁵ Noh năr 'bar-jĭt puăn khei tơdrâu gah sơnăm mă 'bar lăm chăl pơtao Đarius.