Habakuk 2 - Sơ̆p Hlabơar Nơ̆r 'Bok Kei-Dei

Tơdrong phak Lu bơngai Kalđê

¹ Inh gô dơ̆ng 'bơ̆t anih gak, 'bŭ jơ̆ng inh lăm kơđông kơjăp, răp lăng Kră Yang Sư pơma khan kơ inh tơdrong kiơ păng inh wă drơ̆ng Sư thoi yơ kơ tơdrong inh apinh Sư noh.

² Kră Yang tơl păng khan kơ inh thoi âu: “Ih athei chih dôm tơdrong ih đei 'bôh păng chih mă nhen rơđah tơ gơ'bang, wă kơ lu bơngai oei kơdâu gơh đŏk.

³ Yua kơ tơdrong tơ'bôh gô 'blep trŏ lăm năr đêl pơkă, gô keh thoi noh, ưh kơ đei pơngiĕl ôh; tơdah sư hiơ̆ 'biơ̆, ih kư̆ gô; yua kơ gô truh tơpă, ưh kơ hiơ̆ ôh.

⁴ Lu bơngai pơang, lăm jơhngơ̆m sư ưh kơ đei tơpăt, Mă-lei lu bơngai tơpăt gô arih yua đơ̆ng jơhngơ̆m đon lui sư kơdih.

⁵ Lu bơngai mă hơmui tơdrô, pơm tơdrong hơlĕnh păng ưh kơsŭk oei minh anih, pơih jơhngơ̆m ham sư thoi anih bơsat, thoi tơdrong lôch mă ưh kơ đei phĭ hrăp; sư pơpôi lu dêh char păng pơgơ̆p khŭl kon pơlei sư wă plah tơgar iŏk.”

⁶ Hăm trŏ lu bơngai noh gô iŏk nơ̆r che bơle na hiĕk kơ sư, iŏk nơ̆r pơjăm sư thoi âu: “Răm-'băm tơpă kơ lu bơngai mă mong pơpôi lu tơmam mă ưh trŏ kơ tơmam sư kơdih! Lu sư pơgŏ iŏk tơmam iŏk thuê̆ trăp tơgar đơ̆ng đe, lu sư wă pơm thoi noh dĭng dang yơ?

⁷ Ưh kơ đei bu wă kăp plơ̆ ih hă? Lu bơngai druh rôp ih ưh kơ hơđơ̆r hă? Ih đe gô tơgar iŏk.

⁸ Yua kơ ih đei blah iŏk lơ dêh char nai, na lu kon pơlei mă oei oei gô plah tơgar iŏk đơ̆ng ih dơ̆ng, yua kơ pham lu sư, yua kơ tơdrong kơnê̆ ih pơrăm teh đak, pơrăm pơlei tih păng đĭ-đăng kon pơlei lu sư.

⁹ Răm-'băm tơpă kơ lu bơngai bu jang sa ưh kơ tơpăt chă lơi kơ hnam dơnŏ kơdih akâu, wă pơm tơpu tơ kơpal kơjung, wă kơ klaih đơ̆ng ti lu bơngai pơm kơnê̆.

¹⁰ Ih chă pơm mơlâu kơ hnam dơnŏ ih kơdih păng pơlôch lơ kon pơlei pơla, ih đei pơrăm Bơhngol ih.

¹¹ Yua kơ tơmo lăm tơnăr gô ôr krao, 'long bơbŭng gô tơl tơwih.

¹² Răm-'băm tơpă kơ lu đe bu mă iŏk pham pơm pơlei păng iŏk tơdrong kơnê̆ pơjing pơlei tih!

¹³ Lăng, noh hăm trŏ đơ̆ng Kră Yang mă tih hloh? Mă kon pơlei jang gô ăn đĕch kơ ŭnh sa păng mă lu dêh char gleh hrat jing tơdrong ưh kơ đei.

¹⁴ Yua kơ gô băt hlôh tơdrong ư-ang Kră Yang 'bĕnh jơ̆p kơ teh thoi đak 'bĕnh kơ dơsĭ.

¹⁵ Răm-'băm dêh kơ lu bơngai bu mă tuh ăn tơdrô kơ lu kon pơlei đe huch, wă kơ đe suai, na 'maih lăng đe brao!

¹⁶ Ih gô 'bĕnh kơ tơdrong mơlâu, ưh kơ đei tơdrong ư-ang ôh, lei ih huch bĕ kơdih ih păng pơm thoi lu bơngai tam mă kăt tơdra akar. Pơnhan tơdrong hil Kră Yang chĕp lăm ti 'ma Sư gô tuh kơ ih tơdrong kơnê̆ 'mê̆-'mach gô klơ̆p lê̆ tơ tơdrong ư-ang ih.

¹⁷ Tơdrong ih pơm kơnê̆ tơ tơring Liban gô blơ̆ klơ̆p ih păng tơdrong ih pơlôch lu sem brem pơm ăn kơ ih hli tơrơ, yua kơ đơ̆ng pham đe ih yua pơlôch, yua kơ tơdrong kơnê̆ ih pơrăm teh, pơrăm lu pơlei tih păng đĭ-đăng kon pơlei pơla lu sư.

¹⁸ Rup hling man mă thơ̆ đei hling pơm, hăm đei lơi kiơ kơ sư? Man rup pơm yang, noh thoi 'bok thây bơtho hơlĕnh, đei yua kiơ? Mă lu thơ̆ man rup yang ưh kơ gơh pơma na kư̆m lui gơnang gơnăi đơ̆ng tơpang bơ̆n pơm kơdih?

¹⁹ Răm-'băm tơpă kơ lu đe bu khan kơ 'long rup pơm 'bih thoi âu: ‘Ih hơđơ̆r bĕ! Păng khan kơ rup yang tơmo klĭk thoi âu: ‘Iung bĕ ih!’ Bơtho tơ'bôh lu nhôn? Âu, sư noh jơ̆ kơtuăl hu maih đĕch, ưh kơ gơh dui jơhngơ̆m.

²⁰ Mă-lei Kră Yang oei tơ lăm hnam 'lơ̆ng rơgoh Sư, 'bơ̆t anăp Sư, jơ̆p kơ lăm teh gô ngăn hreh.”