Habakuk 1 - Sơ̆p Hlabơar Nơ̆r 'Bok Kei-Dei

Bơngai Kalđê phak bơngai Juđa

¹ Nơ̆r mă Kră Yang 'Bok Kei-Dei tơ'bôh kơ Habakuk bơngai khan lê̆ adrol.

² Ơ Kră Yang inh ôr krao Ih mă Ih ưh kơ wă mơ̆ng Ih ngăn kơ inh dĭng dang yơ. Inh apinh krao Ih yua kơ tơdrong đe wă pơlôch, na Ih ưh kơ wă dŏng pơklaih.

³ Kơlih kơ kiơ Ih ăn kơ inh 'bôh tơdrong đe pơm kơnê̆ păng yua kơ kiơ Ih kuăr ti lăng đĕch tơdrong ưh kơ trŏ noh? Tơdrong pơrăm 'bơ̆t anăp inh; đei tơdrong pơjah pơjăng băl.

⁴ Thoi noh khôi juăt pă đei yua boih păng tơdrong tơpăt ưh pă pơdah. Lu bơngai kơnê̆ wang tăp dăr kơ lu bơngai tơpăt, yua kơ thoi noh na tơdrong sek tơlang jing ưh kơ hơnơ̆ng.

⁵ “Lăng bĕ tơ lăm lu dêh char, na ih 'bôh hlĭch păng chrêu kơ đon! Yua kơ Inh oei gô đei wă pơm lăm chăl ih, mă khan đei bơngai roi kơ iĕm ră, Mă-lei iĕm ưh kơ lui.

⁶ 'Nâu Inh ăn kơ lu bơngai Kalđê iung blah, sư jing minh adrĕch kơnê̆ pran kơtang năm tơ jơ̆p teh đak wă blah tơgar iŏk lu anih mă ưh kơ trŏ kơ teh đak lu sư.

⁷ Lu sư trŏ kơ hli krưp dêh tơpă, tơdrong pơrŏ pơang păng tơdrong sek tơlang tă kơ lĕch đơ̆ng lu sư kơdih.

⁸ Lu linh aseh sư kơdâu hơbal hloh kơ djrang păng nuih hloh kơ kŏ-so tơ kơmăng. Lu linh aseh sư năm tơ jơ̆p-jang anih hơbĕch hơbal truh đơ̆ng dêh ataih; lu păr hrĕnh thoi sem kring, hăt hot kơ chă sa.

⁹ Đĭ lu sư noh truh wă pơm kơnê̆ ngăl, chă pơlôch đe linh lu sư nuih năm tơ anăp, thoi hơbŭt păng akŭm pơpôi lu bơnă lơ thoi chuơh dơsĭ.

¹⁰ Lu sư hiĕk pơjăm lu pơtao, hiĕk ăr kơ lu kuan pơgơ̆r păng hiĕk pơjăm kơ lu kơđông kơjăp. Sư kôch teh bơ̆ kơjăp, wă tŏk blah iŏk.

¹¹ Đơ̆ng noh lu sư gô năm yoh tơ anăp thoi kial bah, lu sư pơm yoch tih kơkuh kơ jơhngơ̆m pran lu sư kơdih yua kơ lu sư.”

¹² Ơ Kră Yang, 'Bok Kei-Dei inh, Kră Yang mă Tơ'ngla 'lơ̆ng rơgoh! Ih bơih Kră Yang đei đơ̆ng blŭng-a ala chă sơ̆ mă truh tơ ning-mônh dah kiơ? Thoi noh na lu nhôn huay kơ lôch! Ơ Kră Yang, Ih đei hơmet pơjing boih kon pơlei pơla âu wă sek phak lu nhôn. Ơ Tơmo kơjăp! Ih đei dan boih sư wă kơ phak pơbral, bơtho pơjĭ nhôn.

¹³ Măt Kră Yang 'lơ̆ng rơgoh ưh kơ wă lăng ôh tơdrong kơnê̆, kư̆m ưh kơ wă lăng dôm tơdrong ưh kơ trŏ. Liơ Ih lê̆ kơ lu bơngai hơlĕnh. Tơdah lu bơngai kơnê̆ luăn sa lu bơngai mă tơpăt hloh kơ lu sư, yua kơ kiơ Ih ĕnh thoi noh?

¹⁴ Yua kơ kiơ Ih pơm ăn kơ kon bơngai thoi ka lăm đak dơsĭ păng thoi ka jrŭm se ưh kơ đei yŏng pơgơ̆r.

¹⁵ Sưa đei iŏk boih akâu wah, wah hơđuh iŏk đĭ, dui akŭm lăm hơnhuăl sư păng pơpôi lăm jal sư, thoi noh lu sư chơt hiôk chhôk 'nă hal.

¹⁶ Yua kơ thoi noh, sư soi sơmah kơ hơnhuăl sư păng soh nhang pơgang 'bâu phu kơ jal sư, yua kơ đơ̆ng jal noh na lu sư đei phĭ bek 'lơ̆ng sŏng sa rơkah rơkai.

¹⁷ Lei na wă dăng klơ̆m hơnhuăl pơlôch pơrăm lu kon pơlei ưh kơ pơdơh hă?