Galati 4 - Sơ̆p Hlabơar Nơ̆r 'Bok Kei-Dei

^1-2 Na dang ei inh wă pơma pơtrơp tơdrong 'noh hei. Pơtih gia kơ minh 'nu bơngai lôch achăng kon sư oei 'lơ̆p. Hơdrol kơ sư lôch sư pơkă kơ kon sư khan mưh kon sư tih tơdăm boih, athei kon sư iŏk tơwih dôm lu mŭk tơmam mă sư pơjao kơ kon sư. Kơplah kon sư oei 'lơ̆p đe jô̆ tơmam noh tơmam kon sư mơ̆n, mă-lei đei bơngai nai wei-lăng akâu kon sư păng tơmam kon sư, na kon sư dang bơngai đĭch đĕch, sư ưh kơ gơh pơm kiơ̆ kơ đon sư tơchĕng kơdih ôh. Mă-lei mưh truh sư 'lŏ boih sư iŏk tơwih kơdih đĭ-đăng mŭk tơmam 'bă sư păng gơh jang kiơ̆ kơ đon sư tơchĕng kơdih.

³ Bơ̆n kư̆m thoi noh mơ̆n sơ̆. Lu bơ̆n thoi lĕ kơ bơngai đĭch đe, chu kiơ̆ tôm tơdrong juăt kon bơngai tơpă.

⁴ Mă-lei truh boih năr 'Bok Kei-Dei pơkă, Sư wơh Kon Sư jur tơ ala teh âu. Kon bơngai bơ̆n tơpŭ kơ Sư, thoi noh na Sư kiơ̆ tôm tơdrong juăt kon bơngai.

⁵ Sư wă kơ gơh huai iŏk đĭ-đăng bơngai bơ̆n mă kiơ̆ tơdrong juăt kon bơngai, na bơ̆n jing kon Kră Yang 'Bok Kei-Dei.

⁶ Bơ̆n băt boih bơ̆n jing kon Sư tơpă, yua kơ Sư wơh Yang Bơhngol 'Lơ̆ng đơ̆ng Kon Sư jur oei păng bơ̆n, Sư bơtho bơ̆n krao kơ 'Bok Kei-Dei Aba, 'Bă.

⁷ Thoi noh bơ̆n huay pă thoi bơngai đĭch dơ̆ng boih yua kơ 'Bok Kei-Dei ăn kơ bơ̆n jing kon Sư. Yua kơ bơ̆n kon Sư na Sư ăn kơ bơ̆n tôm tơdrong 'lơ̆ng.

Pôl 'mêm kơ lu bơngai Galati

⁸ Sơ̆ iĕm ưh kơ băt chă Kră Yang 'Bok Kei-Dei ôh, na mă iĕm jing đĭch yang nai, mă-lei yang noh ưh kơ yang tơpă ôh.

⁹ Dang ei iĕm chă Kră Yang 'Bok Kei-Dei 'bôh boih; mă tơpă ưh kơ sĭ bơ̆n chă Sư ôh, Sư krao bơ̆n. Thoi noh boih na yua kơ kiơ iĕm wă kiơ̆ dơ̆ng tơdrong juăt kon bơngai? Kiơ̆ kơ tơdrong juăt noh ưh kơ yua kiơ ôh, ưh kơ đei tơgŭm minh tơdrong kiơ wă kơ bơ̆n yua ôh. Na lơliơ iĕm wă jing đĭch tơdrong juăt kon bơngai bơ̆n dơ̆ng?

¹⁰ Dang ei iĕm wă kiơ̆ tơdrong juăt kon bơngai tơpă, iĕm wă pơm kiơ̆ rim bơyan đe Juđê.

¹¹ Inh tơtăm kơ lu iĕm, hli kơ tơdrong jang inh tơgŭm iĕm mă ưh kơ đei yua.

¹² Ơ lu 'nhŏng oh mă 'mêm, inh wă kơ lu iĕm thoi inh. Inh kư̆m lei-lăi thoi iĕm mơ̆n sơ̆. Inh ưh pă gơnang kơ tơdrong juăt kon bơngai, na lui hloi kơ Yêsu. Iĕm huay kơ pơm glăi hăm inh ôh sơ̆, mă-lei đei pơm glăi hăm Kră Yang boih.

¹³ Iĕm oei 'blŏk mơ̆n rŏ lăng tơm hmơm sơ̆ inh năm chă bơtho đe tơdrong 'nao 'lơ̆ng 'blep kơ inh jĭ jăn na inh drong tơ pơlei iĕm, bơtho ăn kơ iĕm tơdrong 'nao 'lơ̆ng Yêsu Krist.

¹⁴ Inh jĭ dang noh ră sơ̆, mă-lei iĕm ưh kơ đei pơchê inh ôh păng iĕm kư̆m chu mơ̆ng inh bơtho iĕm mơ̆n. Iĕm sơng iŏk inh noh sơ̆ dang iĕm sơng iŏk linh jang 'lơ̆ng 'Bok Kei-Dei đơ̆ng plĕnh păng dang sơng iŏk Yŏng bơ̆n Yêsu Krist.

¹⁵ Inh lăng iĕm chơt hiôk tơpă kơplah inh bơtho iĕm sơ̆. Na lơliơ dang ei iĕm ưh kơ wă kơ inh dơ̆ng? Sơ̆ iĕm 'mêm kơ inh dêh, iĕm 'mêm kơ inh dang wă kuek klong măt iĕm tah tơ klong măt inh.

¹⁶ Đơ̆ng rŏng kơ noh lăp inh tơ nai na đei lu bơngai năm pơtuah pơhlŭ iĕm. Inh kư̆m khan kơ iĕm tơpă boih ki, tơdrong sư pơtuah pơhlŭ iĕm noh ưh kơ yua kiơ kơ iĕm ôh, mă-lei dang ei iĕm lăng inh dang bơngai ayăt kơ iĕm hă?

¹⁷ Lu bơngai mă juăt kơ pơtuah iĕm thoi noh, lu sư lăp đon kơ iĕm mơ̆n, mă-lei lu sư kuă kơ tơgŭm iĕm. Lu sư wă kơ iĕm achăng lê̆ inh, na kiơ̆ lu sư. Lu sư wă kơ iĕm 'mêm kơ lu sư.

¹⁸ Gah lu buăl bơ̆n, dah lu sư 'mêm kơ iĕm tơpă trŏ mơ̆n, dah lu sư wă tơgŭm iĕm tơpă. Inh oei păng iĕm inh wă tơpă tơgŭm iĕm; na dang ei inh oei tơ nai, lê̆ kơ buăl bơ̆n dơ̆ng tơgŭm iĕm.

¹⁹ Ơ lu kon inh mă 'mêm kơeng, inh wă pơtih gia kơ minh 'nu bơngai drŏ-kăn sư wă tơpŭ kơ kon sư, sư sơ'ngon tơpă mơ̆n, yua kơ sư jĭ. Hlôi sư tơpŭ boih na sư gơh hiôk. Inh kư̆m lei-lăi thoi noh mơ̆n, kơplah iĕm 'nao wă pơtơm lui sơ̆ păng dang ei mơ̆n. Inh sơ'ngon tơpă, inh hli kơ iĕm achăng lê̆ tơdrong lui iĕm. Inh wă kơ iĕm lui kiơ̆ Yêsu Krist trŏ thoi Sư wă 'mơ̆i na inh gơh hiôk chơt.

²⁰ Inh 'maih ră mơ̆n oei hơdai păng iĕm dang ei, wă kơ gơh pơma dơnuh hăm iĕm. Inh đĭ sơleng kơ đon tơpă, ưh kơ băt pơm thoi yơ boih tơdrong iĕm dang ei.

Pơtih gia kơ yă Hơgar păng yă Sara

²¹ Iĕm khan wă kiơ̆ tôm tơdrong juăt Môis tơpă, na dang ei inh wă kơ iĕm đŏk lăng tôm kơ hla bơar tơdrong juăt Môis bĕ, wă kơ iĕm hlôh.

²² Lăm hla bơar sư chih roi sơ̆ khan Abraham đei 'bar 'nu kon drŏ-nglo. Minh 'nu kon đei đơ̆ng sư iŏk đĭch sư pơm akăn. Na gah minh 'nu kon sư dơ̆ng đơ̆ng akăn tơm sư tơpŭ.

²³ Kon sư mă tơpŭ đơ̆ng sư iŏk kơdih đĭch sư noh, sư tơpŭ rok thoi bôl buăl hmă. Mă-lei kon đơ̆ng akăn tơm sư noh, sư tơpŭ kiơ̆ thoi 'Bok Kei-Dei mơnat kơ Abraham khan wă gô ăn kơ sư kon.

^24-25 Tơdrong noh sơ̆ wă pơtih gia kơ bơ̆n thoi âu: 'Bar 'nu akăn sư noh wă khan 'bar tơdrong 'Bok Kei-Dei pơgơ̆p hăm bơ̆n. Minh tơdrong pơgơ̆p noh wă khan tơdrong 'Bok Kei-Dei ăn kơ Môis tơdrong juăt tơ kông Sinai lăm dêh Arabia sơ̆. Dôm lu bơngai mă kiơ̆ tơdrong juăt noh sơ̆, lu sư ưh kơ wă gơnang kơ Yêsu ôh. Thoi noh na lu bơngai mă kiơ̆ tơdrong juăt noh lu sư dang lĕ kơ oei đĭch mơ̆n. Tơdrong noh wă pơtih gia kơ yă Hơgar sư đĭch Abraham, na Abraham iŏk pơm akăn kơdih, truh tơ kon sư kư̆m oei dang đĭch mơ̆n. Yă Hơgar kư̆m wă pơtih gia kơ Pơlei Jêrusalem mơ̆n, yua kơ lu kon pơlei Jêrusalem kư̆m oei thoi lĕ kơ đĭch yua kơ lu sư gơnang kơ akâu kơdih wă kiơ̆ tơdrong juăt Môis khan gơh klaih đơ̆ng tơdrong yoch.

²⁶ Mă-lei kư̆m đei minh pôm Pơlei Jêrusalem nai tơ kơpal plĕnh ti đĕch gơh rơngei. Lu bơngai mă gô oei tơ noh gơh rơngei, yua kơ lu sư lui kơ Yêsu Krist. Pơlei noh wă pơtih gia kơ yă Sara mĕ bơ̆n.

²⁷ Lăm sơ̆p hla bơar 'Bok Kei-Dei khan kơ Pơlei Jêrusalem tơ kơpal plĕnh ti thoi âu: “Ơ bơngai hơwŏng, mă kơ biơh jĭ anăp, mă-lei ih gô chơt tơpă. Klo ih achăng lê̆ ih boih, mă-lei ning-mônh ih gô đei kon lơ hloh kơ bơngai mă đei klo dang ei.”

²⁸ Nge Isăk sơ̆, mĕ sư Sara tơpŭ kiơ̆ thoi 'Bok Kei-Dei mơnat khan wă gô ăn kơ Abraham kon. Thoi noh na bơ̆n dang ei kư̆m lei-lăi mơ̆n, bơ̆n jing kon 'Bok Kei-Dei yua kơ Sư mơnat khan wă gô ăn kơ bơ̆n jing kon Sư.

²⁹ Hơtai noh sơ̆ kon yă Hơgar bơngai mă tơpŭ rok thoi bôl buăl, lăp sư 'lŏ boih sư pơm kơnê̆ kơ kon mă tơpŭ kiơ̆ thoi Yang Bơhngol 'Lơ̆ng tơgŭm. Na dang ei kư̆m thoi noh mơ̆n. Lu bơngai mă gơnang kơ akâu sư kơdih wă kiơ̆ tơdrong juăt Môis, lu sư pơm kơnê̆ kơ lu kon 'Bok Kei-Dei mă đơ̆ng Yang Bơhngol 'Lơ̆ng ăn tơpŭ kiơ̆ thoi Sư wă.

³⁰ Sơ̆p hla bơar 'Bok Kei-Dei khan kơ Abraham thoi âu: “Ih athei achăng akăn hle mă ih iŏk kơdih đĭch noh păng kon biĕm pơjing noh yua kơ kon biĕm pơjing noh ưh kơ gơh ôh iŏk mŭk tơmam ih hơdai kon akăn rơngei ih.”

³¹ Na gah bơ̆n dang ei, bơ̆n ưh kơ sĭ thoi kon mă akăn đĭch sư noh ôh, bơ̆n thoi kon mă akăn rơngei sư noh.