Esther 8 - Sơ̆p Hlabơar Nơ̆r 'Bok Kei-Dei

Pơtao ăn tơdrong rơngei kơ bơngai Juđa

¹ Lăm năr noh pơtao Asêrus jao ăn kơ yă pơtao Esther bri seh teh choh mŭk tơmam hnam oei Haman bơngai mă ayăt kơ adrĕch bơngai Juđa păng Morđêkai năm 'bơ̆t anăp pơtao, yua kơ Esther roi kơ sư noh 'nhŏng oh sư kơdih.

² Pơtao plôh iŏk tơkhiĕn mă đêl sư pơsĭt đơ̆ng Haman jao kơ Morđêkai yă pơtao Esther jao ăn kơ Morđêkai wei-lăng hnam đêl Haman oei.

³ Esther pơma dơ̆ng hăm pơtao sư drap 'bơ̆t jơ̆ng pơtao, nhơ̆m apinh hơdrĭ 'bơ̆t pơtao apinh pơtao pơrăm lê̆ tơdrong Haman bơngai Agak chă đon wă pơrăm adrĕch Juđa.

⁴ Pơtao yơ̆r 'long jra maih kơ yă Esther. Đơ̆ng noh yă Esther iung dơ̆ng 'bơ̆t anăp pơtao.

⁵ Na sư khan thoi âu: Tơdah ih lăp đon tơdah ih mơnat kơ inh, tơdah ih lăng tơdrong âu lăp 'lơ̆ng 'bơ̆t anăp ih, na apinh chih hla bơar tơjur nơ̆r hŭt lê̆ tơdrong Haman bơngai Agak kon drŏ-nglo Hamadatha chih hla bơar wă pơrăm adrĕch Juđa mă oei jơ̆p kơ lăm dêh char pơtao.

⁶ Liơ inh gơh kĕ chu iŏk tơdrong răm truh kơ adrĕch adrung inh? Păng liơ inh gơh kĕ dơ̆ng lăng kon pơlei inh răm rai.

⁷ Pơtao Asêrus khan kơ yă pơtao Esther păng Morđêkai bơngai Juđa thoi âu: 'Nâu inh jao boih hnam Haman kơ yă pơtao Esther, đe hrek atol boih Haman tơ kơpal gơ̆ng, yua kơ sư wă pơrăm bơngai Juđa.

⁸ Thoi noh măr iĕm chih roi bĕ kiơ̆ kơ măr iĕm tơchĕng lăp gah adrĕch Juđa hăm anăn pơtao păng iŏk tơkhiĕn pơtao pơsĭt; yua kơ lăm tơdrong juăt đei chih hăm anăn pơtao păng chơ̆m pơsĭt boih hăm tơkhiĕn pơtao đe ưh pă gơh tơplih dơ̆ng.

⁹ Lăm năr noh hloi, năr 'bar-jĭt pêng khei pêng wă khan khei Siwan, kơplah noh bre Esther păng Morđêkai krao akŭm thây chih hla bơar lu sư chih kiơ̆ kơ nơ̆r Morđêkai pơtă chih ăn kơ adrĕch Juđa, gơih ăn kơ lu kuan tih lu kră pơgơ̆r char, kră pơgơ̆r tơring iŏk đơ̆ng Ânđô̆ truh tơ Êthiôpi, wă khan minh-hrĕng 'bar-jĭt tơpơh tŏ tơring char. Lu sư chih ăn tơring ayơ kiơ̆ kơ chư păng nơ̆r sư kơdih, chih ăn kơ lu adrĕch ayơ kiơ̆ kơ nơ̆r pơma lu sư kơdih, ăn kơ adrĕch Juđa kiơ̆ kơ chư păng nơ̆r pơma lu sư kơdih.

¹⁰ Morđêkai chih hăm anăn pơtao Asêrus păng iŏk tơkhiĕn pơtao chơ̆m pơsĭt hăm chih anăn sư, đơ̆ng noh wơh linh năm ba hla bơar noh hao aseh dăm, pran kuăng.

¹¹ Lăm hla bơar chih noh pơtao ăn lu bơngai Juđa lăm rim pơlei gơh akŭm băl hơdai wă dŏng tơdrong arih lu sư kơdih wă pơrăm pơlôch wă pơtôch tơhiong lu linh lu pơlei dah mă lu char wă pơrăm lu sư, hăm lu kon akăn lu sư, kư̆m ăn kơ lu sư gơh blah tơgar iŏk mŭk tơmam lu đe ayăt kơ lu sư.

¹² Tơdrong noh gơh pơm lăp minh năr lăm năr mơjĭt-pêng khei mơjĭt-'bar, wă khan khei Adar lăm jơ̆p-jang kơ char pơtao Asêrus pơgơ̆r.

¹³ Minh hlak hla bơar plơ̆ng chih rok nơ̆r pơtao gơih ăn kơ rim tơring char rim adrĕch băt wă kơ lu bơngai Juđa gô hơmet lăm năr noh wă pơm 'mong tơiung kơting đơ̆ng lu ayăt pơm.

¹⁴ Thoi noh lu bơngai năm ba hla bơar noh hao aseh dăm pran kuăng, hăt hot chu kiơ̆ nơ̆r pơtao pơkă athei. Hla bơar noh đe kư̆m đŏk tơbăt kơ kon pơlei lăm pơlei tih Susa.

¹⁵ Morđêkai lĕch đơ̆ng anăp pơtao hrŭk hơbĕn ao jơk kok, yơ̆l môk maih pơtao păng hrŭk ao tai che 'bui se 'brê hơhĭm, kơplah noh kon pơlei Susa ôr jreo chhôk hơnôk.

¹⁶ Adrĕch Juđa chơt hiôk chhôk 'nă hal hơdah hơdong. Kŭm đei tơdrong đe pơyom kơ lu sư.

¹⁷ Lăm rim tơring, rim pơlei, anih ayơ mă đei iŏk hla bơar pơkă đơ̆ng pơtao truh tơ tơring noh đei tơdrong chơt hiôk chhôk hơiă kơ adrĕch adrung Juđa, minh năr et sa chơt hiôk. Đei lơ lu bơngai lăm adrĕch char đe nai kư̆m khan kơ lu sư bơngai Juđa yua kơ lu sư hli dêh kơ bơngai Juđa pơm kơ lu sư.