Esther 3 - Sơ̆p Hlabơar Nơ̆r 'Bok Kei-Dei

Tơdrong Haman chă đon wă pơrăm lu adrĕch bơngai Juđa

¹ Đơ̆ng rŏng kơ tơdrong noh pơtao Asêrus pôk Haman bơngai Agak, kon drŏ-nglo Hamedatha, pơm tih hloh kơ đĭ-đăng lu kuan jang lăm hnam pơtao.

² Đĭ-đăng lu bơngai jang lăm anih pơtao ngôi 'bơ̆t 'măng dur pơtao lu sư wang drap kơkuh, kơkuh kơ Haman yua kơ pơtao pơkă thoi noh, mă-lei Morđêkai ưh kơ kơkuh ôh.

³ Lu bơngai jang lăm anih pơtao khan kơ Morđêkai. Liơ ih ưh kơ chu, kuă kiơ̆ nơ̆r pơtao pơkă?

⁴ Lu sư khan kơ Morđêkai rim năr, mă-lei sư ưh kơ wă mơ̆ng ôh. Lu sư roi ăn kơ Haman băt, lu sư wă gô lăng Morđêkai pơm thoi noh hăm jei sư ưh; yua kơ sư roi kơ lu sư khan sư bơngai Juđa.

⁵ Kơplah Haman 'bôh Morđêkai ưh kơ drap kơkuh kơ sư, sư blĕk dêh.

⁶ Haman băt kơ sư bơngai Juđa, sư khan ưh kơ sĭ sư wă pơlôch pôm Morđêkai đĕch ôh sư wă pơlôch đĭ adrĕch adrung Juđa, oei lăm jơ̆p-jang pơlei lăm dêh char pơtao Asêrus pơgơ̆r.

⁷ Lăm khei mônh, khei Nisan, lăm sơnăm mơjĭt-'bar chăl pơtao Asêrus đe dan lê̆ Pur 'bơ̆t anăp Haman wă kơ băt năr păng khei ayơ trŏ kơ pơm kơ lu bơngai Juđa. Lu sư dan lê̆ khŏm khŏm na trŏ kơ khei mơjĭt-'bar, khei Adar.

⁸ Haman khan kơ pơtao Asêrus thoi âu: Đei minh adrĕch adrung kơnê̆ dêh oei tơrak 'brak lăm lu kon pơlei ih tơ jơ̆p-jang tơring ih pơgơ̆r, tơdrong juăt lu sư phara hloh kơ lu adrĕch nai, na lu sư kư̆m ưh wă kiơ̆ tơdrong juăt ih tơtă, lê̆ lu sư arih kư̆m ưh kơ đei yua kiơ kơ ih.

⁹ Tơdah ih lăp đon chih hla bơar tơjur nơ̆r tơtă athei pơlôch đi lu sư, inh gô ăn jên apah lăm ti lu kuan pơgơ̆r oei lăm anih pơtao. Wă kơ lu sư tah jên noh lăm hnam tah tơmam pơtao.

¹⁰ Klaih kơ noh pơtao plôh tơkhiĕn đơ̆ng ti sư ăn kơ Haman wă pơsĭt bơngai Agak kon drŏ-nglo Hamedatha, bơngai mă ayăt kơ adrĕch Juđa.

¹¹ Pơtao khan kơ Haman jao boih kơ ih pơm bĕ mơ̆ng kơ ih wă.

¹² Lăm năr mơjĭt-pêng khei mă mônh, krao lu bơngai jang chih hla bơar tơbăt kơ tơdrong juăt kiơ̆ kơ Haman tơtă boih kơ lu kuan tih pơtao đĭ-đăng lu kră pơgơ̆r tơring păng đĭ kơ lu kră pơgơ̆r rim kon pơlei lăm jơ̆p kơ dêh, tơring ayơ chih kiơ̆ kơ nơ̆r sư kơdih, adrĕch ayơ chih kiơ̆ nơ̆r pơma sư kơdih. Lu đe chih tơdrong kĭ anăn pơtao Asêrus păng iŏk tơkhiĕn pơtao chơ̆m hla bơar noh.

¹³ Đe gơih hơtă kơ linh năm ba kơ đĭ-đăng tơring lăm char pơtao Asêrus, wă pơrăm pơlôch đĭ lu adrĕch adrung Juđa mă 'lơ̆p mă 'lŏ mă kră, mă drŏ-kăn, lăm năr mơjĭt-pêng khei mơjĭt-'bar khei Adar păng wă tơgar iŏk mŭk tơmam đơ̆ng lu sư.

¹⁴ Chih minh hlak hla bơar dơ̆ng ăn kơ jơ̆p-jang tơring, ăn kơ đĭ adrĕch adrung băt, wă kơ lu sư hơmet adrol kơ năr noh.

¹⁵ Lu bơngai chĕp hla bơar noh hăt hot pơm kiơ̆ kơ tơdrong pơtao tơtă. Nơ̆r tơtă âu kư̆m roi tơbăt lăm kon pơlei Susa. Pơtao păng Haman oei et tơdrô, mă-lei lăm lu kon pơlei Susa hli tơrơ dêh.