Esther 2 - Sơ̆p Hlabơar Nơ̆r 'Bok Kei-Dei

Asêrus iŏk Esther jing yă pơtao

¹ Đơ̆ng rŏng kơ dôm tơdrong noh, pơtao Asêrus huay pă blĕk boih na sư 'blŏk dơ̆ng kơ yă Wathi, tơdrong đêl yă Wathi pơm păng tơdrong sư đei tơjur nơ̆r tơtă wă pơm kơ yă Wathi.

² Lu pơm kuan tih oei jê̆ pơtao lu sư khan: Khŏm chă kơ ih hơdruh hle 'lơ̆ng guăng.

³ Apinh ih rơih chă lu kuan lăm rim tơring lăm dêh char ih pơgơ̆r wă chă akŭm đĭ-đăng lu hơdruh 'lơ̆ng guăng năm ba tơ pơlei tih Susa jao ăn kơ Hêgai linh krĕo bơngai mă juăt kơ wei-lăng lu akăn kơnhŏng pơtao, na athei asong pơgang 'bâu phu kơ lu sư wă pik.

⁴ Ăn hơdruh ayơ pơtao lăp đon, pơjing pôk sư pơm yă pơtao tơplih kơ yă Wathi. Nơ̆r noh pơtao lăp đon, na sư pơm hloi thoi noh.

⁵ Lăm pơlei Susa, đei minh 'nu bơngai Juđa anăn sư Morđêkai kon drŏ-nglo Jair sâu tơm Simei sâu i Kis bơngai Bênjamin,

⁶ bơngai mă đe chông đơ̆ng pơlei Jêrusalem pơm bơnă hơdai hăm Jêkônia pơtao Juđa kư̆m đơ̆ng Nebukatnessar pơtao đe Babilôn rôp.

⁷ Morđêkai rong ba Hadasah, kư̆m krao anăn sư Esther, kon hơdruh ma sư, akâu sư hơbŏ 'lơ̆ng. Đơ̆ng rŏng kơ mĕ 'bă sư lôch boih. Morđêkai iŏk rong ba pơm jing kon hơdruh sư kơdih.

⁸ Thoi noh kơplah đe đei roi tơbăt nơ̆r đơ̆ng pơtao tơtă păng đei lu hơdruh akŭm tơ lăm pơlei Susa pơjao ăn kơ Hêgai wei-lăng Esther đe kư̆m ba truh tơ hnam pơtao na kư̆m jao ăn kơ Hêgai wei-lăng.

⁹ Bơngai hơdruh mơlôh noh Hêgai lăp đon păng lăng mơnat; sư thar ăn hloi pơgang 'bâu phu wă pik păng ăn dôm tơmam kăl yua hăm tơmam sa. Păng kư̆m chă ăn tơpơh 'nu hơdruh 'lơ̆ng hơbŏ nai dơ̆ng lăm hnam pơtao, wă awih awăn kơ sư đơ̆ng noh ăn kơ sư năm hăm lu hơdruh noh. Lu sư năm oei tơ anih 'lơ̆ng hloh kơ lu hơdruh nai oei.

¹⁰ Esther ưh kơ đei roi kơ bu băt ôh adrĕch sư, hăm lu kon pơlei sư yua kơ Morđêkai pơkă kơ sư 'nĕ roi kơ bu băt.

¹¹ Rim năr Morđêkai năm tơ cham hnam lu hơdruh, wă kơ băt kơ Esther sư thoi yơ.

¹² Adrol kơ lu hơdruh wă năm tơ anăp pơtao Asêrus, athei iŏk pơgang pik wă kơ rơgoh 'lơ̆ng lăm mơjĭt-'bar khei: Tơdrâu khei pik đak 'long 'bâu phu. Tơdrâu khei pik đak pơgang 'bâu phu păng lu tơmam 'bâu phu kơ lu bơngai drŏ-kăn. Đơ̆ng rŏng kơ lu khei năr noh đĭ hlôi, rim 'nu hơdruh năm tơ anăp pơtao kiơ̆ kơ đe krao.

¹³ Sư mơ̆t tơ anih pơtao thoi âu: Kiơ̆ kơ rim 'nu lu sư wă chĕp ba tơmam kiơ kăl yua, đe ăn đơ̆ng hnam lu bơngai drŏ-kăn.

¹⁴ Kơmăng adruh ei năm, pơgê hrôih drôih brŏk tơ hnam lu drŏ-kăn mă 'bar anih Sigas linh krĕo bơ̆jang kơ pơtao wei-lăng lu akăn kơnhŏng pơtao. Mưh pơtao ưh kơ lăp đon kơ adruh ei, sư ưh pă mơ̆t tơ'bơ̆p pơtao dơ̆ng. Mưh pơtao wă kơ sư pơtao krao sư dơ̆ng.

¹⁵ Truh kơ jơ Esther kon hơdruh Abihai ma kơ Morđêkai, bơngai rong sư pơm jing kon kơdih sư, mơ̆t năm tơ anih pơtao, hơdruh noh ưh kơ đei wă apinh tơdrong kiơ, sư apinh pôm tơmam đơ̆ng Hêgai bơngai linh krĕo jang kơ pơtao wei-lăng lu hơdruh, tơ'bôh kơ sư. Esther đei lơ bơngai lăng sư mơnat.

¹⁶ Đe ba Esther năm mơ̆t lăm anih pơtao Asêrus lăm khei mơjĭt (khei Têbet) lăm sơnăm tăl mă tơpơh sư pơgơ̆r.

¹⁷ Pơtao 'mêm kơ Esther hloh kơ lu đe hơdruh nai, 'bơ̆t anăp pơtao lăng sư mơnat hloh kơ lu đe hơdruh nai, na pơyơ̆l ăn kơ sư môk pơtao tơ kơ̆l sư, pôk sư jing yă pơtao tơplih kơ yă Wathi.

¹⁸ Đơ̆ng noh pơtao pơih sŏng sa tih, krao lu kuan tih păng lu yŏng pơgơ̆r, hăm asong ăn đĕch tơmam kơ kon pơlei păng pơtao kư̆m tơjur thuê̆ lăp ai ăn kơ rim tơring.

¹⁹ Kơplah lu đe hơdruh akŭm mă 'bar, Morđêkai hơ-oei ngôi 'bơ̆t 'măng jang pơtao.

²⁰ Esther pơm kiơ̆ kơ nơ̆r Morđêkai pơkă kơ sư, ưh kơ đei roi kơ bu băt pơlei păng adrĕch sư; yua kơ sư chu kiơ̆ kơ nơ̆r Morđêkai thoi sư oei lăm hnam dơnŏ sư sơ̆.

²¹ Kơplah năr Morđêkai hơ-oei ngôi 'bơ̆t 'măng jang pơtao đei 'bar 'nu kuan gak trong 'măng tơm pơtao, anăn bre sư Bikthan păng Têres, bre sư hil kơ pơtao Asêrus păng chă đon wă pơlôch pơtao.

²² Morđêkai băt tơdrong noh na sư roi ăn kơ yă pơtao Esther. Yă Esther băt đơ̆ng Morđêkai na sư roi ăn kơ pơtao băt, khan sư kơtơ̆ng đơ̆ng Morđêkai.

²³ Đe chă apinh lăng tơdrong noh trŏ thoi ei tơpă na đe chô̆ atol hơko bre sư tơ 'long gơ̆ng kơjung. Tơdrong noh đe đei chih răk lăm sơ̆p hla bơar hơ'mon tơdrong jang pơtao, 'bơ̆t anăp pơtao.