Esơra 9 - Sơ̆p Hlabơar Nơ̆r 'Bok Kei-Dei

Esơra krao khan kơ kon pơlei Isơrael oei kơ bơngai tơmoi

¹ Đơ̆ng rŏng kơ tơdrong noh, lu 'bok kuan tih năm jê̆ pơma hăm inh thoi âu: Kon pơlei Isơrael, lu 'bok soi păng bơngai Lêwi hai, ưh kơ đei tơklah đơ̆ng adrĕch păng lăm tơring âu, lu sư pơm rok lu kon pơlei Kanaan, kon pơlei Hêtit, kon pơlei Phêrêsit, kon pơlei Jêbus, kon pơlei Ammôn, kon pơlei Môap, kon pơlei Êyiptơ păng kon pơlei Amôrit.

² Yua kơ lu sư rôp oei kơ lu drŏ-kăn bơngai tơmoi păng kư̆m rôp ăn kon drŏ-nglo lu sư oei na lu adrĕch 'lơ̆ng rơgoh jing hrâu hre hăm adrĕch lăm dêh âu; tơpă lu đe kơdră păng 'bok kuan wei-lăng kon pơlei pơm yoch adrol hloh.

³ Kơtơ̆ng lu nơ̆r noh, na inh hek ao lăm păng ao 'nguaih inh, buch sŏk kơ̆l păng sŏk kang, na hơ-oei ơh sơ'ngon.

⁴ Đei lu bơngai băt chu yom nơ̆r Kră Yang 'Bok Kei-Dei đe Isơrael pơma lu sư akŭm tăp dăr kơ inh, lu sư hli kơ tơdrong yoch tih mă lu bơngai 'nao wih brŏk đơ̆ng pơm bơnă đei pơm yoch noh, gah inh ngôi hơ-oei hli tơtơ̆ dĭng truh tơ đei pơyơ̆r tơmam soi kiơ̆ kơsơ̆.

⁵ Truh tơ jơ pơyơ̆r tơmam soi kơsơ̆, inh iung đơ̆ng anih jơhngơ̆m mơlâu ơh sơ'ngon; ao lăm păng ao đaih inh hek hiah đĭ; inh hơtơ̆p kŭl-tăng, inh yơ̆r ti gah Kră Yang 'Bok Kei-Dei inh,

⁶ na krao apinh thoi âu: “Ơ, Kră Yang 'Bok Kei-Dei inh! Inh kơdơ̆ mơlâu dêh, ưh kơ pơ̆n ngơk lăng muh măt tơ Ih, Ih boih Kră Yang 'Bok Kei-Dei inh; yua kơ tơdrong yoch kơnê̆ lu nhôn pơm kơjung hloh kơ kơ̆l lu nhôn păng tơdrong yoch lu nhôn pơm kơjung truh tơ plĕnh.

⁷ Đơ̆ng chăl 'bok yă lu nhôn truh tơ dang ei, lu nhôn đei pơm yoch tih kơnê̆ tơpă, kơlih kơ tơdrong yoch lu nhôn, kơdih akâu lu nhôn, lu pơtao lu 'bok soi lu nhôn, Ih jao boih lăm tơpang ti lu pơtao dêh nai, pơlôch pơmat lu nhôn, tơgar iŏk tơmam păng pơm pơ'brơh, nhen thoi dang ei.

⁸ Mă-lei dang ei lăm minh kơchon kơđeh đĕch Kră Yang 'Bok Kei-Dei lu nhôn đei pơdah boih tơdrong mơnat wă tơgŭm lu nhôn bơngai oei oăi arih brŏk tơ dêh 'lơ̆ng rơgoh păng ăn kơ lu nhôn minh anih kơjăp lăm anih 'lơ̆ng rơgoh Sư; wă kơ Kră Yang 'Bok Kei-Dei lu nhôn pơchrang ăn kơ măt lu nhôn păng ăn kơ lu nhôn hơdah oei arih 'biơ̆ tŏ sĕt kơplah lu nhôn jing đĭch đam đe.

⁹ Yua kơ lu nhôn tơm hmơm sơ̆ jĭ bơngai pơm đĭch; mă-lei Kră Yang 'Bok Kei-Dei nhôn ưh kơ đei achăng lê̆ lu nhôn kơplah oei pơm đĭch sơ̆, Sư ăn kơ nhôn tơdrong Sư 'mêm sĭt 'bơ̆t anăp pơtao Phersia, wă ăn kơ lu nhôn arih 'biơ̆ wă kơ gơh pơm hnam akŭm Kră Yang 'Bok Kei-Dei lu nhôn păng wă kơ wih pơm ming đêl pơchah răm, kư̆m ăn kơ lu nhôn minh anih oei kơjăp lăm dêh Juđa păng pơlei Jêrusalem.

¹⁰ Dang ei, ơ Kră Yang 'Bok Kei-Dei lu nhôn! Nhôn wă gơh pơma kiơ dơ̆ng yua kơ tơdrong truh boih? Yua kơ lu nhôn đei sơngah boih kơ nơ̆r Ih tơtă.

¹¹ Ih đei tơtă kơ lu 'bok khan lê̆ adrol, đĭch đam Ih, khan kơ lu nhôn: Dêh char mă lu iĕm wă mơ̆t iŏk noh, jơ̆ minh pôm dêh 'mê̆-'mach, yua kơ đơ̆ng kon pơlei oei tơ noh pơm yoch boih păng đơ̆ng tơdrong lu sư kơkuh kơ yang mă Inh areh tơ jơ̆p-jang kơ dêh noh đơ̆ng pah âu truh tơ pah to.

¹² Kơlih kơ thoi noh, na 'nĕ ăn kon adruh lu iĕm iŏk kon tơdăm lu sư păng kư̆m 'nĕ ăn kon tơdăm lu iĕm iŏk kon adruh lu sư; 'nĕ kơ layơ chă tơdrong hiôk-hian lu sư păng wă kơ chă đei jing mơdrŏng đơ̆ng lu sư, wă kơ lu iĕm jing nuih pran, sŏng sa yua tơmam 'lơ̆ng đơ̆ng lăm dêh char păng 'măn lê̆ kơ kon lu iĕm dêh char âu jing tơmam lu sư yua ling-lang ling-lang hloi.

¹³ Na đơ̆ng rŏng kơ tơdrong truh phak lu nhôn, noh yua kơ đơ̆ng tơdrong lu nhôn pơm yoch tih dêh, Ih 'bôh ơ Kră Yang 'Bok Kei-Dei lu nhôn! Tơpă Ih ưh kơ wă phak lu nhôn trŏ thoi tơdrong yoch lu nhôn đei pơm ôh păng ăn kơ lu nhôn oei klaih klăi thoi âu;

¹⁴ Thoi noh na liơ nhôn wă pơm yoch kơ khôi juăt Ih dơ̆ng lĕ, oei iŏk klo kăn hăm lu adrĕch adrung mă oei kơkuh tơdrong kơnê̆ dah kiơ? Hăm trŏ ih gô hil mĭl, Ih gô pơrăm lu nhôn, truh tơ mah pă đei bu oei arih, ưh kơ đei bu gơh klaih dah kiơ?

¹⁵ Ơ Kră Yang Kră Yang 'Bok Kei-Dei đe Isơrael! Ih boih tơm tơdrong 'lơ̆ng tơpăt; yua kơ lu nhôn, mă oei arih gơh klaih, thoi đei 'bôh dang ei; 'nâu lu nhôn oei 'bơ̆t anăp Ih, pơm lơ tơdrong yoch; yua kơ noh, ưh kơ đei bu kĕ dơ̆ng ôh 'bơ̆t anăp Ih.”