Esơra 7 - Sơ̆p Hlabơar Nơ̆r 'Bok Kei-Dei

Esơra wih tơ pơlei Jêrusalem

¹ Đơ̆ng rŏng lu tơdrong ei, trŏ kơ lăm chăl Artaserses, pơtao Phersia, đei Esơra, kon drŏ-nglo Sêraia;

² Sêraia kon drŏ-nglo Hilkia, Hilkia kon Sallum, Sallum kon drŏ-nglo Sađŏk, Sađŏk kon drŏ-nglo Ahitup.

³ Ahitup kon drŏ-nglo Amaria, Amaria kon drŏ-nglo Asaria, Asaria kon drŏ-nglo Mêrayôt.

⁴ Mêrayôt kon drŏ-nglo Sêrahia, Sêrahia kon drŏ-nglo Usi,

⁵ Usi kon drŏ-nglo Buki, Buki kon Abisua, Abisua kon Phinêhas, Phinêhas kon drŏ-nglo Êlêasar, Êlêasar kon drŏ-nglo Arôn boih 'bok soi tơm.

⁶ Esơra âu sư wih brŏk đơ̆ng Babilôn. Sư jơ̆ minh 'nu bơngai bơtho hơgei hlôh kloh klĕch khôi juăt Môis, mă Kră Yang Kră Yang 'Bok Kei-Dei đe Isơrael đei chih roi. Yua kơ ti Kră Yang tơgŭm sư, thoi noh pơtao asong ăn dôm tơdrong sư apinh.

⁷ 'Blep lăm sơnăm mă tơpơh, chăl pơtao Artaserses, đei lu kon pơlei Isơrael, lu 'bok soi păng bơngai Lêwi, lu bơngai hơri, lu bơngai gak 'măng păng lu bơngai Nêthinim, đĭ-đăng wih brŏk hơdai sư tơ Pơlei Jêrusalem.

⁸ Khei pơđăm sơnăm mă tơpơh chăl pơtao Artaserses, Esơra truh tơ pơlei Jêrusalem.

⁹ Thoi noh, năr mônh khei mônh, sư đơ̆ng dêh Babilôn pơtơm wih brŏk blŭng-a, yua kơ đơ̆ng ti Kră Yang 'Bok Kei-Dei 'mêm wei-lăng tơgŭm, sư truh tơ pơlei Jêrusalem năr mônh khei mă pơđăm.

¹⁰ Esơra đei ling-lang lăng hŏk iŏk khôi juăt Kră Yang, wei răk pơm kiơ̆ păng bơtho ăn kơ kon pơlei Isơrael băt kơ dôm khôi juăt păng dôm tơdrong đei tơtă.

¹¹ 'Nâu jơ̆ hla bơar chih rok đêl nơ̆r tơtă đơ̆ng pơtao Artaserses pơjao ăn kơ Esơra, 'bok soi păng bơngai bơtho hơgei gah sơ̆p hla bơar, hlôh tôm khôi juăt, nơ̆r tơtă Kră Yang Kră Yang 'Bok Kei-Dei ăn kơ đe Isơrael.

¹² Artaserses, pơtao kơ lu pơtao, gơih ăn kơ Esơra, 'bok soi bơngai bơtho hơgei kơ hla bơar, hlôh tôm khôi juăt Kră Yang 'Bok Kei-Dei kơpal plĕnh, hơpơi ăn kơ ih hiôk-hian lăm tôm tơdrong.

¹³ Inh chih nơ̆r tơtă ăn kơ đĭ-đăng bơngai bu oei lăm teh đak inh, gah kon pơlei Isơrael, 'bok soi tơm păng lu bơngai Lêwi, wă wih brŏk tơ pơlei Jêrusalem, na athei năm hơdai hăm ih.

¹⁴ Inh păng tơpơh 'nu bơngai hơgei wơh ih brŏk chă lăng wă kơ băt lăm bơngai Juđa păng tơ Pơlei Jêrusalem, hăm kiơ̆ kơ khôi juăt Kră Yang 'Bok Kei-Dei mă đei chih rok ih oei chĕp lăm ti ih.

¹⁵ Ih gô chĕp ba hăm ih lu hu păng maih mă pơtao păng lu bơngai hơgei lăp đon pơyơ̆r kơ Kră Yang 'Bok Kei-Dei đe Isơrael, oei lăm pơlei Jêrusalem.

¹⁶ Hăm lu hu maih mă lu kon pơlei Isơrael păng lu 'bok soi oei lăm tơring dêh Babilôn, lu sư đei pơyơ̆r kơ hnam akŭm kơkuh kơ Kră Yang 'Bok Kei-Dei lu sư tơ pơlei Jêrusalem.

¹⁷ Ih yua jên âu răt lu rơmo dăm, triu dăm, triu tơno kon hăm phe 'ba tơmam soi pơyơ̆r, na pơyơ̆r tơ kơpal kơ chơnang soi lăm hnam Kră Yang 'Bok Kei-Dei lu iĕm, tơ pơlei Jêrusalem.

¹⁸ Lu hu păng maih mă oei rơkah, dah wă yua lăm tơdrong kiơ trŏ, kiơ̆ kơ ih păng lu 'nhŏng oh ih khan 'lơ̆ng na pơm kiơ̆ thoi Kră Yang 'Bok Kei-Dei lu iĕm lăp đon.

¹⁹ Gah lu tơmam yua đei jao ăn kơ ih wă yua lăm tơdrong kơkuh lăm hnam Kră Yang 'Bok Kei-Dei ih athei dan 'bơ̆t anăp Kră Yang 'Bok Kei-Dei tơ pơlei Jêrusalem.

²⁰ Gah dôm lu tơmam nai ih kăl wă yua pơhuach lăm hnam akŭm kơkuh kơ Kră Yang 'Bok Kei-Dei ih, iŏk bĕ lu tơmam noh đơ̆ng lăm hnam mong tơmam pơtao.

²¹ Thoi noh, inh boih pơtao Artaserses đei chih roi ăn kơ lu 'bok kuan wei hnam mong tơmam gah bơmơ̆t kơ đak krong khan mă tơmam kiơ Esơra, 'bok soi bơngai bơtho hơgei kơ hla bơar, hlôh băt dôm khôi juăt Kră Yang 'Bok Kei-Dei tơ kơpal plĕnh, gô apinh đơ̆ng lu iĕm, lu iĕm athei ăn hloi.

²² Truh đei minh-hrĕng hlak talânga jên hu, minh-hrĕng hnŏngb 'bao 'ba tơ'bâu, minh-hrĕng kơthŭng sik, minh-hrĕng kơthŭngc đak rơmă păng 'boh ưh kơ kĕ jô̆ dôm yơ.

²³ Mă tôm tơdrong kiơ Kră Yang 'Bok Kei-Dei kơpal plĕnh đei bơtho khan gah hnam Sư, athei pơm mă tôm bĕ, tơdah ưh kơnh hli kơ tơdrong truh pơmat lăm dêh char, tơ pơtao păng truh tơ lu kon pơtao.

²⁴ Đơ̆ng noh dơ̆ng, inh đei chih roi kơ iĕm băt ưh kơ gơh iŏk thuê̆ tơmam dah jên đơ̆ng 'bok soi, bơngai Lêwi, lu khŭl hơri, bơngai gak 'măng, bơngai Nêthinim, dah lu đam lăm hnam akŭm Kră Yang 'Bok Kei-Dei.

²⁵ Gah ih, ơ Esơra, kiơ̆ kơ tơdrong hơgei Kră Yang 'Bok Kei-Dei ih, đei boih lăm ti ih, pơjing bĕ lu 'bok wei-lăng, 'bok sek tơlang, jĭ lu bơngai hlôh băt tôm khôi juăt Kră Yang 'Bok Kei-Dei ăn kơ ih, wă kơ lu sư sek tơlang ăn đĭ kon pơlei oei gah bơmơ̆t kơ đak krong; na lu đe bu mă ưh kơ băt khôi juăt, ih athei bơtho lu sư wă kơ băt.

²⁶ Tơdah lu đe bu ưh kơ pơm kiơ̆ khôi juăt Kră Yang 'Bok Kei-Dei ih păng khôi juăt pơtao, na lu iĕm athei sek tơlang phak lu sư hloi, dah pơlôch, dah puh tơweh, dah iŏk đi mŭk tơmam dah rôp phak, kiơ̆ kơ tơdrong sư glăi.

²⁷ Na Esơra khan thoi âu: Trŏ bơnê ư-ang dêh tơpă kơ Kră Yang Kră Yang 'Bok Kei-Dei lu 'bok yă bơ̆n, đei hơmet jơhngơ̆m pơtao wă hơmet pơrŏ ming hnam akŭm Kră Yang tơ pơlei Jêrusalem.

²⁸ Păng ăn kơ inh đei tơdrong pŭn hiôk 'bơ̆t anăp pơtao păng 'bơ̆t anăp lu bơngai hơgei păng lu kuan tih gơh kĕ đơ̆ng pơtao ăn! Thoi noh, inh hiôk dêh, yua kơ ti Kră Yang 'Bok Kei-Dei inh tơgŭm inh pơ̆n nuih păng krao akŭm lu kơdră adrĕch adrung đe Isơrael wă yak năm hơdai hăm inh.