Esơra 5 - Sơ̆p Hlabơar Nơ̆r 'Bok Kei-Dei

Pơtơm jang pơm hnam akŭm dơ̆ng

¹ Kơplah Hagai păng Sachari kon Iđô pơm 'bok khan lê̆ adrol, yua hăm anăn Kră Yang 'Bok Kei-Dei Isơrael bơtho khan lê̆ adrol kơ lu bơngai Juđa tơ dêh Juđa păng tơ pơlei Jêrusalem. Wă kơ lu sư iung pơm pơjing hnam akŭm.

² Đei Serubabel, kon drŏ-nglo Sêathiel păng Jêsua kon tơdăm Jôsađăk, bre sư iung, tơgŭm pơtơm pơjing hnam akŭm kơkuh kơ Kră Yang 'Bok Kei-Dei tơ pơlei Jêrusalem păng đei lu 'bok khan lê̆ adrol Kră Yang 'Bok Kei-Dei wang tơgŭm.

³ Lăm kơplah noh, Tatênai pơm 'bok tih pơgơ̆r dêh gah bơmơ̆t đak krong păng Sathar Bôsênai păng đĭ khŭl lu sư bơngai bơ̆jang, năm tơ Jêrusalem chơchă kon pơlei Juđa păng khan kơ lu sư thoi âu: Bu athei iĕm pơm pơjing hnam akŭm âu păng man ming dur pơlei âu?

⁴ Kŭm apinh hloi anăn lu bơngai mă pơjing pơm hnam akŭm âu.

⁵ Mă-lei Kră Yang 'Bok Kei-Dei wei-lăng lu kră pơgơ̆r kon pơlei Juđa, thoi noh lu đe noh ưh kơ đei gơh pơgăn, gô chih roi tơdrong noh kơ pơtao Đarius băt, gô mơ̆ng kơ pơtao chih tơjur ăn thoi yơ.

⁶ 'Nâu hla bơar đei chih rok dơ̆ng đơ̆ng hla bơar 'bok Tatênai, yŏng pơgơ̆r dêh gah bơmơ̆t đak krong, Sêthar Bôsênai păng đĭ khŭl lu sư bơ̆jang, wă khan lu bơngai Aphatsak oei gah âu đak krong, đei roi kơ pơtao Đarius,

⁷ thoi nơ̆r 'nâu: “Hơpơi kơ pơtao Đarius hiôk-hian tôm tơdrong!

⁸ Nhôn wă kơ ih băt kơ lu nhôn năm boih lăm dêh Juđa, năm truh tơ hnam akŭm Kră Yang 'Bok Kei-Dei tih 'bôh bơngai Juđa man hnam akŭm noh hăm tơmo tih; bơbŭng hnam đe jrŏng roh 'long hơgơn tơ tơnăr hnam boih păng tơdrong jang hơlen dêh păng tơdrong jang kư̆m rai 'net 'net tơ anăp lăm tơpang ti lu sư jang.

⁹ Lu nhôn đei apinh lu đe kră pơgơ̆r pơlei thoi âu: Bu ăn kơ iĕm pơm hnam akŭm âu păng man dur pơlei âu?

¹⁰ Lu nhôn kư̆m apinh anăn lu sư, wă kơ gơh roi ăn kơ ih băt kơ anăn lu bơngai wei-lăng pơgơ̆r lu sư.

¹¹ Lu sư tơl nơ̆r thoi âu: Lu nhôn boih đĭch đam Kră Yang 'Bok Kei-Dei, Kră Yang pơgơ̆r đĭ-đăng plĕnh păng teh; lu nhôn oei wă pơm pơjing dơ̆ng hnam akŭm, đunh sơnăm boih adrol kơ âu đei minh 'nu pơtao mơdrŏng đe pơyua lăm Isơrael đei pơjing păng pơm.

¹² Mă-lei 'bok yă lu nhôn ưh kơ chu Kră Yang 'Bok Kei-Dei plĕnh teh, na Sư jao lu nhôn tơ lăm ti Nebukatnessar, pơtao Babilôn, bơngai Kalđê; pơtao ei sơ̆ pơrăm hnam akŭm âu păng rôp kon pơlei chông ba tơ dêh Babilôn.

¹³ Mă-lei sơnăm blŭng-a lăm chăl Sirus, pơtao Babilôn, pơtao Sirus athei pơjing pơm ming hnam akŭm Kră Yang 'Bok Kei-Dei.

¹⁴ Pơtao Sirus kư̆m đei iŏk pơdrâu dôm lu tơmam kơthao hu, maih đơ̆ng lăm hnam yang Babilôn mă pơtao Nebukatnessar đei iŏk đơ̆ng lăm hnam akŭm Kră Yang 'Bok Kei-Dei tơ pơlei Jêrusalem, na chĕp ba tơmam noh tơ hnam yang Babilôn; Sirus pơjao ăn kơ Sêsbasar, mă sư đei ăn pơm 'bok yŏng pơgơ̆r,

¹⁵ păng khan kơ sư thoi âu: Iŏk bĕ dôm pơnhan tơmam gĭt 'nâu, năm 'măn tơ hnam akŭm tơ pơlei Jêrusalem păng pơjing pơm ming dơ̆ng hnam Kră Yang 'Bok Kei-Dei 'bơ̆t anih so sư.

¹⁶ Kơplah noh, Sêsbasar truh đei pơjing ming hnam akŭm Kră Yang 'Bok Kei-Dei tơ pơlei Jêrusalem; păng đơ̆ng noh truh tơ dang ei, đe oei pơm, mă-lei tam mă keh.

¹⁷ Thoi noh dang ei, dah ih lăp đon, chă lăng pơnhen bĕ lăm anih tah răk hla bơar tơ dêh Babilôn, lăng lăng hăm trŏ kơ pơtao Sirus đei tơjur ăn gơh pơm ming dơ̆ng hnam akŭm Kră Yang 'Bok Kei-Dei tơ pơlei Jêrusalem dah ưh. Đơ̆ng noh, apinh ih ăn kơ nhôn băt, bơtho lu nhôn wă kơ lu nhôn pơm kiơ̆ thoi ih wă.”